როგორი იყო საპარლამენტო არჩევნების დღე. ქრონიკა

აქ იკრიბებიან გაერთიანებული ოპოზიციის მხარდამჭერები, რათა ერთად, დიდ ეკრანზე უყურონ ეგზიტპოლების გამოცხადებას.

პარლამენტის მიმდებარე ტერიოტორიასთან პოლიციელთა დიდი რაოდენობაა მობილიზებული.

ფოტო: დავით ფიფია, JAMnews

“ძალიან მნიშვნელოვანია, რომ როდესაც ბიულეტენების დათვლა დაიწყება, ყველა პოლიტიკური პარტიის მხარდამჭერმა პატივი სცეს არჩევნებზე მომუშავე პირების მიერ გაწეულ საქმიანობას და მშვიდად მიიღონ ოფიციალური შედეგები“,- ამის შესახებ აშშ-ის ელჩმა საქართველოში კელი დეგნანმა განაცხადა.

„ძალიან მნიშვნელოვანია… მშვიდად მიიღონ ოფიციალური შედეგები და აჩვენონ, რომ ეს არჩევნები თავიდან ბოლომდე პასუხობს საერთაშორისო სტანდარტებს. საქართველომ აიღო ვალდებულება, დაიცვას ეუთოს ოდირის მიერ დაწესებული თავისუფალი და სამართლიანი არჩევნების საერთაშორისო სტანდარტები. საერთაშორისო საზოგადოება ამ სტანდარტების დაცვას აკვირდება, რადგან საქართველოს ამომრჩევლები იმსახურებენ, რომ ხმები თავისუფალი და სამართლიანი არჩევნების პირობებში მისცენ”,- განაცხადა ელჩმა.

ამერიკის შეერთებული შტატების საელჩოს არჩევნების დამკვირვებელთა ჯგუფები ადგილობრივ და საერთაშორისო დამკვირვებლებს შეუერთდნენ, რათა ხმის მიცემის პროცესს მთელ საქართველოში დააკვირდნენ.

ელჩი დეგნანი არჩევნებს მარნეულისა და მცხეთის საარჩევნო უბნებზე აკვირდებოდა.

TI-ის ხელმძღვანელის, ეკა გიგაურის განცხადებით, დღის მეორე ნახევარში დაფიქსირდა 130-მდე წვრილი და შედარებით სერიოზული დარღვევა.

ორგანიზაციის აღმასრულებელი დირექტორის, ეკა გიგაურის თქმით, 2018 წლის საპრეზიდენტო და 2016 წლის საპარლამენტო არჩევნებთან შედარებით შეინიშნება დარღვევების უფრო დიდი რაოდენობა.

● ფიზიკური დაპირისპირება და ჟურნალისტის საქმიანობისთვის ხელის შეშლა,

● ჟურნალისტზე თავდასხმა 

● დამკვირვებლების გამოძევება

● კენჭისყრის ფარულობის დარღვევა და სხვა

ამერიკელი კონგრესმენი, აშშ-ს კონგრესის წარმომადგენლობითი პალატის საქართველოსთან თანამშრომლობის ჯგუფის თანათავმჯდომარე ადამ კინზინგერი საქართველოში მიმდინარე საპარლამენტო არჩევნებს საკუთარ Twitter-ზე ეხმაურება:

“ვაკვირდები ჩვენი მოკავშირის, საქართველოს არჩევნებს. მოვუწოდებ ყველას მისცენ ხმა, შეინარჩუნონ სიმშვიდე, დაე იმუშავოს პროცესმა. თავისუფალ და სამართლიან არჩევნებში არ არის გაყალბების, დაშინების ან ხმების მოსყიდვის ადგილი. ჩვენი ქვეყნები ძლიერები და ერთიანები არიან და ამერიკას საქართველოს იმედი აქვს”. -წერს ის.

There’s a lot of news & misinformation out there on #COVID19 & it can be really overwhelming. To help, I’ve made a #coronavirus resource page on my website & will continue to share important updates. We are #InItTogether & we WILL get through this. https://t.co/QQgz4fdidl

— Adam Kinzinger (@RepKinzinger) April 3, 2020

ცესკოს ინფორმაციით, 17:00 საათზე ამომრჩევლის აქტივობა 45.77 პროცენტია.

ხმა მისცა 1 607 530-მა ადამიანმა.

2016 წელს, იმავე დროს ამომრჩეველთა აქტივობა 42.04% იყო. 2012 წელს 17:00 საათისთვის კი აქტივობა იყო – 53.03%.

თითქმის ყველა საარჩევნო უბანთან რიგებია.

