რა უფრო მნიშვნელოვანია სკოლაში სწავლისთვის - ბიბლია თუ ბიზნესის საფუძვლები? დისკუსია აფხაზეთში
ბიბლია აფხაზეთის სკოლებში
აფხაზეთში განათლების მინისტრი გამოვიდა წინადადებით, დაიწყოს „წმინდა წერილის“ და მართლმადიდებლობის სკოლებში სწავლება, საპასუხოდ კი კრიტიკის ქარცეცხლი მიიღო. მას შეახსენეს ყველა აღმსარებლობის სამართლებრივი თანასწორობა და ის, რომ არასრულწლოვანთათვის რელიგიის სწავლება აკრძალულია მათი ნების საწინააღმდეგოდ და მშობლების თანხმობის გარეშე. მინისტრს ასევე მიაწოდეს ინფორმაცია განათლების სისტემაში არსებულ ბევრ მნიშვნელოვან პრობლემაზე, რომელიც სასწრაფო გადაწყვეტას მოითხოვს.
ეს ყველაფერი 26 ოქტომბერს, ერთ დღეში მოხდა. დილით განათლების მინისტრმა ინალ გაბლიამ სოხუმის სასულიერო სასწავლებელში მოსწავლეთა ახალი ნაკადის ჩარიცხვის ოფიციალურ ცერემონიაზე განაცხადა, რომ „აფხაზეთის სკოლები მზად არიან, სასწავლო პროგრამაში “წმინდა წერილი” დაამატონ“.
„ეს არ არის დროის მოთხოვნა, ეს არის ჩვენი მოვალეობა, როგორც მართლმადიდებელი ხალხის, როგორც ადამიანების, რომლებიც ცხოვრობენ წმინდა მიწაზე, სადაც ქადაგებდნენ იესო ქრისტეს მოციქულები. ჩვენი ამოცანაა, ეს ცოდნა მივიტანოთ მასებში, ახალგაზრდა თაობაში, რათა მათ ეს ყველაფერი სკოლიდანვე გაიგონ“, – განაცხადა მინისტრმა და მაგალითად ბელარუსი მოიყვანა, სადაც, მისი თქმით, სკოლებში ბიბლიას ასწავლიან.
ამ განცხადების შემდეგ, სოციალური ქსელები პირდაპირი მნიშვნელობით აფეთქდა – ხელისუფლების ერთგულმა მხარდამჭერებმაც კი დაიწყეს საუბარი ინალ გაბლიას გადაყენების აუცილებლობაზე.
„ბავშვებს უნდა ასწავლონ კანონები, ბიზნესის საფუძვლები და ფინანსები“ – ამის შესახებ აფხაზი პოლიტიკოსი ადგურ ლაგვილავა წერს. მან ასევე შესთავაზა მინისტრს, სკოლაში დროის ნაწილი დაეთმო ბავშვების ტრადიციული აფხაზური ღირებულებების, აფსუარის საპატიო კოდექსის გაცნობისთვის.
„მინდა შევახსენო განათლების მინისტრს, რომ აფხაზეთი საერო ქვეყანაა და ჩვენს ქვეყანაში ყველა რელიგია თანასწორია. არსებობს რელიგიური განათლების ცალკე საგანმანათლებლო დაწესებულებები. ბელარუსა აქვს კარგი IT განათლება – სწორედ აქედან უნდა აიღოთ მაგალითი. ბავშვებს უნდა ჰქონდეთ ცოდნა და უნარ-ჩვევები, რაც მათ მომავალში მათი პოტენციალის რეალიზებაში დაეხმარება – განათლებული ადამიანი როგორმე დამოუკიდებლად, თქვენი ჩარევის გარეშე გაუმკლავდება რელიგიურ მრწამსს“, – წერს ლაგვილავა.
- “ჩემი დიდი ბაბუა სელიკუ ხაშიგი მუსლიმი იყო, ბებიაჩემი კი ქრისტიანი” – წერილი აფხაზთიდან
- რეპატრიაცია აფხაზეთში: მითები და რეალობა
- ძროხები, ომი და რწმენა: კრიშნას მიმდევარი ფერმერის ამბავი აზერბაიჯანული სოფლიდან
“განათლების მინისტრი აფხაზეთის განათლების პრობლემაა”
ეს არის ციტატა ცნობილი აფხაზი ბლოგერის, თენგიზ ჯოპუას პოსტიდან.
