საქართველოში 29 800 ბავშვს სახლში წყლითა და საპნით ხელის დაბანის პირობები არა აქვს - UNICEF

გაეროს ბავშვთა ფონდის ინფორმაციით, ახალი კორონავირუსის პანდემიამ დიდი ზეგავლენა მოახდინა ბავშვებსა და მოზარდებზე. კორონავირუსის სწრაფად გავრცელებისადმი განსაკუთრებით დაუცველნი არიან ისეთ ოჯახებში მცხოვრები ბავშვები, სადაც სივიწროვეა ან არ არის სათანადო პირობები – ხელსაბანი და სხვა სანიტარიული კვანძები და საშუალებები. გაეროს ბავშვთა ფონდის კვლევის მიხედვით, საქართველოში 29 800 ბავშვს სახლში არ აქვს წყლითა და საპნით ხელის დაბანის პირობები. ასეთი ბავშვების კორონავირუსით დაინფიცირების რისკი საკმაოდ მაღალია.

გაეროს ბავშვთა ფონდი კიდევ ერთ გამოწვევაზე ამახვილებს ყურადღებას – კორონავირუსის პანდემიის გავრცელების თავიდან აცილების მიზნით 2  მარტიდან საქართველოს სკოლებში სასწავლო პროცესი შეწყდა. ბავშვების, მოზარდებისა და ახალგაზრდების ინტერნეტზე, თამაშისა და სწავლის შესაძლებლობებზე ხელმისაწვდომობას კი ხელს უშლის ხარისხიანი ინტერნეტის ნაკლებობა: საქართველოში 3-დან 17 წლამდე ასაკის 50 400 ბავშვს არ აქვს სახლში ინტერნეტი და კომპიუტერი. 

ელექტრონული ინსტრუმენტებისა და ინტერნეტის კავშირის, შინ სათანადო სასწავლო გარემოს და მშობლების მხარდაჭერის ნაკლებობის გამო ისედაც გარიყული ბავშვები ჩამორჩენის საფრთხის წინაშე იმყოფებიან. 

საგანგებო რეჟიმისა და კარანტინის შემოღებამ ზეგავლენა მოახდინა ბავშვების კეთილდღეობის მომსახურებებზე მთელი საქართველოს მასშტაბით – ბევრი ბავშვი ვერ იღებს აუცილებელ სამედიცინო მომსახურებას  და ბავშვთა დაცვის სერვისს. 

გაეროს ბავშვთა ფონდში აცხადებენ, რომ კორონავირუსის პანდემიის შედეგად შესაძლოა გაიზარდოს იმ ბავშვების რისკები, რომლებიც კრიზისამდეც დაუცველ მდგომარეობაში იმყოფებოდნენ. ეს ეხება ბავშვებს უკიდურესად ღატაკი ოჯახებიდან, ეთნიკური უმცირესობების წარმომადგენელ და შეზღუდული შესაძლებლობის მქონე ბავშვებს. 

 „ჩვენ უნდა უზრუნველვყოთ, რომ ბავშვებს და მათ ოჯახებს ჰქონდეთ წვდომა უსაფრთხო და  უვნებელ წყალსა და სანიტარულ პირობებზე, ინტერნეტზე, წიგნებსა და საგანმანათლებლო რესურსზე,“ – ამბობს ღასან ხალილი, გაეროს ბავშვთა ფონდის წარმომადგენელი საქართველოში. 

• “კამერა გამოვრთე, ვითომ ინტერნეტმა გაჭედა” – ბავშვები ჰყვებიან, როგორ სწავლობენ და ცელქობენ ონლაინ-გაკვეთილებზე

როგორ ცხოვრობენ ბავშვები საქართველოში

ბავშვთა სიღარიბე საქართველოში ერთ–ერთ მძიმე გამოწვევად რჩება. ერთ–ერთი ბოლო კვლევა, რომელიც საქართველოში ბავშვთა კეთილდღეობას ეხება, გაეროს ბავშვთა ფონდის მხარდაჭერით 2018 წელს ჩატარდა. კვლევა საქართველოში ბავშვთა კვებასთან, ნუტრიციულ სტატუსთან და ბავშვთა განვითარებასთან დაკავშირებულ მნიშვნელოვან ინფორმაციას მოიცავს. 

რა აჩვენა კვლევამ:

● 5 წლამდე ასაკის ბავშვების 64% მაღაზიაში ნაყიდი სათამაშოებით თამაშობს, 94% კი საოჯახო ნივთებით, მათ შორის სახლის გარეთ ნაპოვნი ნივთებით. 

● ბავშვების 12%-ს არა აქვს სათამაშო – ისინი თვითნაკეთი სათამაშოებით ერთობიან. 

● ბავშვების 44%-ს არ აქვს მინიმუმ 3 საბავშვო წიგნი.

● საქართველოში 5 წლამდე ბავშვების 6% ჭარბწონიანია. 

● ბავშვების 1%-ს აღენიშნება წონაში ზომიერად ან მკვეთრად გამოხატული გამოფიტვა

● ბავშვების 6% ზომიერად ან მკვეთრად ჩამორჩება სიმაღლეში, ხოლო ბავშვების 2%-ს აქვს ზომიერად ან მკვეთრად გამოხატული წონის დეფიციტი.

● ასაკობრივ ჭრილში მალნუტრიციის მონაცემები გვიჩვენებს, რომ ბავშვების ყველაზე დიდი წილი (10%) ჭარბწონიანია, მათი ასაკი 12-17 თვემდე მერყეობს. 

● ბავშვების 5%, რომლებსაც  წონის დეფიციტი და გამოფიტვა აღენიშნებათ, 0-5 თვის ასაკის არიან. 

● ბავშვების სიმაღლეში ჩამორჩენის პროცენტული მაჩვენებელი ყველაზე მაღალია (8%) 24-35 თვის ასაკის ბავშვებში.

კვლევაში საუბარია ბავშვთა კვებაზეც. 

● 6-23 თვის ასაკის ბავშვების ნახევარი საკვები პროდუქტების რეკომენდებული 8 ჯგუფიდან მხოლოდ 5 ჯგუფის საკვებს იღებს.

● მინიმალური კვების რაციონი გაცილებით მრავალფეროვანია ქალაქებში და ნაკლებად მრავალფეროვანი – სოფლად. 

● მინიმალური კვების რაციონის მრავალფეროვნების ყველაზე დაბალი მაჩვენებელი სამცხე-ჯავახეთის რეგიონში მცხოვრებ ბავშვებში აღინიშნა.