გლდანის 79-ე უბანთან “პუბლიკას” ჟურნალისტის თავდასხმაზე გამოძიება სისხლის სამართლის კოდექსის 187-ე მუხლით დაიწყო.

ეს მუხლი ნივთის დაზიანებას ან განადგურებას გულისხმობს.

ჟურნალისტი, მინდია გაბაძე იღებდა მოქალაქეს, რომელიც იგინებოდა და აგრესიულად შეურაცხმყოფელი სიტყვებით მიმართავდა ჟურნალისტებს. პუბლიკაში ამბობენ, რომ ამ ყველაფრის გადაღების დროს აგრესიულად განწყობილმა პირმა მას ფეხი დაარტყა, რა დროსაც ტელეფონი დაზიანდა.

სახალხო დამცველის ინფორმაციით, ქსნის #15 პენიტენციურ დაწესებულებაში ომბუდსმენის ოფისის წარმომადგენლებს, აგრესიულმა პატიმრებმა  ხმის მიცემის პროცესზე დაკვირვების საშუალება არ მისცეს და თავს დაესხნენ.

ნინო ლომჯარია სპეციალურ განცხადებას ავრცელებს, სადაც ციხეებში კრიმინალური სამყაროს გავლენებზე საუბრობს.

სახალხო დამცველის წარმომადგენლები დღეს იმყოფებოდნენ ციხეში და აკვირდებოდნენ იქ მიმდინარე საარჩევნო პროცესს. ასევე ესაუბრებოდნენ ცალკე ესაუბრებოდნენ თითოეულ პატიმარს, რომ გაერკვიათ მათი ზოგადი მდგომარეობა და ასევე, რაიმე ზეწოლას ხომ არ ჰქონდა ადგილი მათ თავისუფალ არჩევანზე.

ამ დროს,  “მათ მიუახლოვდა ორი მსჯავრდებული და ხმამაღალი ტონით, სხვა მსჯავრდებულების გასაგონად უთხრეს, რომ პენიტენციურ სისტემაში 2012 წლის შემდეგ ყველაფერი კარგად იყო და არაფერი შესამოწმებელი არ იყო”.

ტვ პირველის ჟურნალისტი გადმოსცემს, რომ მარნეულში პოლიციის დამატებითი ძალებია მობილიზებული.

შინაგან საქმეთა სამინისტროს საპატრულო პოლიციის დეპარტამენტის დირექტორის ვაჟა სირაძის განცხადებით, გლდანში, 79-ე და 80-ე საარჩევნო უბნებზე მომხდარი დაპირისპირებისას სამართალდამცველებმა 5 პირი დააკავეს.

ჩუგოშვილი თავის ფეისბუკზე ეხმიანება ე.წ. “ძველი ბიჭების” ყოფნას გლდანში საარჩევნო უბნებთან.

“ნაციონალს არა აქვს უფლება აქ იდგეს. ეს ჩემი უბანია, წავიდეს აქედან სისხლიანი ნაციონალი, დამთავრდა მიშა,” – ამ სიტყვებით შეაწყვეტინეს საუბარი “ნაციონალური მოძრაობის” წევრს სალომე სამადაშვილს უცნობმა პირებმა. სამადაშვილი კომენტარს აძლევდა ჟურნალისტებს გლდანის #39 უბანთან, სადაც ხალხმრავლობაა და არეულობა.

“რატომ იდექით მთელი დღე 39 უბანზე?” – კითხა ტვ პირველის ჟურნალისტმა იქ მყოფ პირებს, რომლებიც აგრესიულობით გამოირჩეოდნენ.
“არანაირი მორალური უფლება არა აქვთ, რომ აქ იყვნენ “ნაციონალები”. ჩემი უბანია აქ და ჭვიანად იყავით,” – დაიმუქრა ერთ-ერთი.

მათ არ უარყვეს, რომ მთელი დღე იდგნენ საარჩევნო უბანთან.

გლდანში სიტუაცია უკიდურესად დაძაბულია.

საქართველოს ექს-პრეზიდენტმა მიხეილ სააკაშვილმა, რომელიც კიევშია, მიმართა მხარდამჭერებს და უთხრა, რომ ყველაფერი მიდის “სუპერ” და “გეგმის მიხედვით”.

მისი თქმით, “არასოდეს ასეთი დაბალი სულისკვეთება არ ჰქონია” ხელისუფლებას  და ისინი “შეეცდებიან ძალადობის აქტებს”.

“ეს სიტუაცია მახსენებს ასლან აბაძიძის ბოლო ჟამს,” – აღნიშნა სააკაშვილმა.

