სომხეთში ვაქცინის გაკეთება არ სურთ. მინისტრები მოსახლეობას მაგალითს მისცემენ

სომხეთში, უკვე ორ კვირაზე მეტია, მოქალაქეების კორონავირუსის საწინააღმდეგო ვაქცინაციის პროცესი მიმდინარეობს. თუმცა, როგორც აღმოჩნდა, ვაქცინაციის ტემპი ძალიან დაბალია და ჯერჯერობით სულ 2 690 ადამიანი აიცრა. პრემიერ-მინისტრის მოვალეობის შემსრულებელმა ნიკოლ ფაშინიანმა განაცხადა, რომ ეს „სამარცხვინოდ დაბალი მაჩვენებელია“ და თვითონ მინისტრთა კაბინეტის წევრებს დაავალა ერთი კვირის განმავლობაში, კორონავირუსის საწინააღმდეგო აცრის გაკეთება.

იმისათვის, რომ ვაქცინაციის ტემპები დაჩქარდეს, გუშინ AstraZeneca-ს პრეპარატით აიცრნენ ვიცე-პრემიერის მოვალეობის შემსრულებელი ტიგრან ავინიანი და ჯანდაცვის მინისტრის მოვალეობის შემსრულებელი, ანაიტ ავანესიანი.

მანამდე, ჯანდაცვის სამინისტროს გეგმების შესახებ ვრცელდებოდა ინფორმაცია, რომელიც 700 ათასი ადამიანის ვაქცინაციას ითვალისწინებს.

დღეისათვის, სომხეთში ინგლისურ-შვედური ვაქცინა AstraZeneca და რუსული „Спутник V“ აქვთ. ვრცელდება ცნობები ჩინური წარმოების ვაქცინის შეძენის გეგმაზეც.

სომხეთში, კორონავირუსით ინფიცირების პირველი შემთხვევა 2020 წლის 1 მარტს დაფიქსირდა. 2020 წლის 16 მარტიდან 11 სექტემბრამდე საგანგებო მდგომარეობის რეჟიმი მოქმედებდა. შემდეგ, ქვეყანაში კარანტინი დააწესეს, რომელიც 2021 წლის 11 ივლისამდე გაგრძელდება. გასული დღე-ღამის განმავლობაში, კორონავირუსით ინფიცირების 656 ახალი შემთხვევა დარეგისტრირდა. სულ, სომხეთში, კორონავირუსით 215 528 ადამიანი დაინფიცირდა, გამოჯანმრთელდა – 197 171, გარდაიცვალა – 4 087.

• კორონავირუსის მორიგი ტალღა: სომხეთში ინფიცირებულთა რიცხვი ისევ იზრდება
• Covid-19-ის სტატისტიკა სამხრეთ კავკასიაში. საქართველო – 395 ახალი შემთხვევა, 9 გარდაცვლილი

ვაქცინირებულებს ტესტის გარეშე შეეძლებათ გასვლა

„მომავალ კვირას, ცვლილებები შევა კარანტინის წესებში. ვაქცინირებულებს აღარ დასჭირდებათ PCR-ტესტის ჩაბარება ქვეყნიდან გასვლის ან ქვეყანაში შემოსვლის შემთხვევაში. ეს ეხება მხოლოდ ჩვენს მოქალაქეებს. ეს მნიშვნელოვანი ნაბიჯია შეზღუდვების გადასალახად და ნორმალური ცხოვრების დასაბრუნებლად“, – განაცხადა 29 აპრილს გამართულ ბრიფინგზე, ანაიტ ავანესიანმა.

ახლა, ჯანდაცვის მინისტრის მოვალეობის შემსრულებლის თქმით, 18 წელს ზემოთ უფროსი ასაკის მოქალაქეებს AstraZeneca-ს პრეპარატით შეეძლებათ აცრა. ქვეყანაში ელიან როგორც ამ ვაქცინის, ისე „Спутника V“-ის ახალ პარტიებს.

ექიმების დაკვირვებით, ქვეყნის მოსახლეობა დიდ ინტერესს იჩენს რუსული ვაქცინა Спутника V“-ის მიმართ. მაგრამ ჯერჯერობით ეს პრეპარატი მხოლოდ რისკის ჯგუფში მყოფი ადამიანებისთვის არის ხელმისაწვდომი.

„ყველა ვაქცინა 100%-ით იცავს დაავადების მძიმე და უკიდურესად მძიმე მიმდინარეობისგან. ეს ძალიან მნიშვნელოვანია, ვინაიდან 4 ათასი გარდაცვლილი – საშინელებაა. თუკი არსებობს ამასთან ბრძოლის შესაძლებლობა, უნდა გადაიდგას ნაბიჯები და არ უნდა მივეცეთ მანიპულაციებს“, – განაცხადა ანაიტ ავანესიანმა.

