სომხეთმა საქართველოსგან დახმარება მიიღო - სამედიცინო აღჭურვილობა კორონავირუსთან საბრძოლველად

სომხეთში, საქართველოდან გამოგზავნეს ხელოვნური სუნთქვის 27 აპარატი. ეს არის სომხური თემის, ქართველი ბიზნესმენებისა და საზოგადო მოღვაწეების საჩუქარი, წერს aliq.ge. 

საქართველოში, წარმატებით ებრძვიან დაავადებას და მზად არიან დაეხმარონ მეზობელ ქვეყანას, რომელიც მძიმე მდგომარეობაში აღმოჩნდა.

რამდენიმე დღის წინ, საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა, ამირან გამყრელიძემ მზადყოფნა გამოთქვა, დაეხმაროს სომხეთს კორონავირუსის წინააღმდეგ ბრძოლაში. სომხური მხარის ოფიციალური პასუხი ჯერჯერობით არ არსებობს.

რა ჩამოიტანეს უკვე საქართველოდან და კიდევ რა არის მოსალოდნელი  

7 ივნისს, ცნობილი გახდა, რომ საქართველოში მცხოვრები სომხების ინიციატივით ხელოვნური სუნთქვის 10 აპარატი შეიძინეს.

მომდევნო დღეებში, თბილისელმა სომხებმა, ქართველ ბიზნესმენებსა და საზოგადო მოღვაწეებთან ერთად, კიდევ 17 აპარატი შეიძინეს. საბოლოოდ, ხელოვნური სუნთქვის 27 აპარატი, საქართველოში სომხეთის საელჩოს შუამავლობით, რამდენიმე საათში, უკვე საქართველო-სომხეთის საზღვარზე აღმოჩნდა.

მათი დიდი ნაწილი ინფექციურ საავადმყოფო „ნორკში“ გაიგზავნა, რომელიც პანდემიის პირველი დღეებიდან მოყოლებული, კორონავირუსით ინფიცირებული პაციენტების მკურნალობით არის დაკავებული. აპარატების მეორე ნაწილი რეგიონულ კლინიკებს მიაწოდეს.

დახმარების ერთ-ერთი ინიციატორის წინადადებით, დაიწყო თანხის შეგროვება სლოგანით – „ერთი ნიღაბი – ერთი სიცოცხლე“. მას უკვე შეუერთდნენ საქართველოში სომხური თემის წარმომადგენლები. მოგროვილი თანხით შეიძენენ ნიღბებს, რომლებსაც სომხეთში გაგზავნიან და გაჭირვებულ ოჯახებს დაურიგებენ.

საქართველოში, ამ დრომდე გრძელდება სომხეთის დასახმარებლად სახსრების შეგროვება. 

სომხეთის ჯანდაცვის მინისტრმა უკვე გადაიხადა მადლობა გაწეული დახმარებისთვის:

„ამ აპარატების დახმარებით, ჩვენი პაციენტები სუნთქავენ – ამ სიტყვის პირდაპირი და გადატანითი მნიშვნელობით“.

დახმარება ქართული ტექნოლოგიური კომპანიისგან 

საკუთარი დახმარება სომხეთს უკვე შესთავაზა ქართულმა ტექნოლოგიურმა კომპანია Edison Tech Solutions-მა. კომპანიამ განაცხადა, რომ მზად არიან ერევანს კორონავირუსთან ბრძოლის ფარგლებში დახმარების სახით მიაწოდონ ქართული წარმოების ხუთი სადეზინფექციო კაბინა.

„მზად ვართ, მაქსიმუმ ერთი კვირის ვადაში, მეზობელ ქვეყანაში გავგზავნოთ ხუთი კაბინა. სადეზინფექციო კაბინების დამონტაჟება შეიძლება საზოგადოებრივ ადგილებში, მაგალითად, საქართველოში, ერთ-ერთი დგას ავტოსადგურ ოკრიბაში, გაგუას საავადმყოფოში და ა.შ. სომხეთს საკუთარი სურვილისამებრ შეუძლია მათი გამოყენება და დამონტაჟება, მაგალითად, საავადმყოფოებში, შიდა გავრცელების შესაჩერებლად. როგორც უკვე აღვნიშნე, ჩვენ მაქსიმუმ ერთ კვირაში მზად ვიქნებით, დანარჩენი დამოკიდებულია დროსა და სახელმწიფოთაშორის ფორმალურ პროცედურებზე“, – განაცხადა კომპანიის დამფუძნებელმა, გივი ბერიძემ.

