პრეზიდენტის ინტერვიუ BBC-სთან: რუსულ საფრთხეებზე, სააკაშვილზე და აფხაზეთში რუსეთის პორტზე

სალომე ზურაბიშვილის ინტერვიუ BBC-სთან

იმაზე უნდა ვიფიქროთ, რუსეთს რა სურს, თუ ჩვენ რა გვსურს? – ყველას უნდა გვეშინოდეს, თუკი პუტინი უკრაინაში წარმატებას მიაღწევს, მაგრამ არ ვფიქრობ, რომ წარმატებას აღწევს – ის სამხედრო კუთხით ჯერ არ დამარცხებულა, მაგრამ გამარჯვებული არ არის – ამის შესახებ საქართველოს პრეზიდენტმა სალომე ზურაბიშვილმა BBC-სთან HARDtalk-ში ისაუბრა.

ასევე, საქართველოს პრეზიდენტს მიხეილ სააკაშვილთან დაკავშირებით კითხვა დაუსვეს. თუმცა პრეზიდენტი არ პასუხობს კითხვას სააკაშვილის შეწყალებაზე და საუბრობს მხოლოდ მის ექსტრადიციის შესაძლებლობაზე.

კითხვაზე, შესაძლოა, თუ არა უკრაინაში ომის ფონზე ოკუპირებული აფხაზეთის ტერიტორიაზე რუსეთის პორტის აშენებამ საქართველოს ომში ჩათრევა შეძლოს? – პრეზიდენტმა უპასუხა: “შეიძლება“.

სალომე ზურაბიშვილი დიდ ბრიტანეთში 27 თებერვალს გაემგზავრა. ის 28 თებერვალს Chatham House-ის საერთაშორისო საქმეთა სამეფო ინსტიტუტის ორგანიზებულ ღონისძიებას დაესწრო.

საერთაშორისო საქმეთა სამეფო ინსტიტუტი ლონდონში მოქმედი ბრიტანული ანალიტიკური ცენტრია, რომლის მიზანია გააანალიზოს და ხელი შეუწყოს ძირითადი საერთაშორისო საკითხებისა და მიმდინარე მოვლენების გააზრებას.

ღონისძიებამდე სალომე ზურაბიშვილმა Sky News-თან ინტერვიუში განაცხადა, რომ ოქტომბერში საქართველოში მნიშვნელოვანი არჩევნებია და “ვიცით, საქართველოზე ბევრად ძლიერი ქვეყნების გამოცდილება, როგორ შეუძლია რუსეთს არჩევნებში ჩარევა და ჰიბრიდული ომის გაჩაღება”.

რუსული საფრთხის შესახებ

“რუსეთი საქართველოში მინიმუმ სამჯერ შემოიჭრა. ის განაგრძობს ჩვენი ტერიტორიების ოკუპაციას. ეს არ ეხება ოკუპაციას, ეს ეხება პირდაპირ ოკუპაციას, რუსეთის სამხედრო ბაზებს ჩვენს ტერიტორიაზე. ის, რასაც ახლა რუსეთი ცდილობს და რასაც გააგრძელებს, როგორც ის ევროპის და სხვა ქვეყნებში აკეთებს, არის ჰიბრიდული ომი, რომელიც უკვე დაწყებულია. ის ცდილობს პროპაგანდის გზით გამარჯვების მოპოვებას, დესტაბილიზაციას.

დღეს ოკუპირებულ ტერიტორიაზე კიდევ ერთი ადამიანი გაიტაცეს. ეს გამუდმებით ასე ხდება, ისინი იყვანენ მძევლებს. ასე რომ, საქართველოში დესტაბილიზაციის მუდმივი მცდელობა არის ის, რასაც რუსეთი აკეთებს. ერთი რამ, რაც შეიძლება ვთქვათ, არის, რომ ჩვენ ცოტა უფრო მედეგები ვართ, ვიდრე ამ სიტუაციაში სხვა ქვეყნები იქნებოდნენ და ეს იმიტომ, რომ საქართველოს აქვს გამოცდილება.“ – განაცხადა ზურაბიშვილმა.

კითხვაზე, ფიქრობს თუ არა, რომ რუსეთს საქართველოზე კონტროლის მოპოვება სურს, პრეზიდენტმა უპასუხა, რომ რუსეთს სურს გააკონტროლოს არა მხოლოდ საქართველო, არამედ, ევროპის ნაწილებიც.

“მას აქვს ძველი ამბიციები და მისწრაფებები, რომ დარჩეს იმპერიულ სახელმწიფოდ, მაგრამ ჩვენ იმაზე უნდა ვიფიქროთ, რუსეთს რა სურს, თუ ჩვენ რა გვსურს?“ – აღნიშნა საქართველოს პრეზიდენტმა.