მისი თქმით, ოპპოზიციის მხარდამჭერებმა უნდა შეინარჩუნონ სიმშვიდე, ორგანიზებულობა და ბოლომდე მშვიდობიანი შეტევა განახორციელონ ხელისუფლების მშვიდობინანად გადასაცემად.

კადრებში ჩანს ფიზიკური დაპირისპირება ოპოზიციის და ხელისუფლების მხარდამჭერებს შორის.

პოლიციამ დააკავა რამდენიმე ადანმიანი. მათ შორის ირაკლი ეძგვერაძე – ნიკა მელიას შტაბის წევრი. მელია გლდანის მაჟორიტარობის კანდიდატია გაერთიანებული ოპოზიციიდან.

უბანთან ბევრი ხალხია.

ცენტრალური საარჩევნო კომისიის ცნობით, 15:00 საათისთვის მთელი საქართველოს მასშტაბით ხმა 1 279 947 მოქალაქემ მისცა, რაც საერთო რაოდენობის 36.45 პროცენტია.

ეს თითქმის ორი პროცენტით მეტია, ვიდრე 2016 წლის საპარლამენტო არჩევნების დროს 15:00 საათისთვის იყო, და  თუმცა, თითქმის 9 პროცენტით ნაკლებია, ვიდრე 2012 წლის საპარლამენტო არჩევნების დროს იყო. 2012 წელს დღის სამი საათისთვის  44.99 პროცენტიანი აქტივობა იყო.

რაც შეეხება საპრეზიდენტო არჩევნებს, პირველი ტურის დროს 15:00 საათისთვის ამომრჩევლის აქტიურობა 30.98% იყო, მეორე ტურის დროს კი 38.8%.

დღის განმავლობაში ჟურნალისტებმა და კამერებმა დააფიქსირეს არაერთი შემთხევა, როდესაც საარჩევნო უბნებთან დგანან ე.წ. “ძველი ბიჭები”, კრიმინალური ავტორიტეტები. ისინი ამომრჩევლის დაშინებას და მათზე კონტროლს ცდილობენ.

“ნაციონალური მოძრაობის” წარმომადგენელი დიმიტრი შაშკინი არჩევნებზე იარაღით მივიდა. შაშკინი ბოლნისში იმყოფება და ჟურნალისტებმა გადაიღეს, რომ იარაღი აქვს.

შაშკინს, რომელიც თავდაცვის ყოფილი მინისტრია, აქვს იარაღის ტარების უფლება, თუმცა რაში დასჭირდა მას არჩევნების დღეს იარაღით გადაადგილება, გაუგებარია.

“მე მაქვს უფლება მონიჭებული შინაგან საქმეთა სამინისტროს მიერ, რომ ვატარო ჩემი პირადი კუთვნილი იარაღი”, — განაცხადა შაშკინმა რუსთავი 2-ზე.

“წარმოუდგენელი გოიმობა” უწოდა ამ ფაქტს მამუკა მდინარაძემ.

საქართველოს ახალგაზრდა იურისტთა ასოციაციის თავმჯდომარის სულხან  სალაძის განცხადებით, არჩევნების დღეს პოლიტიკური პარტიის წარმომადგენლის იარაღით გადაადგილება მიზანშეწონილი არ არის და არ აქვს მნიშვნელობა, აქვს თუ არა ამ ადამიანს იარაღის ტარების უფლება.

არასამთავრობო ორგანიზაცია სამართლიანი არჩევნებისა და დემოკრატიის საერთაშორისო საზოგადოება (ISFED) აცხადებს, რომ ორგანიზაციის დამკვირვებელმა რუსთავის #1 საარჩევნო უბანზე სათვალთვალო კამერა დააფიქსირა.

ვიდეოკამერის სიახლოვეს საარჩევნო კაბინა იდგა ისე, რომ შესაძლებელი იყო კაბინაზე დაკვირვება.

ISFED-ის ცნობით, უბანზე მყოფი დამკვირვებლების მითითების შედეგად, კაბინა სხვა ადგილას გადაიტანეს.

დღეს ბევრი ამომრჩეველი მართლა საკუთარი პასტით იყო მისული არჩევნებზე. თუმცა, უბნებზე ყველა ამომრჩევლისთვის ცალკე პასტა აქვთ – ვირუსის გავრცელების თავიდან ასაცილებლად.

მამუკა ხაზარაძეს საარჩევნო ურნა კლინიკაში მიუტანეს.

