რუსეთი აფხაზეთს ფინანსურ დახმარებას უმცირებს, რათა დამოუკიდებლობა ასწავლოს

რუსეთი აფხაზეთს დოტაციებს უმცირებს 

რუსეთი აპირებს ეტაპობრივად შეამციროს აფხაზეთის ფინანსური დახმარება. მოსკოვს იმედი აქვს, რომ უახლოეს მომავალში რესპუბლიკა უფრო დამოუკიდებელ ეკონომიკურ ფორმატზე გადავა, შეამცირებს რა რუსეთის ფინანსურ დახმარებებზე დამოკიდებულებას, რომელიც მისი ბიუჯეტის თითქმის ნახევარს შეადგენს. 

რუსეთის ფედერაციის ეკონომიკური განვითარების მინისტრის მოადგილის, აფხაზეთის სოციალურ-ეკონომიკური განვითარების საინვესტიციო პროგრამების ფარგლებში, რუსეთის ბიუჯეტიდან სუბსიდირებით განხორციელებული პროექტების კურატორის, დმიტრი ვოლვაჩის აფხაზეთში გეგმურ ვიზიტს, როგორც ჩანს, სხვა მიზანიც ჰქონდა. 

აფხაზეთის ხელისუფლებასა და ოპოზიციას ორივეს ცალ-ცალკე უყვარს რუსეთი

რუსეთის სამხედრო ოპერაციის მხარდაჭერა, აფხაზეთში შიდაპოლიტიკური ბრძოლის ელემენტი გახდა

მოსკოვი აფხაზეთის ხელისუფლებას სიგნალს აძლევს, რომ უკრაინაში დაწყებული საბრძოლო მოქმედებების გამო დასავლეთის მიერ რუსეთის წინააღმდეგ დაწესებული უპრეცედენტო კოლექტიური სანქციების პირობებში, დროა რესპუბლიკამ დამოუკიდებლად ფულის გამომუშავება ისწავლოს. 

• „პუტინმა გვითხრა, რომ უნდა მოგკლათ“. როგორ დევნიან რუსეთში ომის მოწინააღმდეგეებს
• ხანგრძლივი ომი, დიპლომატია, გადატრიალება. ომის ხუთი სცენარი BBC-ის ანალიტიკოსისგან
• მოუხსნა თუ არა რუსეთმა სანქციები საქართველოს? რძის ექსპორტი და მორიგი საყვედური უკრაინისგან

დღეისათვის, პირდაპირი რუსული ინექციები აფხაზეთის ბიუჯეტის საშემოსავლო ნაწილის ნახევარს შეადგენს. ახლა კი დასახულია ამოცანა, რომ მომდევნო სამი წლის განმავლობაში თუ თვითკმარობის მიღწევა არა, რუსული დოტაციების მოცულობის საგრძნობი შემცირება მაინც მოხერხდეს. 

ალბათ, ამის შესახებ რუსმა მაღალჩინოსანმა პირადად აცნობა აფხაზეთის პრეზიდენტს, თუმცა, ასლან ბჟანიას პრესსამსახური ამ შეხვედრასთან დაკავშირებით გავრცელებულ რელიზში, ამ ფაქტს არ ახსენებს. 

მოსაზრება: აფხაზეთი და სანქციები რუსეთის წინააღმდეგ

აფხაზეთი და სანქციები რუსეთის წინააღმდეგ – აფხაზეთში JAMnews-ის რედაქტორი ინალ ხაშიგი მიიჩნევს, რომ მათ აფხაზეთს სარგებელიც კი შეიძლება მოუტანოს

თუმცა, უკვე მოსკოვში დაბრუნების შემდეგ, დმიტრი ვოლვაჩმა ვრცელი ინტერვიუ მისცა რუსეთის სახელმწიფო საინფორმაციო სააგენტო ТАСС-ს, სადაც რუსეთის ხელისუფლების გეგმების შესახებაც ისაუბრა. 

„თანამშრომლებს დავალება მივეცი და ვეუბნები რესპუბლიკების ხელმძღვანელობას (აფხაზეთისა და სამხრეთ ოსეთის): „ახლა თქვენთვის დავალება გვაქვს, რომ თქვენ ჩვენგან მეტი აღარ აიღოთ, არამედ პირიქით, ნელ-ნელა გადადგათ ნაბიჯები იქითკენ, რომ ჩვენზე ნაკლებად დამოკიდებულები გახდეთ“. ანუ ჩვენ გვინდა თანდათან შევამციროთ ხელფასების გათანაბრების მხარდაჭერა, მაგრამ ეს ისე გავაკეთოთ, რომ არ შემცირდეს ხელფასები. ამის მიღწევა მხოლოდ ეკონომიკის გაზრდით არის შესაძლებელი“.

რუსეთის ეკონომიკური განვითარების მინისტრის მოადგილეს მიაჩნია, რომ აფხაზეთმა ინვესტორები უნდა მიიზიდოს, მით უფრო, როდესაც „რესპუბლიკების მიმართ ინტერესი ყოველწლიურად იზრდება“. მაგრამ ამისათვის საჭიროა კანონმდებლობის ცვლილება, საინვესტიციო კლიმატის გაუმჯობესება, საბაჟო და საგადასახადო რეგულაციების გამარტივება. 

„ყველაფერი კარგი, რაც რუსეთშია, იქ უნდა მივიტანოთ იმისათვის, რომ გარანტირებული იყოს ინვესტორთა უფლებები, რომლებიც იქ ჩავლენ. შემდეგ კი – ისინი, ვინც იქ მუშაობს, იქვე იხდის გადასახადებს. ეს გადასახადები რესპუბლიკების ბიუჯეტში მიდის და მზარდი ბიუჯეტის გამო, ხდება გადახდები, ვითარდება ეკონომიკა“, – უზიარებს სააგენტოს საკუთარ ხედვას დმიტრი ვოლვაჩი, თუ როგორ შეუძლია აფხაზეთს გამოაცოცხლოს ადგილობრივი ეკონომიკა და ამის ხარჯზე მოახდინოს იმ დანაკარგების კომპენსირება, რომელსაც რუსეთიდან აფხაზეთის ბიუჯეტში პირდაპირი ფინანსური დახმარებების შემცირება გამოიწვევს. 

ვოლვაჩმა ამ ცვლილებების განხორციელების ვადებიც დაასახელა – სამი წელი. 

„დიდი იმედი მაქვს, რომ უახლოეს საბიუჯეტო ციკლში ჩვენ არა მხოლოდ კიდევ სამი წელი ვიცხოვრებთ და ეს რესპუბლიკები სამი წელი ჩვენთან ერთად იარსებებენ, არამედ იმისაც, რომ სამი წლის შემდეგ, ამ საბიუჯეტო ციკლის შემდეგ, ჩვენ რესპუბლიკებში მივიღებთ სახელმწიფო ადმინისტრირების, საბიუჯეტო უზრუნველყოფის, საინვესტიციო მიმზიდველობის სრულიად სხვა დონეს. დავინახავთ აფხაზეთის ნაკლებ დამოკიდებულებას რუსეთის მხარდაჭერაზე“, – განაცხადა რუსეთის ეკონომიკური განვითარების მინისტრის მოადგილემ. 

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო