სომხეთის ხელისუფლება საგანგებო მდგომარეობის რეჟიმს ამსუბუქებს

სომხეთში, საგანგებო მდგომარეობის კომენდატურამ უკვე მეორედ გააფართოვა იმ ბიზნესსექტორების სია, რომელთაც შეუძლიათ მუშაობას დაუბრუნდნენ. უქმდება რეგიონებს შორის ტრანსპორტის გადაადგილების შეზღუდვა.

მაგრამ კვლავინდებურად ძალაშია შეზღუდვა ადამიანების თავისუფლად გადაადგილებასა და საზოგადოებრივი ტრანსპორტის მუშაობაზე ქალაქებსა და სოფლებში.

მკაცრი შეზღუდვები 16 მარტს დაწესდა, როდესაც კორონავირუსის ეპიდემიის გამო, საგანგებო მდგომარეობა გამოცხადდა.

14 აპრილს, კომენდატურამ მუშაობის უფლება მისცა გადამამუშავებენ მრეწველობას, მშენებლებსა და ინჟინრებს.

ამის შემდეგ, სომხეთში ინფიცირებულთა რაოდენობა გაიზარდა და ქვეყნის სხვადასხვა რეგიონში, კარანტინზე ჩაკეტეს დასახლებული პუნქტები.

23 აპრილს, სომხეთში, კორონავირუსით ინფიცირებულთა რაოდენობა 50-ით გაიზარდა და საერთო ჯამში 1 523 შეადგინა. გამოჯანმრთელდა 659 ადამიანი. ეპიდემიის დაწყებიდან, ექიმებმა 24 პაციენტის გადარჩენა ვერ შეძლეს. მათ თანმდევი ქრონიკული დაავადებები აწუხებდათ.

ყველა დეტალი – რა შეზღუდვები მოიხსნება და რატომ, სად დაწესდა მკაცრი კარანტინი და რას ამბობს ჯანდაცვის მინისტრი.

ონლაინ-ოპერები, კონცერტები და ექიმების ცეკვები. როგორ ერთობიან სომხეთის მცხოვრებლები კარანტინში

სომხეთი: რამდენად დაზარალდება ბიზნესი კორონავირუსისგან და რა ელის ეკონომიკას საგანგებო მდგომარეობის შემდეგ?

რა შეზღუდვები მოიხსნა

უქმდება საკონტროლო-გამშვები პუნქტები სომხეთის ავტომაგისტრალებზე და შეზღუდვები რეგიონებს შორის გადაადგილებაზე.

ამის ნაცვლად, შეზღუდვები დაწესდება ცალკეულ ქალაქებსა და სოფლებში შესვლა-გასვლაზე, სადაც ინფექციის აფეთქება დაფიქსირდება.

ამის შესახებ, 23 აპრილს, მთავრობის სხდომაზე, საგანგებო მდგომარეობის კომენდატმა, ვიცე-პრემიერმა, ტიგრან ავინიანმა განაცხადა.

შეზღუდვები მოიხსნა ბიზნეს-საქმიანობის ნაწილზე: პოლიგრაფიულ წარმოებაზე, ქვების გადამუშავებაზე, მეტალოკონსტრუქციების წარმოებასა და მანქანების რემონტზე. ამუშავდება ორგანიზაციები, რომლებიც უძრავი ქონების ბაზართან არიან დაკავშირებული. გარკვეული შეზღუდვებით დაიწყებს მუშაობას მობილური ოპერატორებისა და ინტერნეტ-პროვაიდერების მომსახურების ოფისები.

ათი დღის წინ, უკვე მიეცა მუშაობის უფლება გადამამუშავებელი ინდუსტრიას. დაიშვა თამბაქოს, ბეტონის, თაბაშირისა და მეტალოკონსტრუქციების წარმოება, ამუშავდა საწარმოები, რომლებიც მათ ნაწილებით ამარაგებს. დროებით შეჩერებული ბიზნესის სიიდან ამოიღეს სამშენებლო სექტორი.

კომენდატი არ გამორიცხავს, რომ კიდევ უფრო გაფართოვდეს იმ სექტორების სია, რომელში დასაქმებული ადამიანებიც სამსახურში დაბრუნებას შეძლებენ.

