საქართველოში ქალები საოჯახო საქმეს ხუთჯერ მეტ დროს ანდომებენ, ვიდრე კაცები - საქსტატი
საქართველოში ქალები საოჯახო საქმეს ხუთჯერ მეტ დროს ანდომებენ, ვიდრე კაცები
საქსტატის ახალი კვლევის მიხედვით, რომელიც საქართველოს მოსახლეობის მიერ დროის გამოყენებას ეხება, ქალები აუნაზღაურებელ საოჯახო შრომას – დალაგებას, სადილის მომზადებას, სარეცხის გარეცხვას და ა.შ. თითქმის ხუთჯერ მეტ დროს უთმობენ, ვიდრე კაცები. ბავშვის აღზრდაში კი დედების 80% და მამების 38.6%-ია ჩართული.
ამავდროულად, დედები ბავშვის მოვლას 5-ჯერ მეტ დროს, კვირაში 20.4 საათს უთმობენ, მამები კი – კვირაში 3.9 საათს.
საქსტატმა კვლევა გაეროს ქალთა ორგანიზაციის (UN Women) მხარდაჭერით ჩაატარა. ორგანიზაციის ცნობით, კვლევის შედეგები ადასტურებს, რომ საქართველოში ოჯახებში ზრუნვის პასუხისმგებლობების უდიდესი ნაწილი ქალების მხრებზე გადადის.
ეს მათ არა მხოლოდ დასაქმებისა და კარიერული წინსვლის შესაძლებლობებს უზღუდავს, ასევე, უზღუდავს დროს სწავლის, სოციალიზაციის, პირადი თუ პროფესიული განვითარებისა და თვითზრუნვისთვის.
აღსანიშნავია, რომ საქართველოში აუნაზღაურებელი ზრუნვისა და საოჯახო შრომაზე ქალების მიერ დახარჯული დროის წილი (17.8 %) 4.8-ჯერ მეტია კაცების მიერ დახარჯულ დროზე (3.7 %).
გამოკვლევის ფარგლებში სულ ქვეყნის მასშტაბით 3.680 შინამეურნეობა შეირჩა და 6.074 რესპონდენტი გამოიკითხა.
ამასთან ერთად სრულიად განსხვავებულია დასაქმებისა და მასთან დაკავშირებული აქტივობების შემთხვევებიც – კაცების მიერ დახარჯული საშუალო დრო 1.9-ჯერ აღემატება ქალების ამავე მაჩვენებელს.
● PMCG: საქართველოს მოსახლეობის 23 პროცენტი ემიგრაციაშია წასული
● “დედა თითქოს პატარა გოგო იყო, ასე გრძნობდა თავს”. როგორ ცხოვრობენ საქართველოში ადამიანები დემენციით
● “მეც შვილი ვარ”. როგორ იბრძვიან საქართველოში ქალები მშობლების მემკვიდრეობისთვის
საქსტატის მიერ საქართველოს მოსახლეობის მიერ დროის გამოყენების კვლევის შედეგების თანახმად, მოსახლეობა ყველაზე მეტ დროს, დღე-ღამეში საშუალოდ 11.7 საათს ხარჯავს საკუთარ თავზე ზრუნვასა და მოვლაზე, მათ შორის ძილზე.
ქვეყნის მოსახლეობა დასაქმებასა და მასთან დაკავშირებულ აქტივობებზე საშუალოდ 2.6 საათს ხარჯავს, თუმცა უშუალოდ დასაქმებულების მიერ დახარჯული საათების საშუალო მაჩვენებელი 8.2-ია. კვლევის თანახმად, მოსახლეობა დღის განმავლობაში ხარჯავს:
- 4.2 საათს – კულტურულ, დასვენების, სპორტულ და მასმედიასთან დაკავშირებულ აქტივობებზე;
- 2.1 საათს – შინამეურნეობისა და ოჯახის წევრებისთვის გაწეულ აუნაზღაურებელ საოჯახო მომსახურებაზე;
- 1.4 საათს – სოციალიზაციაზე, კომუნიკაციაზე, სათემო და რელიგიურ აქტივობებში მონაწილეობაზე;
- 0.9 საათს – საკუთარი საბოლოო მოხმარებისთვის პროდუქციის წარმოებაზე (უშუალო მონაწილეები საშუალოდ 3.1 საათს)
- 0.6 საათს – შინამეურნეობისა და ოჯახის წევრებისთვის გაწეულ აუნაზღაურებელ ზრუნვის მომსახურებაზე;
- 0.3 საათს – სწავლაზე;
- ხოლო 0.1 საათს – სტაჟირებაზე, მოხალისეობრივ და სხვა სახის აუნაზღაურებელ შრომაზე.
