„დოსიეს“ მიერ გამოქვეყნებული ფაქტების გამოძიება: სომხეთში რუს ჯაშუშებს ეძებენ
რუსულმა ცენტრმა „დოსიემ“ სკანდალური სტატია გამოაქვეყნა ჯაშუშების შესახებ, რომლებმაც „სომხეთის თითქმის ყველა სახელმწიფო სტრუქტურაში მოიკიდეს ფეხი“.
ცენტრს აფინანსებს ერთ-ერთი ყველაზე მდიდარი რუსი ბიზნესმენი, კრემლის კრიტიკოსი, ამჟამად ემიგრანტი, მიხაილ ხოდორკოვსკი.
სტატიაში ნახსენებია ისეთი ცნობილი ადამიანების სახელები, როგორებიც არიან სომხეთის ყოფილი პრეზიდენტი რობერტ კოჩარიანი და ოპოზიციური პარტია „აყვავებული სომხეთის“ ლიდერი, მსხვილი ბიზნესმენი, გაგიკ ცარუკიანი.
თანაც, გამოძიებაში აღნიშნულია, რომ „რუსეთის მეგობრებს“ ჯაშუშობაში მხილების არ უნდა ეშინოდეთ, რადგან სომხეთის ეროვნულ უსაფრთხოების სამსახურს უკვე დიდი ხანია „ლუბიანკის ფილიალს“ უწოდებენ.
სომხეთის ეროვნული უსაფრთხოების სამსახურის ხელმძღვანელმა განაცხადა, რომ სტატიას უკვე სწავლობენ. არგიშტი კიარამიანის თქმით, „მალე მიეცემა სისხლისსამართლებრივი შეფასება ყველა ფაქტს, რომელსაც გამოძიება შეიცავს“.
ყველა დეტალი – ვინ არის ნახსენები გამოძიებაში, ვინ არის ერევნელი „წვერა“ და რაში ადანაშაულებს სომხური ოპოზიცია ეროვნული უსაფრთხოების სამსახურს.
• Russia Today-ს ხელმძღვანელმა სომხეთის ხელისუფლება ანტირუსულ პოზიციებში დაადანაშაულა
სახელები, პაროლები, კონსპირაციული ბინები
„დოსიეს“ სტატიაში საუბარია იმის შესახებ, რომ რუსეთის პრეზიდენტის ადმინისტრაცია ყურადღებით აკვირდება სომხეთის პრემიერ-მინისტრის, ნიკოლ ფაშინიანის ყველა ნაბიჯს. და მას აქ მოკლე მეტსახელი აქვს – „წვერა“.
გამოძიების ავტორებმა შეისწავლეს რუსეთის საგარეო დაზვერვის გენერლის, ვლადიმირ ჩერნოვის სამდივნოს დოკუმენტები. როგორ მოიპოვეს ისინი, სტატიაში აღნიშნული არ არის.
ცნობილია მხოლოდ ის, რომ ჩერნოვი, რომელიც საბჭოთა წლებში კაგებეს ოფიცერი იყო, 2012 წლიდან, რუსეთის პრეზიდენტის ოფისში, საზღვარგარეთულ ქვეყნებთან რეგიონთაშორის და კულტურულ მიმართულებას ხელმძღვანელობს.
„სინამდვილეში, ეს სტრუქტურა შეიქმნა დსთ-ს სივრცეში ფერად რევოლუციებთან საბრძოლველად და რუსეთის ინტერესების გასატარებლად… ყველაზე მეტ წარმატებას გენერალმა სომხეთში მიაღწია, სადაც „რუსეთის მეგობრების“ მთელი ქსელი მოქმედებს – როგორც ღია, ისე ღრმად გასაიდუმლოებული“, – წერს „დოსიე“.
გამოძიების ავტორები ამტკიცებენ, რომ ეს „რუსეთის მეგობრები“ თითქმის ყველა სახელმწიფო სტრუქტურაში დამკვიდრდნენ – მთავრობაში, პარლამენტში, სპეცსამსახურებში, საგარეო საქმეთა სამინისტროში. 2018 წლის „ხავერდოვანი რევოლუციის“ შემდეგ კი, გენერალ ჩერნოვის ქვეშევრდომების განსაკუთრებული კონტროლის ქვეშ აღმოჩნდა სომხეთის პრემიერ-მინისტრი ნიკოლ ფაშინიანი, რომელსაც ისინი წარმოადგენენ, როგორც „სოროსის ფონდის პროტეჟეს“.
„აგვისტომდე, როგორც მიშა დაგვპირდა, ნიკოლის განეიტრალება არ გამოვიდა. ახლა, როგორც ჩანს, რთული სცენარი დაიწყება“, – იუწყება ვინმე სვეტლანა მაქსიმოვა. ან „გამოდის თავზეხელაღებული ფაშინიანი … აი, აი, დაველოდოთ, ვნახოთ, როგორ წაიბორძიკებს. და მადლობა გადავუხადოთ, რომ ერთდროულად ამდენი პროდასავლელი მუქთამჭამელი გამოაჩინა“, – ციტირებს „დოსიე“.
გამოძიებაში ნათქვამია, რომ მაქსიმოვა ერთადერთი აგენტი არაა, რომელიც სომხეთის პრემიერზე კომპრომატებს გზავნის. არის მეორე წყაროც – ოპერატიული ფსევდონიმით „კანდიდატი“.
