საიას შუალედური ანგარიში: მმართველი პარტიის რიტორიკა ემსახურება ოპონენტების დემონიზებას
საიას შუალედური ანგარიში
საქართველოს ახალგაზრდა იურისტთა ასოციაციამ (საია) 2024 წლის საპარლამენტო არჩევნების გრძელვადიანი სადამკვირვებლო მისიის II შუალედური ანგარიში გამოაქვეყნა, რომელშიც ვკითხულობთ, რომ მძაფრი პოლარიზაციის ფონზე, საინფორმაციო სივრცე მოცული იყო მკვეთრი ურთიერთბრალდებებით – მმართველი პარტიის წარმომადგენლები საჯარო გამოსვლებსა და განცხადებებში პოლიტიკური ოპონენტების დემონიზებას ცდილობდნენ და მათ მოღალატეობრივ ქმედებებში ადანაშაულებდნენ, ოპოზიციის უდიდეს ნაწილს “გარედან მართულ [აგენტებად]” მოიხსენიებდნენ.
ანგარიშში საუბარია “ქართული ოცნების” საპატიო თავმჯდომარის, ბიძინა ივანიშვილის დაპირებაზე, საკონსტიტუციო უმრავლესობის მოპოვების შემთხვევაში, ოპოზიციური პარტიების აკრძალვის შესახებ, რაც ანგარიშის მიხედვით, “მიზნად ისახავს ოპონენტების სტიგმატიზაციას და ოპოზიციურად განწყობილ ამომრჩეველში ნიჰილიზმის გაღვივებას”.
საია-ს ანგარიშის მთავარი მიგნებები
● ქართული ოცნება იყენებდა “ანტიდასავლური რიტორიკას, ომისა და მშვიდობის საკითხებს, ანტი-ლგბტქ გზავნილებს და წინა ხელისუფლების დასჯის რიტორიკას. გარდა ამისა, გრძელდებოდა არასამთავრობო ორგანიზაციების დისკრედიტაციისა და სტიგმატიზაციის მიზნით წარმოებული კამპანია”.
● “დემოკრატიის ერთ-ერთი ფუნდამენტური პრინციპია პოლიტიკური პლურალიზმი და ოპოზიციური პარტიების თავისუფალი მოქმედების უფლება. მათი აკრძალვის მუქარა კი პირდაპირ ეწინააღმდეგება ამ პრინციპს და საფრთხეს უქმნის დემოკრატიულ სისტემას.
● საპარლამენტო არჩევნებამდე ორი თვით ადრე ქვეყნის უმაღლესი თანამდებობის პირებისგან საჯაროდ ამ ტიპის გზავნილების გავრცელება შემაშფოთებელია. მსგავსი რიტორიკა პრობლემურია, რადგან ის მიზნად ისახავს ოპონენტების სტიგმატიზაციას და ოპოზიციურად განწყობილ ამომრჩეველში ნიჰილიზმის გაღვივებას.
სამართლიანი და თავისუფალი წინასაარჩევნო გარემოს უზრუნველსაყოფად არსებითად მნიშვნელოვანია, რომ ქვეყნის თითოეულ მოქალაქეს ჰქონდეს საკუთარი ხმის მნიშვნელობის შეგრძნება და არა იმის განცდა, რომ არჩევნებში მისი მონაწილეობა ფუჭია, რადგან მის მიერ მხარდაჭერილმა პარტიამ, შესაძლოა, არსებობა შეწყვიტოს.
● მიუხედავად იმისა, რომ ოფიციალური წინასაარჩევნო პერიოდი არჩევნებამდე 60 დღით ადრე იწყება, ეს პროცესი სცდება კანონმდებლობით დადგენილ ოფიციალურ პერიოდს და მოიცავს ყველა საქმიანობას, რომლებსაც მოქმედი მთავრობის წარმომადგენლები ახორციელებენ კანდიდატების, პოლიტიკური პარტიების ან კოალიციის მხარდასაჭერად ან მათ წინააღმდეგ. ამას ადასტურებს ვენეციის კომისიაც.
● შესაბამისად, საბიუჯეტო დაწესებულებებში დასაქმებული პირების პარტიული ღონისძიებებისთვის მობილიზება და მათი, სავარაუდოდ, მოტყუებით ჩართვა, მათ შორის, არჩევნებამდე მცირე ხნით ადრე, ცუდ პრაქტიკას ამკვიდრებს, ბუნდოვანს ხდის ზღვარს სახელმწიფოსა და პარტიას შორის და ხელს უშლის თანასწორი, სამართლიანი საარჩევნო პროცესის წარმართვას. ამდენად, მსგავსი შემთხვევები მმართველი პარტიის მიერ ადმინისტრაციული რესურსის გამოყენების ნიშნებს შეიცავს და არ შეესაბამება პარტიული, ადმინისტრაციული რესურსის გამიჯვნის პრინციპს.
