არასამთავრობოები: ივანიშვილ-კუპრაშვილის ბიურომ რუსული კანონების აღსრულება დაიწყო
რუსული კანონების აღსრულება
არასამთავრობო ორგანიზაციების განცხადებით, 17 ივნისს რუსული კანონების აღსრულება დაიწყო. როგორც ენჯეოები განმარტავენ, მათ უკვე მოსთხოვეს ყველა იმ ადამიანის პირადი ნომრების, სახელების, გვარების, ფოტოსურათების, ფინანსური და საბანკო ინფორმაციისა და ჯანმრთელობის მდგომარეობის ინფორმაციის გადაცემა, ვინც მათი დახმარებით ისარგებლა.
რას ამბობენ არასამთავრობოები
“17 ივნისს ივანიშვილ-კუპრაშვილის ბიურომ ანტიკონსტიტუციური რუსული კანონების აღსრულება მურუსიძის სასამართლოს მეშვეობით დაიწყო. ისინი ჩვენგან, უფლებადამცველებისგან, სამართლებრივი საფუძვლების გარეშე ითხოვენ ჩვენი დაცვის ქვეშ მყოფი მოქალაქეების – წამების მსხვერპლების, ძალადობის მსხვერპლი ქალების, მოსწავლეების, სტუდენტების, მასწავლებლების, პენსიონერების, შშმ პირების, მეწარმეების, მამხილებლების, ჟურნალისტების, დამკვირვებლების, უკანონოდ გათავისუფლებული საჯარო მოხელეებისა და მათი ოჯახის წევრების პერსონალური ინფორმაციის გადაცემას, კერძოდ, ყველა იმ ადამიანის პირადი ნომრების, სახელების, გვარების, ფოტოსურათების, ფინანსური და საბანკო ინფორმაციისა და ჯანმრთელობის მდგომარეობის ინფორმაციის გადაცემას, ვინც გვენდობოდა და ჩვენი დახმარებით უსარგებლია.
ჩვენ არ ვაპირებთ ჩვენი დაცვის ქვეშ მყოფი მოქალაქეების ნდობის ღალატს, თუნდაც ამას ჩვენი დევნა და დაპატიმრება მოყვეს. ივანიშვილის რეჟიმის მიერ ჩაგრული ადამიანების ინფორმაციას რუსულ რეჟიმს არ გადავცემთ.
ჩვენ მივმართავთ სამართლებრივ გზებს ამ ბრძანებების წინააღმდეგ. ჩვენთვის მათი მიზანი ცხადია – ივანიშვილი საქართველოში თავისუფალი სამოქალაქო საზოგადოების განადგურებას ცდილობს, ზუსტად ისე, როგორც ამას 1920-იან წლებში ბოლშევიკები, ბოლო დეკადაში კი – პუტინისა და ლუკაშენკას რეჟიმები აკეთებდნენ.
კიდევ ერთხელ ვაცხადებთ, რომ არ ვაპირებთ რუსული კანონებით ცხოვრებას, საქართველოს ევროპული მომავლის საბოტაჟისადმი შეგუებას და გავაგრძელებთ ბრძოლას ქართველი ხალხის უფლებების დასაცავად.” – აცხადებენ NGO-ების წარმომადგენლები.
კომენტარი
გამოცემა “ტაბულა” აღნიშნულთან დაკავშირებით საერთაშორისო გამჭვირვალობა – საქართველოს ადამიანის უფლებათა და მართლმსაჯულების პროგრამის მენეჯერს, სანდრო ბარამიძეს ესაუბრა.
ბარამიძის განცხადებით, კუპრაშვილის უწყებამ ორგანიზაციებს 3 კანონის საფუძველზე მიმართა, საუბარია კორუფციის წინააღმდეგ ბრძოლის შესახებ, მოქალაქეთა პოლიტიკური გაერთიანების შესახებ და გრანტების შესახებ კანონებზე. აღსანიშნავია, რომ საუბარი არ არის ე.წ. FARA-ს ანალოგზე.
“მიუთითეს 3 კანონზე, ერთია – კორუფციის წინააღმდეგ ბრძოლის შესახებ კანონი, მეორე – მოქალაქეთა პოლიტიკური გაერთიანების შესახებ ორგანული კანონი, მესამე – გრანტების შესახებ კანონი. სამოქალაქო ან ადმინისტრაციული საპროცესო კოდექსის კონკრეტულ ნორმაზე ვერ მიუთითეს დაწერეს, რომ ვიყენებთ კანონის ანალოგიასო, მაგრამ რომელი კანონის ანალოგიას იყენებენ ეს არ ვიცით”. – უთხრა ბარამიძემ “ტაბულას.”
მისივე განმარტებით, აღნიშნული კანონებიდან ორი არასამთავრობო ორგანიზაციებზე არ ვრცელდება. რაც შეეხება გრანტების შესახებ კანონს, ანტიკორუფციული ბიურო კანონის ამოქმედებამდე პერიოდშიც მოითხოვს ინფორმაციის მიწოდებს. ასევე ითხოვს ისეთ პერსონალურ მონაცემებს, რომელსაც გრანტების შესახებ კანონი არ ითვალისწინებს.
“ქართული ოცნების” მიერ მიღებული FARA-ს კანონი 31 მაისიდან ამოქმედა.
ქართული FARA მიზანში იღებს და საქმიანობას უზღუდავს სამოქალაქო საზოგადოებასა და მედიას. კანონის აღმასრულებელი ანტიკორუფციული ბიურო იქნება. განსაზღვრულ მოთხოვნათა შეუსრულებლობის შემთხვევაში, კანონპროექტით “FARA”-ს გათვალისწინებულია ჯარიმა ან თავისუფლების აღკვეთა 5 წლამდე ვადით.
საგარეო და უსაფრთხოების საკითხებში ევროკავშირის უმაღლესი წარმომადგენელი, კაია კალასი და გაფართოების საკითხებში ევროკავშირის კომისარი, მარტა კოსი ოცნების “FARA”-ს კანონის შესახებ ერთობლივ განცხადებას ავრცელებენ და ამბობენ, რომ კანონი საქართველოს დემოკრატიისთვის სერიოზულ უკუსვლას წარმოადგენს და მისი მიღება “ქართული ოცნების” კიდევ ერთი აგრესიული ქმედებაა განსხვავებული აზრის ჩასახშობად.
ამასთან, 2024 წლის აპრილში, საქართველოს პარლამენტმა უმოკლეს დროში მიიღო კანონი, რომლის მიხედვითაც საქართველოში ვერანაირი უცხოური გრანტი ვერ გაიცემა მთავრობის თანხმობის გარეშე. ანუ, თუ რომელიმე ფონდს ან ორგანიზაციას – მაგალითად, ევროკავშირს ან გაეროს – სურს დაეხმაროს ქართულ არასამთავრობო ორგანიზაციას, ამისთვის ჯერ ირაკლი კობახიძის მთავრობისგან ოფიციალური ნებართვა უნდა აიღოს.
10 ივნისს კი ცნობილი გახდა, რომ “ქართულ ოცნებას” 15 აპრილს მიღებულ ე.წ. გრანტების კანონში, რომლის მიხედვითაც, მთავრობის ნებართვის გარეშე გრანტის გაცემა აიკრძალა, ცვლილებები შეაქვს: ამიერიდან ტექნიკური, საექსპერტო დახმარების თუ ცოდნის გაზიარებისთვის, ივანიშვილის ხელისუფლების თანხმობა იქნება საჭირო.
