იუსტიციის უმაღლესი საბჭოს ყოფილი წევრები აშშ-ის საელჩოს ბრალდებებს უყენებენ
საბჭოს ყოფილი წევრები აშშ-ის საელჩოს ბრალდებებს უყენებენ
იუსტიციის უმაღლესი საბჭოს ყოფილი წევრები აშშ-ის საელჩოს წინააღმდეგ ბრალდებებს უერთდებიან. სამი მოსამართლე – ზაზა ხარებავა, შოთა ქადაგიძე და ლევან გზირიშვილი სოლიდარობას უცხადებენ მოსამართლე ლაშა ჩხიკვაძეს, რომელმაც „მთავარი არხის“ დირექტორს, ნიკა გვარამიას პატიმრობა მიუსაჯა და ამბობენ, რომ აშშ-ს საელჩო კონკრეტული მოსამართლის დამოუკიდებლობაში ერევა, რაც სხვა მოსამართლეებზე “ირიბი” ზეწოლის მაგალითია.
ნიკა გვარამიას საქმის მოსამართლის, ლაშა ჩხიკვაძის მტკიცებით, აშშ-ს საელჩოს თანამშრომელმა კევინ ბურკმა მას უთხრა, რომ კელი დეგნანს აინტერესებდა, რატომ მიიღო გამამტყუნებელი განაჩენი გვარამიას საქმეზე და განსაკუთრებით, რატომ გამოიყენა სასჯელად თავისუფლების აღკვეთა.
ჩხიკვაძის თქმით, ბურკმა ასევე უთხრა, რომ აშშ-ში მოსამართლეების დაგეგმილ ვიზიტში მისი მონაწილეობა არასასურველი იქნებოდა და სიიდან ამოიღეს. ასევე, ჩხიკვაძის განმარტებით, მასზე ზეწოლას ევროპარლამენტარებიც ახდენენ.
როგორც მოსამართლე აღნიშნავს, ყველაფერი ამით არ დასრულებულა და ახლა უკვე ზოგიერთი პოლიტიკური ძალა “სანქციებითაც“ ემუქრება ამ კონკრეტული საქმის განხილვის შედეგის გამო.
ლაშა ჩხიკვაძემ ზეწოლის ფაქტზე “მთავარ არხთანაც” ისაუბრა. მოსამართლის თქმით, უნდა დასრულდეს “კატა-თაგვობანას თამაში” და ის პირადად ითხოვს პასუხს საქართველოში აშშ-ს ელჩის კელი დეგნანისგან – არის თუ არა სანქცირებული, რათა ყველაფერს თავის სახელი დაერქვას.
როგორც ისინი განმარტავენ, მნიშვნელობა არ აქვს ვინ ეცდება სასამართლოს საქმიანობაში ჩარევას და “რაღაც ხათრის თუ თავშეკავების გამოჩენა, ჩანასახშივე ანადგურებს სასამართლოს დამოუკიდებლობის იდეას.”
ხარებავა, ქადაგიძე და გზირიშვილი უკმაყოფილებას გამოთქვამენ, რომ იუსტიციის უმაღლესი საბჭო არ არის ჩართული აშშ-ში ქართველი მოსამართლეების ვიზიტების დაგეგმვასა და ორგანიზებაში. მათივე თქმით, მოსამართლეებს პირდაპირ უკავშირდებიან საელჩოს თანამშრომლები და მოითხოვენ განმარტებებს.
როგორც ისინი განმარტავენ, საბჭო არც საქართველოში გამართული სამუშაო შეხვედრების ან ლექცია-სემინარების თემების, ექსპერტ თუ მონაწილე მოსამართლეთა სიის განსაზღვრაშია ჩართული.
