ომისა და კორონავირუსის მიუხედავად, სომხეთში ტურიზმის გადარჩენას ცდილობენ

სომხეთში, 2020 წლის შემოდგომაზე მომხდარი ყარაბაღის მეორე ომისა და კორონავირუსის ეპიდემიის მიუხედავად, ტურიზმის სფეროს გადარჩენას ცდილობენ. ამისათვის, სფეროს ექსპერტების აზრით, საჭიროა ქვეყნის იმიჯის ძირფესვიანად შეცვლა და აგრესიული მარკეტინგული პოლიტიკის დაწყება. მათ მიაჩნიათ, რომ ტურიზმის სფეროს აღდგენის გარეშე, რთული იქნება საერთოდ ეკონომიკის აღდგენა.

2020 წლის იანვარ-სექტემბერში, ტურიზმის კომიტეტის ცნობით, სომხეთში ტურისტული ვიზიტების რაოდენობა 2019 წლის ანალოგიურ პერიოდთან შედარებით 75.5%-ით შემცირდა. თუმცა, 2020 წელს, ტურისტული ნაკადის 15%-იან ზრდას პროგნოზირებდნენ. 

• სომხეთმა სტრასბურგის სასამართლოში აზერბაიჯანის წინააღმდეგ სარჩელი შეიტანა
• „ჩვენ გავიმარჯვებთ“: სომხეთის ექსპრეზიდენტი არჩევნებში მონაწილეობას აპირებს

რას გვთავაზობენ სპეციალისტები

„აუცილებელია მსოფლიოს ახალ ფორმატში წარვუდგეთ, არ ვკონცენტრირდეთ ომსა და ომის შემდგომ პრობლემებზე. ეს საუკეთესო პასუხი იქნება შექმნილ ვითარებაში“, – განაცხადა 5 თებერვალს ტურიზმის სახელმწიფო კომიტეტის ყოფილმა ხელმძღვანელმა, ერმინე ზეითუნციანმა.

მისი თქმით, სომხეთი პირველი ქვეყანა არ არის, რომელმაც ომი გადაიტანა, ამიტომ, შესაძლებელია იმ სახელმწიფოების გამოცდილების გამოყენება, რომლებიც უკვე შეეჯახნენ ამ პრობლემას და გადაჭრეს ის. და ამაში შეიძლება დაგვეხმაროს აგრესიული მარკეტინგული პოლიტიკა მსოფლიოში ქვეყნის ცნობადობის გასაზრდელად:

„ჩვენ მუდმივად ვამაყობთ იმით, რომ სომხეთი პირველი ქვეყანაა, რომელმაც ქრისტიანობა მიიღო. თუმცა, ეს მხოლოდ ჩვენ ვიცით. უნდა ვისარგებლოთ არსებული კულტურულ-ისტორიული პოტენციალით“.

ამასთან, ქვეყანაში იდგმება პრაქტიკული ნაბიჯები იმ პრობლემების გადასაჭრელად, რომელიც მომსახურების სფეროში დაგროვდა. კერძოდ, სომხეთის ამერიკულმა უნივერსიტეტმა სასტუმრო ბიზნესის მართვის სფეროში ერთწლიანი საგანმანათლებლო პროგრამა წარმოადგინა. და ექსპერტების აზრით, ის სრულყოფისათვის რეალურ ცოდნასა და უნარ-ჩვევებს მისცემს მსურველს.

ტურიზმის სფეროში დასაქმებულთათვის, რომელთაც აკადემიური განათლება არ გააჩნიათ, ბუღალტერიის, მენეჯმენტის, ინგლისური ენისა და მათემატიკის სპეციალური კურსები შედგება. პროექტის მონაწილეები სპეციალურ ცოდნას მიიღებენ სასტუმრო მარკეტინგის, კორპორაციული კომუნიკაციისა და სტრატეგიული დაგეგმვის სფეროში. 

„ლექტორები იქნებიან ამერიკული უნივერსიტეტის საუკეთესო სპეციალისტები და უცხოელი მასწავლებლები. სასტუმრო ბიზნესის მოქმედი თანამშრომლებისთვის გათვალისწინებულია სწავლის სუბსიდირება 90%-ის მოცულობით. სტუდენტები ვალდებული იქნებიან, რამდენიმე სასტუმროს სტრატეგიული განვითარების გეგმა წარადგინონ და კურსის დასრულების შემდეგ, მაგისტრატურის კურსდამთავრებულის კვალიფიკაციას მიიღებენ“, – განაცხადა ერმინე ზეითუნციანმა.

როგორ გავზარდოთ ორჯერ ტურისტული ნაკადი?

სომხეთის ტურიზმის ფედერაციის ხელმძღვანელს, მეხაკ აპრესიანს მიაჩნია, რომ 2024 წლისთვის სომხეთში ტურისტული ნაკადის გასაორმაგებლად, საჭიროა კომპლექსური პროგრამის განხორციელება:

• გატარდეს ინსტიტუციური რეფორმები;
• გაუმჯობესდეს კონკურენტული გარემო;
• გატარდეს აგრესიული მარკეტინგული სახელმწიფო პოლიტიკა დიასპორის პოტენციალის გამოყენებით.

ამ მიზნით, მეხიკ აპრესიანის აზრით, სასურველია გამოიყოს ყოველწლიურად იმ თანხის 1% მაინც, რომელსაც ტურიზმის სფერო იხდის ბიუჯეტში გადასახადების სახით ანუ დაახლოებით, 3 მილიონი დოლარი.

ის დარწმუნებულია, რომ ტურიზმის სფერო ყველაზე მეტად დაზარალდა კორონავირუსის პანდემიისგან:

„აუცილებელია სფერო უმოკლეს ვადებში აღდგეს, რათა არ დავუშვათ კრახი. აუცილებელია გვესმოდეს, რომ ტურიზმის სფერო – ქვეყნის ეკონომიკის ერთ-ერთი კატალიზატორია. მის გარეშე არაფერი გამოვა“.

ომის შემდეგ კი უნდა დავუმტკიცოთ ტურისტებს, რომ სომხეთში დასვენება უსაფრთხოა, ამბობს აპრესიანი:

„მნიშვნელოვანია ყველაფერი გავაკეთოთ, რათა ომის შემდეგ არ აღმოვჩნდეთ ტურისტული ვიზიტებისთვის არასასურველ ქვეყანათა სიაში“.