ეს კაბინები, დაახლოებით, ერთი თვის წინ მიიღეს კორონავირუსის ინფექციის გავრცელების შესაჩერებლად. 

დახმარების სხვა რა შეთავაზებები მოვიდა საქართველოდან 

საქართველომ კორონავირუსის წინააღმდეგ ბრძოლის პროცესში დახმარება სომხეთს ჯერ კიდევ 2 ივნისს შესთავაზა.

საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ განაცხადა, რომ ქართველი ექიმები მზად არიან დაეხმარონ სომხეთს.

„ჩვენ ძალიან კარგი ურთიერთობები გვაქვს სომხეთის დაავადებათა ეროვნულ ცენტრთან და თუკი ჩვენს კოლეგებს სჭირდებათ, შესაძლებლობების ფარგლებში, მზად ვართ დავეხმაროთ.

დარწმუნებული ვარ, რომ საქართველოს ხელისუფლება, ჯანდაცვის სამინისტრო უარს არ იტყვის სომხეთის დახმარებაზე. გადაწყვეტილება – სჭირდებათ თუ არა დახმარება, სომხეთის ჯანდაცვის სამინისტრომ უნდა მიიღოს“, – განაცხადა გამყრელიძემ.

თუმცა, ქართული მხარის შეთავაზებაზე სომხეთიდან ოფიციალური პასუხი ან კომენტარი ჯერჯერობით არ გაკეთებულა.

ამის მიუხედავად, მეზობელ ქვეყანაში ამაზე არ გაჩერებულან. 4 ივნისს, იქ პეტიცია შეიქმნა საქართველოს ხელისუფლებისადმი მოწოდებით: 

„ვთხოვთ საქართველოს მთავრობას, განიხილოს მეზობელი ქვეყნის დახმარების შესაძლებლობა, ასეთ რთულ დროს. დახმარებაში ჩვენ ვგულისხმობთ სომხეთისთვის მათი პაციენტების საქართველოში მკურნალობის შეთავაზებას. მიგვაჩნია, რომ ეს იქნება სწორი ნაბიჯი, რათა დავეხმაროთ მეზობელ ქვეყანას და გადავჭრათ ეპიდემიოლოგიური ვითარება რეგიონში“. 

რას წერენ სოციალურ ქსელებში 

Facebook-ის სომხურ სეგმენტში, ადამიანები აქტიურად ავრცელებენ მიღებული ხელოვნური სუნთქვის აპარატების ფოტოსურათს და კომენტარს აკეთებენ მინისტრის განცხადებაზე.

აი, ზოგიერთი კომენტარი:

„როგორც სომხეთის მოქალაქე, უდიდეს მადლობას ვუხდი საქართველოში მცხოვრებ ჩვენს თანამემამულეებს და ასევე ქართველებს – იმ დახმარებისა და მხარდაჭერისთვის, რომელსაც ამ რთულ დღეებში გვიწევენ“.

„ამდენი თვის განმავლობაში, შეუძლებელი იყო ამ აპარატების შეძენა? მადლობა ღმერთს, რომ მართალია დაგვიანებით, მაგრამ არა გვიან, ჩვენ ეს აპარატები მოგვცეს. და ჩვენმა სპეციალისტებმა გაიგეს, რომ მათი დახმარებით, მოქალაქეები სუნთქავენ“.

„ძალიან მრცხვენია, რომ ვერ ვიზრუნეთ საკუთარ თავზე და ახლა გვეხმარებიან“.

„მადლობა მოძმე საქართველოს დახმარებისთვის!“.