იუსტიციის უმაღლესი საბჭოს ყოფილი წევრები მიიჩნევენ, რომ კანონით მკაცრად უნდა მოწესრიგდეს ნებისმიერი კომუნიკაცია მოსამართლესთან, ასევე, უნდა გაიწეროს და კანონის დონეზე დარეგულირდეს ის პროტოკოლური თუ ნებისმიერი ურთიერთობა მოსამართლეებთან იმ სტანდარტებით და ფორმებით, “როგორც ეს აპრობირებულია, თანამედროვე დასავლურ ქვეყნებში.”
„არ გვავიწყდება და ვაფასებთ იმ დონორულ დახმარებას, რასაც წლების განმავლობაში ა.შ.შ.-ს სახელმწიფო, თავისი საელჩოს მეშვეობით უწევს ქართულ მართლმსაჯულების სისტემას, თუმცა ეს არ ქმნის გამონაკლისს და რაიმე ექსკლუზიურ უფლებას, რომ სასამართლო სისტემის შიდა საქმეებში და/ან ადმინისტრირებაში მოხდეს რაიმე სახის ჩარევა ან დონორის მანდატს გაცდენა“, – წერია განცხადებაში.
იუსტიციის უმაღლესი საბჭოს ყოფილი წევრი, ნაზი ჯანეზაშვილი ამბობს, რომ ახლა აშშ-ის წინააღმდეგ კამპანიაში საბჭოს ყოფილი წევრები ჩართეს.
“ბევრი რამ მახსენდება ამ ხალხზე, რადგან ჩვენ ერთ პერიოდში ვიყავით იუსტიციის უმაღლესი საბჭოს წევრები, მაგრამ მოკლედ მათ შესახებ ესაა:
ლევან გზირიშვილი – ახლა ეს არის მოსამართლის მამა! ეს ის ადამიანია, რომელმაც საბჭოს წევრობის ბოლო დღეებში შვილი გახადა მოსამართლე და ფიცის დასადებად პირადად მიიყვანა საქართველოს უზენაეს სასამართლოში.
ზაზა ხარებავა – მოსამართლე ირაკლი შენგელიასთან დაახლოებული პირი და ამ გზით არჩეული იუსტიციის უმაღლესი საბჭოს წევრად. როგორც თავადაც აღიარა შენგელიასთან აკავშირებს მეჯვარეობა.
შოთა ქადაგიძე – ყველაზე მდუმარე წევრი, რომელიც მხოლოდ იმ შემთხვევებში იღებდა ხმას თუ ჩემთან დაპირისპირება იყო საჭირო”, – წერს ნაზი ჯანეზაშვილი.
16 მაისს, სასამართლო დარბაზში დააპატიმრეს ქვეყნის ყველაზე პოპულარული ოპოზიციური ტელეკომპანიის, “მთავარის” გენერალური დირექტორი ნიკა გვარამია. კრიტიკული მედიის ხელმძღვანელს სამი წლით და ექვსი თვით თავისუფლების აღკვეთა მიესაჯა ეპიზოდზე, რომელშიც მას სამსახურებრივი მანქანის ოჯახის საჭიროებებისთვის გამოყენებას ედავებიან.
მას შემდეგ, რაც ჩხიკვაძემ გვარამიას პატიმრობა მიუსაჯა, მედიაში გავრცელდა ინფორმაცია, რომ ის აშშ-ის მთავრობის დაფინანსებული პროგრამით შეერთებულ შტატებში საქმეზე გამოტანილი განაჩენის გამო აღარ გაემგზავრება. აღნიშნული დაადასტურა თავად ჩხიკვაძემაც.
ნიკა გვარამიას საქმის მოსამართლის, ლაშა ჩხიკვაძის მიმართ სოლიდარობის ნიშნად, 5 მოსამართლე აშშ-ში არ წავიდა, ამ ყველაფერს კი წინ უძღოდა მმართველი პარტიის თავმჯდომარის, ირაკლი კობახიძის განცხადება, რომელმაც თქვა, რომ “მოსამართლისთვის ვიზიტის გაუქმება რომ ეკადრა ვინმეს, სხვა მოსამართლეებიც გააუქმებდნენ.”