ერთ-ერთმა ამომრჩეველმა ფეისბუკზე საკუთარი საარჩევნო ბიულეტენი გააზიარა. ვისაც არ ახსოვს (თუ არიან ასეთები), ბადრი ესებუა არის ზუგდიდის ბანკზე თავდამსხმელი, რომელიც ნახევარი მილიონი დოლარით გაიქცა და უკვე ათ დღეზე მეტია მას პოლიცია ვერ პოულობს.

არასამთავრობო ორგანიზაცია “მმართველობის მონიტორინგის ცენტრის” დამკვირვებელმა ჭიათურის ერთ-ერთ საარჩევნო უბანზე კონიაკი “ჰენესი” აღმოაჩინა

ამ საპარლამენტო არჩევნბებზე ეგზიტპოლების ცვენაა.

ყველა ეგზიტპოლის შედეგი 20:00 საათზე იქნება ცნობილი.

აქ ჩამოვთვლით ვინ ატარებს ეგზიტპოლებს და სად შეიძლება მათი ნახვა.

სულ ოთხი ეგზიტპოლი და ერთი პარალელური დათვლაა.

ეგზიტპოლი ექნება ორ დამოუკიდებელ ოპოზიციურ არხს

1.  ტელეკომპანია ფორმულა – ამ  არხის დაკვეთის ეგზიტპოლს გამოცდილი ამერიკულ კომპანია Edison Research ატარებს.

2. მთავარი არხისთვის ეგზიტპოლებს ატარებს ფრანგული კომპანია IPSOS.

ასევე ორ ხელისუფლების მიმართ ლოიალურ არხს:

3. რუსთავი 2-სთვის ეგზიტპოლებს ბრიტანული კვლევითი კომპანია Survation-ი ატარებს.

4. ტელეკომპანია იმედის დაკვეთით კი ეგზიტპოლებს ამერიკული კომპანია Public Opinion Strategies ატარებს.

5. ასევე, არჩევნების დღეს ხმებს პარალელურად ითვლის არასამთავრობო ორგანიზაცია სამართლიანი არჩევნებისა და დემოკრატიის საერთაშორისო საზოგადოებაც (ISFED).

გაერთიანებული ოპოზიცია 19:00 საათზე პარლამენტის წინ შეკრებისკენ მოუწოდებს თავის მხარდამჭერებს. აქ ამონტაჟებენ დიდ ეკრანს და დინამიკებს, რომ ერთად გაიგონ 20:00 საათზე ეგზიტპოლების შედეგები.

ავღანეთში, “მტკიცე მხარდაჭერის” მისიაში მონაწილე ქართველი მშვიდობისმყოფელები საქართველოს საპარლამენტო არჩევნებში მონაწილეობენ.

12 საათისთვის ამომრჩეველთა აქტივობა 19.41 პროცენტია, რაც უფრო დაბალია, ვიდრე წინა ორ საპარლამენტო არჩევნებზე.

ეს იმას ნიშნავს, რომ ამ დროისთვის 681 583-მა ადამიანმა მისცა ხმა.

ყველაზე მაღალი აქტივობა კვლავ რაჭა-ლეჩხუმსა და სვანეთშია – 28 პროცენტი;

ყველაზე დაბალი კი, აჭარაში – 17.9 პროცენტი.

შედარებისთვის, გასულ საპარლამენტო არჩევნებზე 12 საათის მდგომარეობით ამომრჩეველთა საერთო აქტივობა 2016 წელს იყო 19.81 პროცენტი, 2012 წელს კი – 25.88 პროცენტი.

„საერთაშორისო გამჭვირვალობა – საქართველოს” ინფორმაციით, ამ დროისთვის 100-მდე წვრილი და შედარებით სერიოზული დარღვევა დაფიქსირდა. დამკვირვებლებმა ამ ეტაპზე დაწერეს 15 საჩივარი.

მნიშვნელოვან დარღვევებს შორისაა:

• დამკვირვებლების გამოძევება
• კენჭისყრის ფარულობის დარღვევა (გახსნილი ბიულეტინები და კამერები კაბინასთან ახლოს)
• წილისყრის პროცედურის დარღვევა
• ამომრჩევლის აღრიცხვა კენჭისყრის შენობაში
• საარჩევნო უბნების დაგვიანებით გახსნა
• არაუფლებამოსილი პირების უბანზე ან უბნის სიახლოვეს ყოფნა
• კოვიდუსაფრთხოების ნორმების დარღვევა
• მარკირების გარეშე ხმის მიცემა
• აგიტაცია საარჩევნო უბანზე
• საჩივრის ჩაბარებესთან დაკავშირებული პრობლემები

ცესკოს თავმჯდომარესთან თამარ ჟვანიასთან შეხვედრის შემდეგ ამერიკის შეერთებული შტატების ელჩმა კელი დეგნანმა განცხადება გააკეთა.

