სომხეთში კორონავირუსის გამო გაჩერებული საწარმოების ნაწილი ამუშავდა

სომხეთი საგანგებო მდგომარეობის ნაწილობრივ შერბილებაზე გადავიდა. ეს შეზღუდვები ერთი თვის წინათ შემოიღეს, როდესაც კორონავირუსის ეპიდემიასთან დაკავშირებით საგანგებო მდგომარეობა გამოცხადდა.

სომხეთში საგანგებო მდგომარეობა თავიდან 16 მარტიდან 14 აპრილამდე გამოცხადდა. იმავდროულად  გამოცხადდა საქმიანობის ყველა სფეროს შეზღუდვაც, გარდა სასიცოცხლოდ მნიშვნელოვანი და სტრატეგიული სფეროებისა. კერძოდ, მუშაობდა პროდუქტების მაღაზიები და აფთიაქები. ახლა საგანგებო მდგომარეობის რეჟიმი 14 მაისამდეა გაგრძელებული. საწარმოების ნაწილს სამუშაოზე დაბრუნების საშუალება მიეცა. მაგრამ საზოგადოებრივი ტრანსპორტი და მეტრო ჯერჯერობით გაჩერებულია.

•  „გავალ თუ არა, პირველ რიგში, ცოლს ვაკოცებ“, – შვიდი ისტორია საქართველოში კარანტინიდან

ვისთვის შეიძლება მუშაობა

რამდენიმე გადამამუშავებელი მრეწველობის საწარმომ სამუშაო განაახლა. ნებადართულია თამბაქოს ნაწარმის, ცემენტის, მეტალის კონსტრუქციების წარმოება, ამუშავდა ასევე მათი ასაწყობი დეტალების მიმწოდებელი საწარმოები.

დროებით აკრძალული საქმიანობის სფეროების სიიდან თითქმის მთელი სამშენებლო სფერო ამოიღეს. ჯერჯერობით ნებადართული არ არის მხოლოდ მშენებლობის დამასრულებელი ეტაპი.

სამუშაოდ გავიდნენ ასევე ინჟინერები და სამშენებლო კონსალტინგის სპეციალისტები.

სომხეთის პრემიერმა ნიკოლ ფაშინიანმა სამუშაოდ გასვლის ნებართვის გაცემასთან ერთად, ყველა საწარმოს ხელმძღვანელობას სანიტარული კონტროლის გაძლიერებისკენ მოუწოდა:

 „მოცემულ ეტაპზე განსაკუთრებულ მნიშვნელობას ვანიჭებთ ბიზნესის პასუხისმგებლობას. რამდენად უზრუნველყოფენ ისინი აუცილებელ პირობებს საკუთარი თანამშრომლების დაინფიცირების ალბათობის შესამცირებლად. კიდევ ერთხელ მოგმართავთ მოწოდებით, რომ ეპიდემიის საწინააღმდეგო ყველა ზომა გაატაროთ, რათა ბოლო დღეების დადებითი დინამიკა არამხოლოდ შენარჩუნდეს, არამედ ეპიდემიის პიკი უკან მოვიტოვოთ“.

კომენდატურა ყველა საწარმოს წარუდგენს კონსულტაციებს, თუ როგორ მოახდინონ უკეთ სამუშაოს ორგანიზება – ინფექციის გავრცელების მინიმალური რისკებით.

პარლამენტში სიის გაფართოებას სთავაზობდნენ

ბიზნესის ზოგიერთი სფეროს მუშაობის ნებართვის საკითხი მთავრობის გარდა, პარლამენტშიც განიხილებოდა.  

ერთ-ერთი ოპოზიციური ფრაქცია საქმიანობის დაშვებული სფეროების სიის მნიშვნელოვნად გაფართოებას სთავაზობდა. კერძოდ, ფრაქცია „განათლებული სომხეთის“ ხელმძღვანელი ედმონ მარუკიანი საზოგადოებრივი ტრანსპორტისა და მეტროს, საყოფაცხოვრებო მაღაზიებისა და იმ ცენტრების მუშაობის განახლების წინადადებით გამოვიდა, რომლებიც სპორტული ინვენტარით ვაჭრობენ.

ის სთავაზობდა ასევე ოლქთაშორისი ტრანსპორტის, ტექმომსახურების პუნქტების და მანქანების განბაჟების მუშაობის განახლებას:

 „ჩვენ ამ სფეროებს თანდათან, ეტაპობრივად უნდა მივცეთ მუშაობის განახლების საშუალება. და შეზღუდვები ლოგიკური უნდა იყოს“.

მაგრამ მის წინადადებებს დეპუტატების უმრავლესობამ მხარი არ დაუჭირა.

რას წერენ სოციალურ ქსელებში

სოციალური ქსელების მომხმარებელები კომენდატურის გადაწყვეტილებას არაერთგვაროვნად შეხვდნენ. მოქალაქეების ნაწილი მიიჩნევს, რომ შეზღუდვების შერბილებას, შესაძლოა, ვირუსის გავრცელების მეორე ტალღა მოჰყვეს და ის ადამიანების სიცოცხლეს საფრთხეს უქმნის:

 „ამდენი მოვითმინეთ, და კიდევ ერთ კვირასაც მოვითმენდით. ასე კი, შესაძლოა, ყველაფერი თავიდან დაიწყოს“.

მეორე ნაწილს მიაჩნია, რომ შეზღუდვები ათასობით ადამიანს ფინანსურ დაბრკოლებებს უქმნის და ეს შეძლებისდაგვარად უნდა გაუქმდეს: 

„არავითარი კატასტროფა არ მოხდება. ყველა შეზღუდვა ლოგიკის ფარგლებში უნდა იყოს. უბრალოდ, ხელისუფლებამ ხალხს ლაგამი ამოსდო. როდემდე?“