სერგეი შამბა: თუ საქართველო ბოდიშს მოიხდის, ეს შეიძლება იყოს პირველი ნაბიჯი შერიგებისკენ
საქართველო აფხაზებს ბოდიშს მოუხდის
ჟენევის დისკუსიების მორიგი რაუნდის წინ, აფხაზეთის ე.წ. საგარეო საქმეთა მინისტრმა სერგეი შამბამ განაცხადა, რომ საქართველოს მხრიდან ბოდიშის მოხდა ხელს შეუწყობს ქართულ-აფხაზური კონფლიქტის დარეგულირებას.
სოხუმში ჟენევის დისკუსიების თანათავმჯდომარეებთან შეხვედრისას შამბამ აღნიშნა მმართველი პარტია “ქართული ოცნების“ დამფუძნებლის, ბიძინა ივანიშვილის ბოლო განცხადება, რომ საქართველოს მთავრობა აპირებს ოსებს ბოდიში მოუხადოს 2008 წლის ომის გამო. შამბას თქმით, თუ თბილისმა იგივე გააკეთა აფხაზების მიმართ და ბოდიში მოიხადა 1992-93 წლების აფხაზეთის ომის დაწყებისთვის, ეს შეიძლება იყოს პირველი ნაბიჯი შერიგებისკენ.
- მოიხდის თუ არა საქართველო ბოდიშს აფხაზეთთან ომის გამო? ასტამურ ტანიას და ინალ ხაშიგის დისკუსია
- ივანიშვილის შემდეგი ნაბიჯი უნდა იყოს ბოდიშის მოხდა აფხაზებისთვის. მოსაზრება
კიდევ ერთი ნაბიჯი, რომელიც კონფლიქტის მოგვარებას შეუწყობს ხელს, მინისტრის თქმით, შეიძლება იყოს საქართველოს უარი ისეთი ტერმინოლოგიის გამოყენებაზე, როგორიცაა “ოკუპირებული ტერიტორიები“.
მაგრამ რაც შეეხება თეზისს, რომელიც ბოლო თვეებში ვრცელდებოდა აფხაზეთის საქართველოს შემადგენლობაში დაბრუნების “რაღაც მშვიდობიანი” ვარიანტის შესახებ, შამბამ განაცხადა, რომ “აფხაზეთის პოლიტიკური სტატუსი არანაირ განხილვას არ ექვემდებარება“.
ამავე შეხვედრისას სერგეი შამბამ ხაზგასმით აღნიშნა, რომ დღეს ჟენევის დისკუსიები ერთადერთი პლატფორმაა, სადაც შეიძლება “ამ დონეზე არსებულ პრობლემებზე საუბარი“.
შამბას თქმით, აფხაზური მხარის დღის წესრიგში ერთ-ერთი ყველაზე მნიშვნელოვანი საკითხია საომარი მოქმედებების არ განახლება და სამშვიდობო ხელშეკრულების გაფორმება.
ამასთან, მან არც ერთი სიტყვა არ თქვა ჟენევიდან დისკუსიების სხვა, “უფრო ნეიტრალურ ადგილზე“ გადატანის აუცილებლობაზე, რასაც რეგულარულად აცხადებდა მისი წინამორბედი, სამინისტროს ყოფილი ხელმძღვანელი ინალ არძინბა. “
“უფრო ნეიტრალურ ადგილში“ არძინბა მინსკს გულისხმობდა.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