„მოდი, დავიწყოთ ჩვენით“, – პრემიერ-მინისტრის მოვალეობის შემსრულებელი

 სომხეთის მთავრობის წევრებმა და სახელმწიფო სტრუქტურების თანამშრომლებმა აუცილებლად უნდა გაიარონ ვაქცინაცია. ამის შესახებ, ნიკოლ ფაშინიანმა მინისტრთა კაბინეტის სხდომაზე განაცხადა:

„მოდი, დავიწყოთ ჩვენით. ჩვენ ყველა უნდა ავიცრათ. ამ დროისთვის, სომხეთში, სულ 2 690 ადამიანია ვაქცინირებული. ეს სამარცხვინოდ დაბალი მაჩვენებელია, ახლა მსოფლიოში ვაქცინირებული მოქალაქეების რაოდენობა ქვეყნის ხარისხის მაჩვენებელია ყველა ასპექტში – ეკონომიკურშიც, პოლიტიკურშიც“.

მისი თქმით, თუკი ხელისუფლება საუბრობს იმაზე, რომ 18 წელზე უფროსი ასაკის ყველა მოქალაქე უნდა აიცრას, აუცილებელია საკუთარი თავით დაწყება, შემდეგ კი ყველა სახელმწიფო უწყების თანამშრომლის აცრა:

 „სახელმწიფო ორგანოებში ჩვენ უნდა ვლირერობდეთ, რათა ყველამ დაინახოს, რომ ავიცერით და სიცოცხლეს ვაგრძელებთ“.

ფაშინიანმა აღნიშნა, რომ ვაქცინაცია აუცილებელია – როგორც ქვეყნიდან სომხეთის მოქალაქეების დაუბრკოლებლად გასვლისთვის, ისე ქვეყანაში ჩამოსვლის მსურველი ტურისტების რაოდენობის ზრდისთვის:

„თუ აქ არავინ აიცრება, ქვეყანა ჩაითვლება რისკის მქონედ და აქ არავინ ჩამოვა“.

მინისტრებს შორის უკვე არიან ვაქცინირებულები

ჯანდაცვის მინისტრის მოვალეობის შემსრულებელი ანაიტ ავანესიანი და ვიცე-პრემიერის მოვალეობის შემსრულებელი ტიგრან ავინიანი კორონავირუსის საწინააღმდეგო ბრიტანულ-შვედური ვაქცინა AstraZeneca-თი აიცრნენ.

ვიცე-პრემიერმა ტიგრან ავინიანმა განმარტა, რომ არჩევანი პრეპარატ AstraZeneca-ზე შემთხვევით არ შეუჩერებია – სწორედ ამ ვაქცინის ირგვლივ ვრცელდება ხმები, რომელიც ადამიანებს აფრთხობს:  

„ოფიციალური მონაცემების თანახმად, AstraZeneca-თი აცრილი 200 მლნ ადამიანიდან მხოლოდ რამდენიმე ათეულს გამოუვლინდა გვერდითი ეფექტები. ახლა ძალიან აქტიურად ვრცელდება ხმები ამ პრეპარატზე და გადავწყვიტეთ, ჩვენს მაგალითზე გვეჩვენებინა, რომ ეს ხარისხიანი ვაქცინაა“.

ჯანდაცვის ხელმძღვანელიც შეეხო ამ თემას:

„ჩვენი მოქალაქეები ენდობიან ვაქცინა „სპუტნიკ V“-ს, AstraZeneca-სთან დაკავშირებით კი კითხვები აქვთ. გულწრფელად რომ გითხრათ, თავიდან ჩვენ არც კი ვაპირებდით ინფორმაციის გახმაურებას იმის თაობაზე, თუ რომელი პრეპარატი ავირჩიეთ, რადგან ყველა მათგანი ხარისხიანი და ეფექტინია“.

მან აგრეთვე მოუწოდა მთავრობის წევრებს, თავიანთ მაგალითზე აჩვენონ, რომ ვაქცინაცია – მნიშვნელოვანი ნაბიჯია, ქვეყნის მოქალაქეებს კი – მათ მიბაძონ:

 „ყველა ის ვაქცინა, რომელიც სომხეთს აქვს, 100%-ით იცავს დაავადების მძიმე და ძალიან მძიმე მიმდინარეობისგან. გვერდითი ეფექტების რისკი, თუნდაც მცირე, პრაქტიკულად ნულის ტოლია, თუ შევადარებთ კორონავირუსით ინფიცირებას და ორგანიზმზე მის მძიმე ზემოქმედებას ან ლეტალურ შემთხვევებს“.