● “სხვების გამოცდილებით ვიცით, როგორ შეუძლია რუსეთს არჩევნებში ჩარევა” – სალომე ზურაბიშვილის ინტერვიუ Sky News-თან
● “ერთადერთი, რაც შეიძლება რუსეთთან შეიცვალოს, არის ის, რომ რუსეთი გავიდეს ყველა ოკუპირებული ტერიტორიიდან” – პრეზიდენტის ინტერვიუ Deutsche Welle-სთან
● “რუსეთს უნდა შეეშალოს ხელი, გახდეს ექსკლუზიური ძალა შავი ზღვის რეგიონში” – ზურაბიშვილის გამოსვლა მიუნხენში

სააკაშვილის შეწყალების შესახებ

“რამდენად იქნება ქვეყანაში სამართლიანი არჩევნების ჩატარება იმ ფონზე, როცა საქართველოს მესამე პრეზიდენტი პატიმრობაშია?” – ამ კითხვაზე პასუხად პრეზიდენტმა თქვა, რომ “თავისუფალი და სამართლიანი არჩევნები არ არის დამოკიდებული იმაზე, თუ სად იქნება სააკაშვილი”. მისი თქმით, სააკაშვილი არ არის პოლიტიკური ოპონენტი ციხეში და ის სასჯელს რეალური დანაშაულებისთვის იხდის.

ზურაბიშვილმა არ უპასუხა კითხვას მიხეილ სააკაშვილის შეწყალების შესაძლებლობაზე, თუმცა აღნიშნა, რომ ქვეყნის რეპუტაციისთვის უკეთესი იქნებოდა, რომ სააკაშვილი “სადმე სხვაგან ყოფილიყო”. მან მოიყვანა სხვა ქვეყნების მაგალითები, სადაც მსგავსი პრობლემები გადაიჭრა და მათ შორის, ერთ-ერთ შესაძლებლობად სააკაშვილის ექსტრადიცია დაასახელა.

“ჩემის მხრივ ერთი შესაძლებლობა მაქვს, რაზეც არასდროს ვაკეთებ კომენტარს ქვეყნის გარეთ და რთულად ვპასუხობ ამ კითხვას ქვეყნის შიგნით. ბევრი სხვა ადამიანი ელოდება შეწყალებას და ახსნას თუ დაიწყებ, არასამართლიანი იქნება მათ მიმართ. ასე რომ, კომენტარს არ გავაკეთებ. ეს მორალური გადაწყვეტილებაა, რომელსაც ჩემით მივიღებ და მხოლოდ მე ვიქნები პასუხისმგებელი. ეს ნამდვილად არ არის ის, რაზეც გარე ან შიდა ზეწოლა იმოქმედებს.” – თქვა პრეზიდენტმა.

აფხაზეთში რუსეთის პორტის შესახებ

კითხვაზე, შესაძლოა, თუ არა უკრაინაში ომის ფონზე ოკუპირებული აფხაზეთის ტერიტორიაზე რუსეთის პორტის აშენებამ საქართველოს ომში ჩათრევა შეძლოს? – პრეზიდენტმა უპასუხა: „შეიძლება“.

“ამ დროისთვის ეს პროექტი არის რუსული პროპაგანდის ნაწილი. პუტინი „კა-გე-ბეს“ ძველი აგენტი რეალურად უფრო მეტად აწარმოებს ფსიქოლოგიურ ომს, ვიდრე სამხედრო ომს. ასე იყო უკრაინაში, ასეა სხვაგანაც. ძალიან მნიშვნელოვანია ის, რაც ხდება ამ პორტთან დაკავშირებით და ვფიქრობ, ეს არის ის, რაც ევროპელებმა უნდა გააცნობიერონ, რადგან ეს არის შავი ზღვა, რომელიც საფრთხეშია. არავის არ უნდა ჰქონდეს იმის საშუალება, რომ რუსეთი აკონტროლებს შავი ზღვის ამ ნაწილს.“ – აღნიშნა სალომე ზურაბიშვილმა.

მისი თქმით, ამ შემთხვევაში საფრთხე დაემუქრება ევროკავშირის მომავალ პროექტებსაც, რომელიც უკავშირდება დაკავშირებადობას, შავ ზღვაზე სტრატეგიულ სატრანსპორტო მარშრუტებს.

“ჩვენ რეაგირება ახლავე უნდა გვქონდეს, არ უნდა დაველოდოთ ოკუპირებულ აფხაზეთში პორტის მშენებლობას და ფუნქციონირებას. რუსეთმა უნდა დაინახოს, რომ ევროკავშირი თვლის, რომ შავი ზღვა არის დე ფაქტო ევროპული ზღვა, სადაც ევროპას აქვს ყოფნის უფლება.” – განაცხადა პრეზიდენტმა.

● NATO-ს გენერალური მდივნის თქმით, ოჩამჩირეში რუსული ბაზა არღვევს საქართველოს ტერიტორიულ მთლიანობასა და სუვერენიტეტს
● “მოგიწოდებთ, დაიკავეთ მტკიცე პოზიცია!” – ოჩამჩირეში რუსულ ფლოტთან დაკავშირებით ქართველი ოპოზიციონერები ნატოს და ევროკავშირს მიმართავენ