მან აღნიშნა, რომ აშშ-ს საელჩოს მიმდინარე არჩევნებზე 75-ზე მეტი წარმომადგენელი ჰყავს, რომლებიც სხვადასხვა უბანზე დააკვირდებიან პროცესს. ელჩმა საქართველოს მოქალაქეებს წესების სრული დაცვით არჩევნებში მონაწილეობისკენ მოუწოდა.

„ძალადობის და დაშინების ადგილი ამ არჩევნებზე არ არის და რა თქმა უნდა, ასეთ შემთხვევებს ყურადღებით დავაკვირდებით“, – აღნიშნა დეგნანმა ჟურნალისტებთან საუბრისას.

„ქართული ოცნების“ აღმასრულებელი მდივანი ირაკლი კობახიძე „ევროპული საქართველოს“ და „სტრატეგია აღმაშენებლის“ წარმომადგენლებს გადასატანი ყუთის გატაცების მცდელობაში ადანაშაულებს. მისი თქმით, შემთხვევა ბოლნისის 55-ე უბანზე მოხდა და ინციდენტში არზუმან ხასიევი “ევროპული საქართველოდან“ და ვაშაძის პარტიის კანდიდატი ელიმდარ მირიევი მონაწილეობდნენ.

კობახიძემ ასევე განაცხადა, რომ კონკრეტულ რაიონებში, მაგალითად ბოლნისში, შეინიშნება ზონდერჯგუფების მობილიზება.

„პისტოლეტით შეირაღებული დემოსტრაციულად გადაადგილდება დიმიტრი შაშკინი. ვაფრთხილებთ მათ, რომ დესტრუქციის ნებისმიერ მცდელობას კანონის მთელი სიმკაცრით გაეცემა პასუხი“, – აღნიშნა კობახიძემ.

მან პარტიის ოფისში გამართულ ბრიფინგზე შენიშნა, რომ ოპოზიციური პარტიების წარმომადგენლებმა საარჩევნო კომისიებში უარი განაცხადეს ფუნქციების გასანაწილებელ კენჭისყრებში მონაწილეობაზე.

ცესკო-მ დაადასტურა, რომ რამდენიმე საარჩევნო უბანზე ხმის მიცემის პროცესში ხარვეზები დაფიქსირდა.

მაგალითად, საბურთალოს ერთერთ უბანზე საარჩევნო ყუთს არ ჰქონდა ძირი. პრობლემა მოგვიანებით აღმოიფხვრა.

ასევე ხარვეზი იყო გურჯაანის 31-ე, ვაკის 54-ე და მარნეულის 47-ე უბნებზე, სადაც საარჩევნო ბიულეტენები იყო დაზიანებული და მათზე მოხეული იყო „ევროპული საქართველოს“ საარჩევნო ნომერი.

10 საათის მონაცემებით ამომრჩეველთა აქტივობა საქართველოს მთელ ტერიტორიაზე 8.33 პროცენტი იყო, რაც 292 ათას 587 ამომრჩეველია.

2018 წლის არჩევნებთან შედარებით ეს მონაცემი 2 პროცენტზე მეტია, მაშინ აქტივობა 10 საათისთვის 6.14 პროცენტი იყო.

ცესკო-ს ინფორმაციით, 10 საათისთვის ყველაზე მაღალი აქტივობა 31 ოქტომბერს მე-19 მაჟორიტარულ ოლქშია, რომელიც რაჭა-ლეჩხუმს და სვანეთს მოიცავს – 11.8 პროცენტი, ყველაზე დაბალი აქტივობა კი – აჭარის რეგიონში – 7.3 პროცენტი.

ამერიკის ელჩი საქართველოში კელი დეგნანი მარნეულში ჩავიდა და რამდენიმე საარჩევნო უბანში არჩევნების პროცესს გაეცნო.

“მოხარული ვარ, რომ ვიმყოფები მარნეულში, როგორც საარჩევნო დამკვირვებელი… სამართლიან არჩევნებში ადგილი არ უნდა ჰქონდეს ამომრჩეველთა დაშინებას, ხმათა მოსყიდვებს და სხვა რაიმე სახის იძულებას. ჩემი დაკვირვებით, არჩევნები მიმდინარეობს მშვიდ გარემოში და იმედი მაქვს, ასე გაგრძელდება. აუცილებლად, მიდით არჩევნებზე“.

სავარაუდოდ, ელჩმა მარნეული იმიტომ აირჩია, რომ აქ დილიდან ხმაურია – დარღვევებით მიმდინარეობს საარჩევნო პროცესი.