რატომ აძლევენ ბიზნესს მუშაობის უფლებას

ეს ნათელი ხდება ფინანსთა მინისტრის, ატომ ჯანჯუღაზიანის სიტყვებიდან:

„ვირუსის წინააღმდეგ ბრძოლის ფარგლებში დაწესებულმა შეზღუდვებმა, შესაძლოა, ნეგატიური გავლენა მოახდინოს მშპ-ის რეალურ ზრდაზე – 2-2.4%-მდე“, – განაცხადა მან.

ხელისუფლება ვარაუდობს, რომ წელი მინუს 2-პროცენტიანი ეკონომიკური ვარდნით დასრულდება და შედეგების კომპენსირებისთვის, მილიარდნახევრიანი სესხის მოზიდვის იმედი აქვს.

 „მოსალოდნელი მშპ-ის გათვალისწინებით, სახელმწიფო ვალი გაიზრდება 60%-მდე, იმ დროს, როდესაც 2019 წელს, სახელმწიფო ვალი შეადგენდა მშპ-ის 50%-ს“, – ამბობს ფინანსთა მინისტრი.

კარანტინი რეგიონებში

კომენდატურის მიერ საგანგებო მდგომარეობის შემსუბუქების მეორე დღეს, გავრცელდა ინფორმაცია კარანტინზე არარატის პროვინციის სოფელ ნორაშენის დაკეტვის შესახებ.

სომხეთის კიდევ ერთ რეგიონში, შირაკის პროვინციაში, ქალაქ მარალიკის საავადმყოფოში, კორონავირუსით დაინფიცირდა ერთდროულად ექვსი მედიკოსი.

18 აპრილს, კომენდატის გადაწყვეტილებით, მარალიკსა და სოფელ ძორაკაპში, კარანტინის რეჟიმი გამოცხადდა, რომელიც 25 აპრილამდე გაგრძელდება.

გეღარქუნიქის პროვინციაში, სადაც 11 აპრილამდე, კორონავირუსის არც ერთი შემთხვევა არ დაფიქსირებულა, ახლა 47 ინფიცირებული ჰყავთ. ამასთან, ადგილობრივი გუბერნატორის განცხადებით, 12 მათგანი – საავადმყოფოს თანამშრომელია, 9 – პოლიკლინიკის.

გეღარქუნიქის პროვინციაში, კორონავირუსის ინფექციის გავრცელების კერად, ქალაქი ვარდენისი გამოცხადდა. კომენდატურამ იქ შესვლასა და გასვლაზე შეზღუდვების 28 აპრილამდე დააწესა.

ყველა დასახლებაში, სადაც კარანტინია შემოღებული, დამონტაჟებულია საკონტროლო-გამშვები პუნქტები.

რას ამბობს ჯანდაცვის მინისტრი

მინისტრს მიაჩნია, რომ ზოგიერთი ეკონომიკური საქმიანობის დაშვების გათვალისწინებით, უნდა გაგრძელდეს ყველა მოქმედება კორონავირუსის გავრცელების შესაჩერებლად:

„მოდუნების უფლება და სიფხიზლის დაკარგვის უფლება არ გვაქვს… საწოლების ხელმისაწვდომობის თვალსაზრისით, დატვირთვა არ გვაქვს – ჯერჯერობით საკმარისია მათი რაოდენობა… ჯერ კიდევ შეგვიძლია ყველას ჰოსპიტალიზაცია, ძალიან მსუბუქ პაციენტებს კი სასტუმროებში განვათავსებთ“, – განაცხადა მინისტრმა.

სულ საავადმყოფოებში ამ დროისთვის 840 ადამიანი მკურნალობს. 10 პაციენტის მდგომარეობა უკიდურესად მძიმეა:

„დაახლოებით 230-ს ფილტვების ანთება აქვს. ხელოვნურ სუნთქვაზეა 5 ადამიანი, ერთ-ერთი მათგანი ახალგაზრდა კაცია, 27 წლის, მაგრამ მას მძიმე ქრონიკული დაავადება აქვს. ექიმები ყველაფერს აკეთებენ სიტუაციის სტაბილიზაციისთვის და იმედი გვაქვს, რომ მას სიცოცხლეს შევუნარჩუნებთ“.