"სუიციდს კატეგორიულად გამოვრიცხავთ" - თბილისის მერის მოადგილის ოჯახი განცხადებას ავრცელებს
თბილისის მერის მოადგილის ოჯახი განცხადებას ავრცელებს
გარდაცვლილი თბილისის მერის მოადგილის, ილია ელოშვილის ოჯახი განცხადებას ავრცელებს, რომელშიც ნათქვამია, რომ ისინი კატეგორიულად გამორიცხავენ სუიციდის ვერსიას. განცხადება საკუთარ ფეისბუქზე მმართველი პარტიის ყოფილმა დეპუტატმა, ზვიად კვაჭანტირაძემ გამოაქვეყნა.
თბილისის მერის მოადგილე, ილია ელოშვილი გარდაცვლილი პირველ ივნისს, საკუთარ სახლში იპოვეს. გარდაცვალების მიზეზი ამ დრომდე უცნობია. პირველადი მონაცემებით, ელოშვილი კუთვნილი იარაღიდან, ერთი გასროლით არის დაღუპული.
შინაგან საქმეთა სამინისტრომ გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.
47 წლის ილია ელოშვილი 2017 წლიდან თბილისის მერის, კახა კალაძის მოადგილის თანამდებობაზე მუშაობდა. 2012-2016 წლებში კი ენერგეტიკის მინისტრის მოადგილე იყო. ამ თანამდებობას მაშინ ასევე კახა კალაძე იკავებდა.
“ორმაგად დიდი ტკივილია ჩვენთვის სოციალურ ქსელებში გავრცელებული ვერსია თვითმკვლელობის შესახებ, რასაც ოჯახი კატეგორიულად გამორიცხავს, რადგან არანაირი წინაპირობა ან რაიმე ნიშანი იმისა, რომ ილია ყოფილიყო ღრმა დეპრესიულ მდგომარეობაში არ არსებობდა”, – ნათქვამია ოჯახის განცხადებაში.
მათივე განმარტებით, 31 მაისს, მკურნალობის და რეაბილიტაციის შემდეგ ელოშვილი გავიდა სამსახურში, რასაც ადასტურებენ მისი კოლეგებიც და მეგობრებიც, ვისთანაც ილიას შეხება ჰქონდა.
ოჯახის თქმით, დაუშვებელი იყო, ტრაგედიიდან ორიოდე საათში პოლიციის მაღალჩინოსნის მხრიდან გაკეთებული განცხადება სუიციდის შესახებ, რამაც “უშუალოდ ბიძგი მისცა ამ ვერსიის და ასგვარი ჭორის გავრცელებას.”
“ზემოთქმულიდან გამომდინარე, ოჯახის და განსაკუთრებით ილიას არასრულწლოვანი შვილების მდგომარეობის გათვალისწინებით, მივმართავთ ყველას თხოვნით შეწყდეს სუიციდზე და ნებისმიერ სხვა ვერსიაზე საჯარო საუბრები სოციალურ ქსელებში თუ ტელეეთერებში, ვიდრე არ დასრულდება მიმდინარე გამოძიება და არ დაიდება ექსპერტიზის ოფიციალური დასკვნა.” – წერია განცხადებაში.