ზუგდიდში 89-ე საარჩევნო უბანზე 39-მა ამომრჩეველმა ვერ შეძლო ხმა მიეცა სასურველი პარტიისთვის. მიზეზი ისაა, რომ უბანზე მხოლოდ ერთი, მაჟორიტარი დეპუტატების კანდიდატების ბიულეტენები აქვთ.

“საჩივარი დაწერილია საოლქო საარჩევნო კომისიაშიც. ეს არ არის საჩივარი რაღაც პროცედურულ დარღვევაზე, ეს არის სისხლის სამართლის დანაშაული”, – განაცხადა ბესიკ დონაძემ, “ევროპული საქართველოს” დამკვირვებელმა.

უბნის თავმჯდომარე ზვიად კუტალია ადასტურებს, რომ ამომრჩევლის უფლება მის უბანზე დაირღვა, თუმცა ამბობს, რომ პრობლემა აღმოიფხვრა.

“მოხდა შეცდომა, რაც არცერთ რეგისტრატორს სამწუხაროდ არ შეუმჩნევია. ერთ-ერთმა ამომრჩეველმა თქვა და მას შემდეგ აღმოიფხვრა პრობლემა”, – განაცხადა ზვიად კუტალიამ.

თუმცა, იმ მომენტისთვის, როდესაც ხმის მიცემის სრულფასოვანი პროცესი აღდგა, ამომრჩევლები, რომელთაც არჩევანის უფლება შეეზღუდათ, უბანზე უკვე აღარ იყვნენ.

2012 წლის საპარლამენტო არჩევნები 1 ოქტომბერს გაიმართა.

არჩევნების შედეგები:“ქართული ოცნება” – 54.97“

ნაციონალური მოძრაობა” – 40. 34

ასე გამოიყურებოდნენ 8 წლის წინ ლიდერები:

დავით მძინარიშვილის ფოტოები, REUTERS

სადამკვირვებლო ორგანიზაციის სამოქალაქო პლატფორმა 2020-ის განცხადებით, მათ დამკვირვებელს, გიორგი მუმლაძეს ემჯუქრებოდნენ.

ორგანიზაციის ცნობით, მარნეულის ოლქის მე-5 უბანზე გიორგი მუმლაძეს მარნეულის საკრებულოში “ქართული ოცნების” დეპუტატი, ზურაბ ჭონიაშვილი დაემუქრა და უბნიდან ჟურნალისტებთან ერთად გასვლა მოსთხოვა.

პოლიციამ ამ ფაქტზე უკვე აღძრა საქმე.

ძირითადად, ეს არის პროცედურული დარღვევები.

საია-ს დამკვირვებლები ამბობენ, რომ ბევრი უბანი დროულად და მნიშვნელოვანი დარღვევების გარეშე გაიხსნა, თუმცა მიმდინარე არჩევნებზე გამოიკვეთა ერთი ნეგატიური ტენდენცია –  ძირითადად დარღვევები უკავშირდება უბანზე დამკვირვებლის არ დაშვებას და წილისყრასთან დაკავშირებულ პროცედურულ დარღვევებს. დაიწერა ათამდე საჩივარი.

შსს-ში გაიმართა საინფორმაციო ბრიფინგი.

მთავარი, რაც ბრიფინგზე ითქვა, ის იყო, რომ კენჭისყრა მიმდინარეობს მშვიდ ვითარებაში.

აქვე შეგახსენებთ, რომ გუშინ, 30 ოქტომბერს შსს-ში გამოძიება დაიწყო “ქართული ოცნების” აღმასრულებელი მდივნის, ირაკლი კობახიძის მიერ გაკეთებული განცხადების საფუძველზე, რომელიც “არჩევნების პერიოდში გარკვეული ოპოზიციური ძალების მიერ პროვოკაციების მოწყობას ეხება”, შინაგან საქმეთა სამინისტრომ ფაქტების შესწავლა დაიწყო.

შსს ცნობით, ჩატარდება ყველა საჭირო ღონისძიება, მათ შორის გამოკითხვები

საქართველოს პრემიერ-მინისტრი ოჯახთან ერთად მივიდა საარჩევნო უბანზე.

თუ ყველა წესს დაიცავთ – გეკეთებათ პირბადე (სასურველია სამედიცინო), დაიცავთ ორმეტრიან დისტანციას და გამოიყენებთ სანიტაიზერს, არჩევნების პროცესი უსაფრთხო იქნება.

