აფხაზეთში მილიციამ სცემა დეპუტატს, რომელიც დღესასწაულს ჰაერში სროლით აღნიშნავდა
აფხაზეთში მილიციამ, შინაგან საქმეთა მინისტრის მონაწილეობით, დეპუტატს სცემა. დაზარალებულის თანასოფლელები მინისტრის გადადგომას მოითხოვენ. მომხდარის გამო, დასვენების დღის მიუხედავად, მოიწვიეს პარლამენტის საგანგებო სხდომა.
დეპუტატი გარი კოკაია თანასოფლელებთან სოფელ აძიუბჟიდან – ქართულ-აფხაზური ომის ვეტერანებთან ერთად, სოხუმის სანაპიროზე რესტორან „რინაში“ გამარჯვებისა და დამოუკიდებლობის დღეს აღნიშნავდა. სუფრის შემდეგ, უკვე ქუჩაში მან სიხარულის გამოსახატავად პისტოლეტიდან რამდენჯერმე გაისროლა ჰაერში.
შესაძლოა, საზოგადოებრივი წესრიგის ამ, აფხაზური აღქმით, უმნიშვნელო დარღვევას შეუმჩნევლად ჩაევლო, რომ არა ერთი გარემოება – ამ ადგილიდან ას მეტრში, სოხუმის მეორე რესტორან „დოლჩე ვიტაში“, დღესასწაულს აღნიშნავდნენ აფხაზეთის პრეზიდენტი ასლან ბჟანია და მისი კოლეგა სამხრეთ ოსეთიდან, ანატოლი ბიბილოვი.
- აფხაზეთში პოლიციის მიერ დაკავებული 25 წლის ახალგაზრდის დაღუპვის გამოძიებას მოითხოვენ
- “ახლა უნდა მოგკლათ” – აფხაზეთში რუსი ტურისტი აწამეს
- იარაღი როგორც კულტურა. აფხაზეთის მოსახლეობას თავდაცვის უფლება მისცეს
ამის გამო, ჰაერში სროლა შეუმჩნეველი ვერ დარჩებოდა. შემთხვევის ადგილზე მაშინვე გაჩნდა შინაგან საქმეთა მინისტრი დმიტრი დბარი და განგაშის პასუხად გამოცხადდა სპეცრაზმი.
როგორც დბარი ამტკიცებს, დაინახა რა, რომ კოკაია არაფხიზელ მდგომარეობაში იმყოფებოდა, მან სთხოვა დეპუტატს, იარაღი ჩაებარებინა, რაზეც მან უარი თქვა. ამის შემდეგ მილიციონერებმა გადაწყვიტეს, იარაღი ძალით წაერთმიათ, საბოლოოდ, კოკაიას და რამდენიმე ვეტერანს სცემეს, მათ სამედიცინო ჩარევა დასჭირდათ.
მეორე დღეს სოფელ აძიუჟბის მცხოვრებლები შეიკრიბნენ და პრეზიდენტსა და პარლამენტს მიმართეს, „გამოუსწორებელი შედეგების თავიდან ასაცილებლად“, დაუყოვნებლივ გადააყენონ დაკავებული თანამდებობიდან შინაგან საქმეთა მინისტრი დმიტრი დბარი და დეპუტტისა და ომის ვეტერანების ცემის ყველა მონაწილე. ასევე – დააკავონ ისინი „მათივე უსაფრთხოებისათვის“.
რამდენიმე საათის შემდეგ თავის საგანგებო სხდომაზე შეიკრიბა პარლამენტი, მის კედლებთან კი სახალხო კრების გადაწყვეტილების მოლოდინში ასამდე აძიუჟბელმა მოიყარა თავი.
პარლამენტის საგანგებო სხდომა სამ საათზე მეტხანს გაგრძელდა. მომზადდა დადგენილების პროექტის ტექსტი, რომლის შესაბამისად, გენერალურ პროკურორ ადგურ აგრბას, სახელმწიფო უსაფრთხოების სამსახურის თავმჯდომარე რობერტ კიუტთან ერთად, 7 ოქტომბრამდე უნდა ჩაეტარებინათ საგამოძიებო მოქმედებები ინციდენტის ფაქტზე.
ამას გარდა, პრეზიდენტ ბჟანიას მიმართავდნენ წინადადებით, საგამოძიებო მოქმედებების განმავლობაში თანამდებობიდან გადაეყენებინა შინაგან საქმეთა მინისტრი დმიტრი დბარი და ინციდენტთან დაკავშირებული შსს-ს ყველა თანამშრომელი.
თუმცა, დადგენილების პროექტმა ხმების საჭირო რაოდენობა ვერ დააგროვა. 21 დეპუტატიდან მას მხარი დაუჭირა 17-მა, წინააღმდეგი იყო ორი, ორმა თავი შეიკავა. დააკლდა მხოლოდ ერთი ხმა – დადგენილების მიღებას 18 ხმა სჭირდებოდა.
სხდომის შედეგებმა არ დააკმაყოფილა პარლამენტის კედლებთან შეკრებილი აძიუბჟელები. ისინი მხოლოდ მას შემდეგ დაიშალნენ, როდესაც მათთან პარლამენტის სპიკერი ვალერი კვარჩია გავიდა და შეჰპირდა, რომ სიტუაციის განხილვა ორშაბათს გაგრძელდებოდა. მათ განზრახული აქვთ, ახალი სხდომისთვის დაბრუნდნენ.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
