საქართველოში კომენდანტის საათმა შესაძლოა გადაიწიოს
გაზიარება
გაზიარება
სოციალურ ქსელში კომენდანტის საათის გაუქმების მოთხოვნით მოქალაქეების პეტიცია გავრცელდა, რომელსაც უკვე 20 000-მდე მოქალაქე შეუერთდა. პეტიციის ინიციატორი ილიას სახელმწიფო უნივერსიტეტის ყოფილი რექტორი გიგი თევზაძეა.
პეტიციის ტექსტში ნათქვამია, რომ მნიშვნელოვანია, გაუქმდეს კომენდანტის საათი, მაგრამ გაძლიერდეს საგანმანათლებლო კამპანია, გაუმჯობესდეს რისკ-ჯგუფების მეთვალყურეობის ღონისძიებები და დაჩქარდეს საყოველთაო ვაქცინაცია.
აღნიშნულზე კომენტარი გააკეთა ჯანდაცვის მინისტრის მოადგილემ, თამარ გაბუნიამ და განაცხადა, რომ აქტიურად მიდის მსჯელობა კომენდანტის საათის გადაწევასთან დაკავშირებით.
“ჩვენ ძალიან აქტიურად ვადევნებთ თვალს მსოფლიო გამოცდილებას. სხვადასხვა ქვეყანაში, თუნდაც ამერიკაში დაიწყო საუბარი იმაზე, რომ ვაქცინირებული პირებისთვის პირბადის გარეშე ხდებოდეს გადაადგილება. ასევე საუბარია ღამის საათებში მოძრაობის შემსუბუქებასთან დაკავშირებით, ეს ყველაფერი არის ჯერ დამუშავების პროცესში…
აქტიური მსჯელობაა ღამით მოძრაობის შედარებით შემსუბუქებაზე, საუბარია დროის გადაწევაზე. ყველას გვესმის, რომ პიკის პერიოდში ამის რესურსი არ გაგვაჩნია”, – ამბობს გაბუნია.
მინისტრის მოადგილემ ისაუბრა პირბადეების მოხმარების შესახებაც და აღნიშნა, რომ რომ ამ შეზღუდვას ჯერ ვერ შეამსუბუქებენ.
“პირბადესთან დაკავშირებული შეზღუდვის შემსუბუქებას ჩვენ ჯერ კიდევ კარგა ხანს ვერ მოვახერხებთ, ეს პირდაპირ უკავშირდება ვაქცინირებულთა რაოდენობას. ჩვენ რაც არ უნდა ეფექტურად გადავლახოთ პიკი მაისის ბოლომდე, პირბადე თავდაცვის საშუალებაა”, – განაცხადა თამარ გაბუნიამ.
ე.წ კომენდანტის საათი საქართველოში 2020 წლის 9 ნოემბრიდან, უკვე ნახევარი წელია მოქმედებს. გამონაკლისის სახით, კომენდანტის საათი 2-ჯერ, ახალ წელსა და მართლმადიდებლური შობის ღამეს მოიხსნა.
ამასთან ერთად, ნელა მიმდინარეობს ვაქცინაციის პროცესიც. საქართველოში ვაქცინაციის პროცესის სერიოზულ დამაბრკოლებელ ფაქტორად იქცა პრეპარატების მიმართ უნდობლობა და ასევე ვაქცინაციის პროცესის მენეჯმენტი – ადამიანებს რამდენიმე ასეული კილომეტრის გავლა უწევთ იმისთვის, რომ აიცრან და ეს მაშინ, როდესაც ქვეყანაში რამდენიმე ათასი აუთვისებელი დოზა ვაქცინაა.
ქვეყანაში ამ დრომდე ოთხი ვაქცინაა შემოტანილი – გერმანულ-ამერიკული “ფაიზერი”, ბრიტანული “ასტრაზენეკა”, ჩინური “სინოფარმი” (პეკინი) და ჩინური “სინოვაკი”.
აქედან მხოლოდ ორს – “ფაიზერს” და “ასტრაზენეკას” ჰქონდა გავლილი ამ დრომდე მსოფლიო ჯანდაცვის ორგანიზაციის ავტორიზაცია, ხოლო “სინოფარმს” ჯანმომ ავტორიზაცია 6 მაისს მიანიჭა.