დაავადებათა კონტროლის ცენტრის ხელმძღვანელი ამირან გამყრელიძე ამბობს, რომ საარჩევნო უბნებზე ისეა ეპიდსაწინააღმდეგო ღონისძიებები გათვლილი, რომ ინფიცირების რისკი მინიმალურია.

„ნუ შეგეშინდებათ, აუცილებელია არჩევნებზე მივიდეთ პირბადით,“-  ამბობს ის.

პირბადის მოხსნა საარჩევნო უბანზე მისულ ამომრჩეველს სულ ორჯერ უწევს – 10 წამით, მაშინ, როდესაც ამომრჩევლის იდენტიფიცირება ხდება. სხვა შემთხვევაში პირბადე არ მოიხსნათ!

კელი დეგნანმა ცესკოს-ში ჟურნალისტებთან კომენტარი ქართულ ენაზე გააკეთა:

“არჩევნები ძალიან მნიშვნელოვანია საქართველოსთვის. მთავარია მშვიდი ატმოსფერო და თავისუფალი არჩევანი.

კელი დეგნანმა თქვა, რომ დილით 9 საათზე ცესკოში იმიტომ მივიდა, რომ მადლობა ეთქვა საარჩევნო ადმინისტრაციისთვის კარგად შესრულებული სამუშაოს გამო.

“ჩვენ დავაკვირდებით ამ არჩევნებს. ამერიკის საელჩოდან 75 ადამიანი აკვირდება. ძალადობისა და დაშინების ადგილი არ უნდა დარჩეს,” – აღნიშნა ელჩმა.

დამოუკიდებელი საქართველოს პოლიტიკური პლაკატის ისტორია იწყება “მრგვალი მაგიდა – თავისუფალი საქართველოს” შავ-თეთრი პოსტერით. პოსტერზე პატარა გოგონაა გამოსახული, რომელსაც ხელში საქართველოს დროშა უჭირავს.

მარნეულში მე-5 საარჩევნო უბანზე რამდენიმე წუთით საარჩევნო პროცესი შეაჩერეს, რამაც დამკვირვებლების უკმაყოფილება გამოიწვია.

ამან გამოიწვია შეხლა-შემოხლა უბანზე.

ადგილზე მივიდა პოლიცია.

“ნაციონალური მოძრაობის” წარმომადგენელი ლაშა ქველაძე აცხადებს, რომ მათ დამკვირვებელს უფლებას არ აძლევენ, ამომრჩევლის რეგისტრაციას დააკვირდეს. საოლქო საარჩევნო კომისიის თავმჯდომარე ანა ილურიძე კი ამბობს, რომ უბანზე ხმაური ჟურნალისტებმა შექმნეს, რადგან უბანში ბევრი ჟურნალისტი მივიდა, რაც კომისიას მუშაობაში ხელს უშლის.

მარნეულში ბევრი ჟურნალისტის ყოფნა გასაკვირი არ არის. აქ, ტრადიციულად, ყველა არჩევნების დროს ცხელი წერტილია.

“შეიძლება ერთი წუთი წესიერება ამ ქვეყანაში?! ყვირილი დაამთავრეთ ახლა,” – უთხრა პრეზიდენტმა ჟურნალისტებს მას შემდეგ, რაც საარჩევნო უბანი დატოვა.

მან ხალხს მოუწოდა არჩევნებში მიიღონ მონაწილეობა.

“ჩვენ დღეს ხმას ვაძლევთ იმისთვის, რომ ავაშენოთ ის ქვეყანა, რომელზეც ყველანი ვოცნებობთ,” – თქვა მან.

ყოფილი პრემიერი არჩევნებზე მეუღლესთან და შვილთან – ბერასთან ერთად მივიდა.

საარჩევნო უბნის დატოვების შემდეგ ჟურნალისტებს უთხრა, რომ კოალიციას ის გამორიცხავს და მისი პროგნოზით “ქართული ოცნებას” საშუალოდ 100 მანდატი ექნება.
“პლუს მინუს ორი მანდატი,” – თქვა ივანიშვილმა.

ივანიშვილი ამბობს, რომ მოსახლეობის უმრავლესობას “ადამიანზე მორგებული ღირებულებები აქვს” და ამიტომ კვლავ “ქართული ოცნება” გაიმარჯვებს.

მოკლე პასუხი:

თუკი ვერც ერთი პოლიტიკური ძალა მთავრობის დაკომპლექტებისთვის საჭირო 76 მანდატს ვერ მოაგროვებს, მაშინ ქვეყანას, დიდი ალბათობით, კოალიციური მთავრობა ეყოლება.