„ამ ადამიანს არ აქვს ელემენტარული წარმოდგენა მეცნიერულსა და რელიგიურ მსოფლმხედველობებს შორის განსხვავებაზე და მათ როლზე ადამიანის პიროვნებად ჩამოყალიბებაში. ის ვერ ხედავს განსხვავებას საერო სახელმწიფოსა და ეკლესიას შორის. ის ქადაგებს ერთი აღმსარებლობის მონოპოლიზაციას მრავალკონფესიურ სოციალურ გარემოში. თეოლოგიის საწინააღმდეგო არაფერი მაქვს, მაგრამ უმჯობესია ჩვენს მინისტრთან ერთად განათლების სისტემის მიღმა დარჩეს“, – განაცხადა ჯოპუამ.
ინალ გაბლია აფხაზეთის მთავრობის ყველაზე ახალგაზრდა და, ალბათ, ყველაზე წინააღმდეგობრივი წევრია. მან მინისტრის პორტფელი 28 წლის ასაკში მიიღო ისე, რომ ამ სფეროში აბსოლუტურად არანაირი გამოცდილება არ ჰქონია. აფხაზეთში ამბობენ, რომ გაბლიას ასეთი კარიერული წინსვლა განპირობებულია იმით, რომ მისი მამა პრეზიდენტ ასლან ბჟანიას ახლო მეგობარია.
26 ოქტომბრის საღამოს განათლების სამინისტროს პრესსამსახურმა განცხადება გაავრცელა, სადაც წერია, რომ „საუბარი იყო არჩევით კურსზე, რომელსაც მოსწავლეებისთვის შეეძლო გაეცნო მართლმადიდებლობის მორალური და ეთიკური ნორმები“.
კომენტარი
აფხაზი ჟურნალისტი ელეონორა გილოიანი
აფხაზეთში ოფიციალური დასვენების დღეებია ქრისტიანული, მუსლიმური და წარმართული დღესასწაულები. მე ვარ სომეხი, მონათლული მართლმადიდებლურ ეკლესიაში და ვოცნებობ ჩვენს ქვეყანაში სრულფასოვანი მეჩეთი მქონდეს. მიხარია, რომ კათოლიკეებს საკუთარი სახლი აქვთ. და მეღიმება, როცა ბუდისტებს ვხედავ.
მეჩვენება, რომ ეს გამოწვეულია იმით, რომ ჩვენ ყველაფერი ასე გვაქვს მოწყობილი. ასე აღმზარდა აფხაზეთმა. და ვაფასებ ამას, რადგან ვიცი – ეს სხვანაირად ხდება.
ორიოდე თვე ვცხოვრობდი და ვსწავლობდი ერევანში, ჩვეულებრივ სომხურ სკოლაში, სადაც ბავშვები ბიბლიას სასკოლო გაკვეთილად აბარებენ. კლასში 30 ბავშვიდან ყველა ეროვნებით სომეხი და ქრისტიანი იყო – აქ საუბარია ოჯახებზე, სადაც დედებსა და მამებს, ბებიებსა და ბაბუებს ერთი და იგივე იდენტობა აქვთ. გამონაკლისები იშვიათია.
2015 წელს სომხეთმა შეცვალა კონსტიტუცია და მოხსნა დებულება, რომ „სომხეთის რესპუბლიკა არის სეკულარული სახელმწიფო“. კონსტიტუციის მე-18 მუხლში სომხეთი აღიარებს სომხური სამოციქულო ეკლესიის განსაკუთრებულ მისიას და „გამოყოფს მას სხვა რელიგიურ ორგანიზაციებს შორის“.
პირველი, რასაც სომხეთში ჩემი სომეხი ნათესავები მეკითხებიან, არის თუ არა ჩემი ქმარი ქრისტიანი და სად მოინათლა. და ისინი გულწრფელად ნერვიულობენ, რომ ის ემორჩილება აფხაზურ ტრადიციულ რელიგიას, არ არის მონათლული და არც გეგმავს.
რატომ ეს ექსკურსია? ასე გამოიყურება სკოლებში რელიგიის შესწავლასთან დაკავშირებული ინიციატივა, როცა ის გამართლებულია ისტორიულად და კულტურულად. აფხაზეთი სულ სხვა ამბავია, ჩვენ უნდა ვიყოთ განსხვავებული – ამაში არის სიღრმე, ძალა და უსაფრთხოებაც კი.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
