რუსი ტურისტი აფხაზეთში შიშველი ტორსის გამო დაჭრეს – რატომ ცდილობს ადგილობრივი ხელისუფლება საქმის მიჩქმალვას?
აფხაზეთში რუსი ტურისტი დაშავდა
აფხაზეთში რუსი ტურისტი შიშველი ტორსის გამო დაჭრეს. ადგილობრივი ხელისუფლება ცდილობს საქმის მიჩქმალვას, რადგან ეჭვმიტანილთა შორის ქალაქ გაგრის ადმინისტრაციის ხელმძღვანელი ფიგურირებს.
სოციალურ ქსელებში გავრცელებული ინფორმაციით, 13 მარტს, რუსეთის მოქალაქე კონსტანტინ ბელოზეროვი მეუღლესთან ერთად გაგრის ერთ-ერთ კაფეში იმყოფებოდა, როდესაც იქ ადგილობრივი ადმინისტრაციის ხელმძღვანელი, იური ხაგუში თავის მეგობართან ერთად შევიდა. ხაგუშს არ მოეწონა, რომ ტურისტი შიშველი ტორსით იმყოფებოდა საზოგადოებრივი თავშეყრის ადგილზე და მას „წესებსი დაცვა” მოსთხოვა. ბელოზეროვმა ეს შენიშვნა აგრესიულად მიიღო, რის შემდეგაც სიტყვიერი დაპირისპირება ფიზიკურ დაპირისპირებაში გადაიზარდა, რაც საბოლოოდ ცეცხლსასროლი იარაღის გამოყენებით დასრულდა.
დაჭრილი ბელოზეროვი თავდაპირველად გაგრის საავადმყოფოში მოათავსეს, შემდეგ სოხუმში გადაიყვანეს, ხოლო მოგვიანებით – სოჭში, სადაც ამჟამად რეანიმაციაში იმყოფება.
გაგრის ხელისუფლება ორი დღის განმავლობაში ისე იქცეოდა, თითქოს არაფერი მომხდარა. ქალაქის ადმინისტრაციის პრესსამსახური ამტკიცებდა, რომ ტურისტის დაჭრის შესახებ გავრცელებული ინფორმაცია ოპოზიციური მედიის „კიდევ ერთი ფეიკი“ იყო.
მხოლოდ 15 მარტს გაავრცელა განცხადება აფხაზეთის შინაგან საქმეთა სამინისტრომ, რომელშიც აღნიშნული იყო, რომ „დაიწყო კაცის დაშავების გარემოებების დადგენა გაგრაში“. თუმცა, უწყების ვერსიით, კონსტანტინ ბელოზეროვი, რომელიც 43 წლისაა, ცეცხლსასროლი იარაღით კი არ დაჭრეს, არამედ „მარცხენა ფეხის მცირე ჭრილობით“ შეიყვანეს საავადმყოფოში, სადაც პირველადი დახმარება აღმოუჩინეს და მალევე გაწერეს.
შსს-მ ინციდენტში მონაწილე სხვა პირებზე არაფერი განაცხადა.
ამ დროს, აფხაზი ჟურნალისტი ნიზფა არშბა სოჭში გაემგზავრა და განმარტა, რომ ბელოზეროვი რეანიმაციაშია და მძიმე მდგომარეობაში იმყოფება, რადგან დიდი რაოდენობით სისხლი დაკარგა. სოჭელი ექიმების თქმით, მისი ჭრილობების ხასიათი ცხადყოფს, რომ მამაკაცს ესროლეს, ხოლო ოფიციალურ დოკუმენტებში მითითებული ვერსია – თითქოს მან „ლითონის ღეროზე დაიზიანა ფეხი“ – ეჭვქვეშ დგას.
აფხაზეთის ოპოზიცია აღშფოთებულია ხელისუფლების მცდელობით, მიჩქმალოს რუსი ტურისტის დაჭრის ინციდენტი.
ოპოზიციონერები იხსენებენ, რომ სულ ცოტა ხნის წინ, საპრეზიდენტო არჩევნების კამპანიის დროს, აფხაზეთში „ხელოვნურად იქმნებოდა ისტერია საზოგადოებაში არსებული ანტირუსული განწყობების შესახებ“. მათი აზრით, ეს შემთხვევა ახალი ხელისუფლებისთვის გამოცდაა. (შეგახსენებთ, რომ აფხაზეთის ახალი პრეზიდენტი კრემლის ფავორიტი ბადრა გუნბა გახდა).
„მართლა ერთნაირად მოქმედებს კანონი ყველასთვის აფხაზეთში, თუ გარკვეულ პირებს შეუძლიათ მძიმე დანაშაულების ჩადენა დაუსჯელად?“ – კითხულობენ ოპოზიციაში.
ოპოზიციური ორგანიზაციები სამართალდამცავ ორგანოებს ინციდენტის დაუყოვნებლივ გამოძიებას, თავდასხმის გარემოებების გამჭვირვალე გაშუქებას და პასუხისმგებელ სტრუქტურებისგან მკაფიო პასუხების გაცემას მოითხოვენ. აღნიშნულ მოთხოვნას აფხაზეთის რვა ოპოზიციური გაერთიანება ერთობლივ განცხადებაში აჟღერებს.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
