სომხეთის სამხრეთში, რუსული სამხედრო ბაზის ორი საყრდენი წერტილი შეიქმნა

სომხეთში, სიუნიქის პროვინციაში, რომელიც აზერბაიჯანს ესაზღვრება, რუსეთის 102-ე სამხედრო ბაზის ორი საყრდენი წერტილი შეიქმნა. ამის შესახებ, სომხეთის პრემიერ-მინისტრის მოვალეობის შემსრულებელმა, ნიკოლ ფაშინიანმა განაცხადა.

იმის შესახებ, რომ სომხეთი და რუსეთი სიუნიქში, ქვეყნის სამხრეთ რეგიონში, 102-ე რუსული სამხედრო ბაზის საყრდენი პუნქტის შექმნას განიხილავდნენ, ნიკოლ ფაშინიანი აპრილში საუბრობდა.

მაგრამ კიდევ უფრო ადრე, თებერვალში, რუსეთთან თანამშრომლობის განმტკიცების აუცილებლობაზე, მათ შორის, რუსული სამხედრო ბაზების გაფართოებაზე საუბრობდა ქვეყნის თავდაცვის მინისტრი, ვაგარშაკ არუთუნიანი.

რუსეთის 102-ე სამხედრო ბაზა, 1995 წელს გაფორმებული სახელმწიფოთაშორისი შეთანხმებით, გიუმრიშია განთავსებული, სომხეთის სიდიდით მეორე ქალაქში. 2010 წელს, რუსეთმა და სომხეთმა განთავსების შესახებ შეთანხმება 2044 წლამდე გაახანგრძლივეს.

• რა იმალება სერგეი ლავროვის ვიზიტის უკან? კომენტარები ბაქოდან და ერევნიდან
• მოსაზრება: წახვიდე, რომ დაბრუნდე? რას ნიშნავს ფაშინიანის გადადგომა

სომხეთის უსაფრთხოების სისტემა არ შეცვლილა

ეროვნულ კრებაში სიტყვით გამოსვლისას, ნიკოლ ფაშინიანმა განაცხადა, რომ სომხეთის უსაფრთხოების სისტემა არ შეცვლილა. ქვეყნის ყველა საზღვრის დაცვა ხორციელდება სომხურ-რუსული ერთობლივი სამხედრო შენაერთების ძალისხმევით:

„საიდუმლო არ არის, რომ სომხეთის სიუნიქის პროვინციაში, რუსეთის 102-ე სამხედრო ბაზის ორი საყრდენი პუნქტი გაიხსნა. ეს უსაფრთხოების დამატებითი გარანტიები იქნება, როგორც სიუნიქის პროვინციისთვის, ისე მთლიანად სომხეთისთვის“.

საზღვრისპირა რეგიონების გამაგრების შესახებ

პარლამენტში, დამოუკიდებელმა დეპუტატმა ტაგუი ტოვმასიანმა ფაშინიანს ჰკითხა, რა კეთდება სიუნიქსა და გეღარქიუნიქში – აზერბაიჯანის მოსაზღვრე რეგიონებში – სომხეთის თავდაცვითი პოზიციების გაძლიერებისთვის. მისი თქმით, ომის შემდეგ უკვე ნახევარი წელი გავიდა და სანგრების, გამაგრებული და აღჭურვილი პოზიციების არარსებობა „შეშფოთებას იწვევს“.

„რა გველოდება საზღვარზე, მის საბოლოო დელიმიტაციასა და დემარკაციამდე?“, – დაინტერესდა დეპუტატი.

კითხვამ პრემიერ-მინისტრი წყობიდან გამოიყვანა. მისი თქმით, საზღვარი სიუნიქისა და გეღარქუნიქის პროვინციებში სათანადოდ არის აღჭურვილი, მაგრამ ეს სამუშაო გასაგები მიზეზების გამო, არ აფიშირდება:

„ხშირად, როდესაც ვუსმენ ჩვენ შიდა საზოგადოებრივ დისკურსს, მესმის, რომ აზერბაიჯანის დაზვერვას არ სჭირდება დიდი რესურსების დახარჯვა ამ სამუშაოზე. მართალს ამბობენ, რომ ალიევს არ სჭირდება არანაირი თანხის დახარჯვა დაზვერვაზე, მას ჩვენ ვატყობინებთ ყველაფერს.

მე გთავაზობთ, რომ შემდეგ ჯერზე, პირდაპირ კოორდინატები და რუკები წარმოვადგინოთ, გამოვაქვეყნოთ, მაგალითად, რომელ კოორდინატებზე არ არის სანგრები, სად ვართ ძლიერები, სად არ ღირს თავდასხმა, აქ არის დერეფანი და შეიძლება თავდასხმა. თქვენ საერთოდ გესმით, რას აკეთებთ?“.

დეპუტატმა ამაზე უპასუხა, რომ ორივე მხარის პოზიციები ერთმანეთისგან იმდენად ახლოს არის, რომ მოწინააღმდეგე ხედავს სანგრების მდგომარეობას და არანაირი კოორდინატების გადაცემა არ არის საჭირო:

„მე უბრალოდ მაინტერესებს, ჩვენი თავდაცვითი სისტემა რატომ არის ასეთ მდგომარეობაში (…), რომ აზერბაიჯანი პირდაპირ ხედავს ჩვენს აღჭურვილობას, თავდაცვას, ჩვენი ჯარისკაცების ფორმებს, რადგან ბევრ ადგილას, ისინი ერთმანეთის პირდაპირ დგანან. და მე მაინტერესებს, რატომ არ არის ჩვენი წინა ხაზი აღჭურვილი“.

ნიკოლ ფაშინიანმა დეპუტატები დაარწმუნა, რომ შესაბამისი სამუშაოები ხორციელდება, მაგრამ არავის შეუძლია იმის დანახვა, რა კეთდება:

„და მადლობა ღმერთს, რომ არც თქვენ და არც აზერბაიჯანელებს არ შეგიძლიათ ამის დანახვა. მიხარია“.