თამთა მიქელაძე: პროევროპული პროტესტის გამარჯვებას სამი პირობა სჭირდება
რა სჭირდება გამარჯვებას
“ქართული ოცნების” მიზანი არა მხოლოდ ძალაუფლების შენარჩუნებაა იანვრამდე, არამედ ძალაუფლების შენარჩუნება ხანგრძლივად. ხანგრძლივად ძალაუფლების შენარჩუნებისთვის კი მას სჭირდება მინიმუმ 29 ნოემბრამდე არსებული სტატუს ქვოს დაბრუნება, წერს თავის ფეისბუკ-გვერდზე სოციალური სამართლიანობის ცენტრის ერთ-ერთი დამფუძნებელი, თამთა მიქელაძე.
ექსპერტი მიიჩნევს, რომ “ოცნებისთვის” ძალაუფლების დიდი ხნით შენარჩუნება შეუძლებელია, რადგან “ერთ თვეში ამ პოლიტიკურმა ძალამ მიიღო: 1. მზარდი საერთაშორისო არ აღიარება და წნეხი; 2. სანქციები და უფრო მაღალი სანქციების მუქარა; 3. უწყვეტი პროტესტები; 4. კატასტროფულად გარღვეული ნდობა საზოგადოების და ელიტების შიგნით; 5. შიდა კონფლიქტები და გლოვა”.
თამთა მიქელაძის აზრით, ძალაუფლების შესანარჩუნებლად ქართულ ოცნებას შეუძლია რამდენიმე დრამატული ნაბიჯი გადადგას, თუმცა ამით კიდევ უფრო დაკარგავს მხარდამჭერებს:
“1. რეპრესიული კონსოლიდირებული ავტორიტარიზმის მშენებლობის გზაზე დადგომა და პროტესტის კიდევ უფრო მძიმე სისხლით ჩახშობა. 2. რუსეთთან, დსთ-თან, აღმოსავლეთთან თანამშრომლობის გაფართოება და ინსტიტუციონალიზება. მაგრამ ამ ორ გადაწყვეტილებას აქვს ერთი რისკი – ეს მას ელექტორალურ ბაზას სრულად ჩამოუნგრევს. ამიტომაც ამას ის ვერ ბედავს” .
ექსპერტი მიიჩნევს, რომ საბოლოოდ, ეს პოლიტიკური ძალა ჩიხშია.
“ამიტომ “ქართული ოცნება”, რომ ვერ აღწევს საკუთარ მიზანს, ეს უნდა დავიჯეროთ, მაგრამ ჩვენს გამარჯვებას სჭირდება მინიმუმ სამი ახალი პირობა,” – წერს იგი.
ეს სამი პირობაა:
1. პროტესტის საყოველთაობა და ახალი სოციალური კლასების და თემების ჩართვა პროტესტში. ანუ პროტესტის გაფართოება და უთანხმოებაში საზოგადოების სხვადასხვა ჯგუფების შემოყვანა;
2. პოლიტიკური სპექტრის გაჯანსაღება და რეალური, “სუფთა” და შინაარსიანი ალტერნატივების შექმნა;
3. მედია კლიმატის გაჯანსაღება და ისეთი შინაარსებისთვის სივრცის მიცემა, რომელიც დეპოლარიზაციას შეუწყობს ხელს. ანუ ისეთი შინაარსების შეტანა, რომელიც “ქართული ოცნების” პროპაგანდას ნამდვილი შინაარსით ჩაანაცვლებს და “ქართული ოცნების” მხარდაჭერებს დაანახებს, რომ ისინიც უფრო სამართლიან სახელმწიფოში იცხოვრებენ და მათთვისაც ვშრომობთ.