უფრო ვრცლად დეტალები:

●  ახალი პარლამენტის შეკრების შემდეგ, ქვეყანას ახალი მთავრობა ეყოლება.

ძველი მთავრობა უფლებამოსილებას მოიხსნის და ახალი პრემიერ-მინისტრის დანიშვნამდე მოვალეობის შესრულებას გააგრძელებს.

●  პრემიერ-მინისტრობის კანდიდაქტს არჩევნებში საუკეთესო შედეგის მქონე პარტია ასახელებს. კონსტიტუციის მიხედვით, პარლამენტმა ორი კვირის ვადაში ნდობა უნდა გამოუცხადოს ახალ პრემიერს და მთავრობის წევრებს, რომლებსაც ის წარადგენს.

მთავრობის დასამტკიცებლად საჭიროა პარლამენტის სრული შემადგენლობის უმრავლესობის – სულ მცირე 76 დეპუტატის მხარდაჭერა.

●  იმ შემთხვევაში, თუ პარლამენტმა მთავრობას დადგენილ ვადაში ნდობა არ გამოუცხადა, მაშინ დადგება რიგგარეშე საპაროლამენტო არჩევნების საკითხი.

●  ახალი კანონმდებლობით, მთავრობის დაკომპლექტების უფლება აქვს პარტიას, რომელიც პროპორციულ არჩევნებში მინიმუმ 40.5 პროცენტს მიიღებს. თუ პარტიამ ამ პროცენტზე ნაკლები აიღო, მას ერთპიროვნულად მთავრობის ფორმირების უფლება არ აქვს იმ შემთხვევაშიც კი, ყველა მაჟორიტარული ოლქი რომ მოიგოს.

●  თუმცა, 40.5 პროცენტი ჯერ კიდევ არ ნიშნავს ისეთი უმრავლესობის მოპოვებას, რომელიც მთავრობის ფორმირებისთვის არის აუცილებელი. 40.5 პროცენტი პროპორციული სიით მხოლოდ 48 ადგილს უზრუნველყოფს, ხოლო, იმისთვის, რომ 150 დეპუტატიანმა პარლამენტმა მთავრობა დაამტკიცოს, საჭიროა უმრავლესობის მხარდაჭერა – 76 მანდატი. პარტიას დამატებით 28 მაჟორიტარული მანდატი დასჭირდება იმისთვის, რომ მთავრობა ჩამოაყალიბოს. ეს 28 მანდატი ან მაჟორიტარული ოლქებიდან უნდა მიიღოს ანაც სხვა რომელიმე პარტიასთან კოალიციაზე უნდა იფიქროს. ასეთ შემთხვევაში გვეყოლება კოალიციური მთავრობა – მთავრობა, რომელიც სხვადასხვა პოლიტიკური ძალის წარმომადგენლებისგან იქნება დაკომპლექებული.

საქართველოში დაიწყო კენჭისყრის პროცესი, რომელიც საღამოს 20:00 საათამდე გაგრძელდება.

● ქვეყანაში სულ 3 მილიონ 526 ათას 023 ამომრჩეველია. (ეს 2 635 ამომრჩევლით ნაკლებია, ვიდრე 2018 წლის საპარლამენტო არჩევნების მეორე ტურში. მაშინ 3 528 658 რეგისტრრებული ამომრჩეველი იყო).

● 150 პარლამენტში 120 დეპუტატი პროპორციული სიით აირჩევა, 30 – მაჟორიტარულით.

● საქართველოში სულ 30 საარჩევნო ოლქია ანუ 30 მაჟორიტარი იქნება პარლამენტში. ადრე მათი რიცხვი 73 იყო.

● არჩევნებში მონაწილეობს 50 საარჩევნო სუბიექტი –  48 პოლიტიკური პარტია და ორი საარჩევნო ბლოკი.

● ქვეყნის მასშტაბით 3 657 საარჩევნო უბანი, გამონაკლის შემთხვევაში შექმნილი 11 უბანი და კლინიკებსა და კარანტინსა და თვითიზოლაციაში მყოფი ამომრჩევლებისთვის  შექმნილი 127 სპეციალური უბანი გაიხსნა

● 52  საარჩევნო უბანი იქნება საზღვარგარეთ, 38 ქვეყანაში. მათ შორის 2 უბანი ავღანეთში.

● არჩევნებს დააკვირდება 132 ადგილობრივი დამკვირვებელი ორგანიზაციის 46 981 წაქრმომადგენელი და 910 უცხოელი დამკვირვებელი.

● საარჩევნო პროცესს გააშუქებს 118 მედიაორგანიზაციის 5 971 წარმომადგენელი.