„ფაშინიანი პოსტსაბჭოთა ერთობისგან თავს იკავებს. ის მოსკოვში, გამარჯვების აღლუმზეც კი არ ჩავიდა და მიზეზად კორონავირუსთან დაკავშირებული პრობლემები მოიყვანა. რუსეთისგან დაშორების პოლიტიკა ფაშინიანისთვის დამახასიათებელი იყო. უფრო მეტიც, მის დროს, ხელისუფლებაში მოვიდნენ პროამერიკელი პოლიტიკოსები, რომლებიც ეჭვმიტანილი არიან აშშ-სთან კავშირში“, – ნათქვამია „კანდიდატის“ ერთ-ერთ „შეტყობინებაში“.
„დოსიეს“ მასალების მიხედვით, რუსეთის ერთ-ერთი მთავარი აგენტი და „მეგობარი“ სომხეთის ეროვნული უსაფრთხოების სამსახურის ყოფილი უფროსი, კარლოს პეტროსიანია. ის უწყებას რობერტ კოჩარიანის პრეზიდენტობის დროს ხელმძღვანელობდა.
„დოსიეს“ თანახმად, გენერალ-ლეიტენანტმა პეტროსიანმა 2004 წელს, გადადგომისთანავე რუსეთის მოქალაქეობა მიიღო და ახლა მოსკოვში, კომპოზიტორების სახლში ცხოვრობს, სადაც 200 მილიონი რუბლის ღირებულების ბინა შეიძინა.
ამას გარდა, მან პუტინის განკარგულებით, მოსკოვთან ახლოს, მალახოვკაში, კაგებეს ყოფილი აგარაკი მიიღო. კონკრეტულად რა დამსახურებისთვის – უცნობია, რადგან რუსეთის პრეზიდენტის ეს გადაწყვეტილება გასაიდუმლოებულია.
გენერალ ჩერნოვის მასალებში არის პოლიტიკური პარტია „აყვავებული სომხეთის“ დამფუძნებლისა და სომხეთის ეროვნული ოლიმპიური კომიტეტის პრეზიდენტის, გაგიკ ცარუკიანის პასპორტის ასლი.
„აყვავებული სომხეთის ლიდერი მოსკოვის ხშირი სტუმარია, 2019 წლის თებერვალში კი მისმა პარტიამ ხელი მოაწერა „ედინაია როსიასთან“ თანამშრომლობის შეთანხმებას“, – წერს „დოსიე“.
როგორ და რისთვის აღმოჩნდა და ინახებოდა ცარუკიანის პასპორტის ასლი რუსეთის საგარეო დაზვერვის გენერლის საქაღალდეში, გამოძიებაში აღნიშნული არ არის. სამაგიეროდ, სტატიაში ხაზგასმულია, რომ „ხავერდოვანი რევოლუციის“ დროს, ცარუკიანმა მხარი დაუჭირა ფაშინიანს, მაგრამ შემდეგ, მისი მთავარი ოპონენტი გახდა და მას მერე პრემიერ-მინისტრის გადადგომას ითხოვს.
ეროვნული უსაფრთხოების სამსახურის რეაქცია
„ჩვენ ამ სტატიას განვიხილავთ, როგორც შეტყობინებას დანაშაულის შესახებ და მას შესაბამის სამართლებრივ მიმართულებას მივცემთ… ეროვნული უსაფრთხოების სამსახური, როგორც სამართალდამცავი სტრუქტურა, რა თქმა უნდა, სისხლისსამართლებრივ შეფასებას მისცემს ნებისმიერ ფაქტს, რომელიც მასშია აღწერილი“, – განაცხადა სომხეთის ეროვნული უსაფრთხოების სამსახურის ხელმძღვანელმა.
არგიშტი კიარამიანის თქმით, სისხლის სამართლის საქმე ჯერჯერობით აღძრული არ არის.
ჟურნალისტის კითხვაზე, სტრუქტურაში შესაძლო ლუსტრაციის შესახებ, ეროვნული უსაფრთხოების სამსახურის დირექტორმა განაცხადა:
„ეროვნული უსაფრთხოების სამსახურში ბევრი ამბიციური ოფიცერია, რომლებიც თავიანთ საქმეს ასრულებენ სომხეთის საკეთილდღეოდ, და, რა თქმა უნდა, როგორც ყველა სხვა სტრუქტურაში, არიან ადამიანები, რომლებმაც ჩვეულებრივი პროცესის შედეგად უნდა დატოვონ ეროვნული უსაფრთხოების სამსახურის რიგები. ეს პროცესი დაიწყო და ვისურვებდი, რომ ჩემი სიტყვები სწორად იყოს გაგებული. ეს ნორმალური პროცესია, ადამიანები მოდიან და მიდიან“.
რით არის უკმაყოფილო ოპოზიცია
ოპოზიციური ფრაქციის, „აყვავებული სომხეთის“ წევრმა, დეპუტატმა ივეტა ტონოიანმა ეროვნული უსაფრთხოების სამსახური იმაში დაადანაშაულა, რომ პრობლემა არ შეიქმნებოდა, „თუკი ეროვნული უსაფრთხოების სამსახური ისეთივე გულმოდგინებით დაიწყებდა გარე საფრთხეების აღკვეთასა და გახსნას, როგორც ოპოზიციონერებს უსმენს“.
მისმა თანაპარტიელმა, არმან აბოვიანმა გაიხსენა, რომ „დოსიეს“ რუსი ოპოზიციონერი, მიხაილ ხოდორკოვსკი აფინანსებს. მისი აზრით, „დოსიეს“ მიერ მოწოდებული ინფორმაცია უფრო მეტ კითხვას აჩენს, ვიდრე პასუხობს“.
