"საქართველო რუსეთს არანაირი გზით არ დაეხმარება" - ქართული დელეგაცია კიევს ეწვია
ქართული დელეგაცია კიევს ეწვია
დასრულდა ქართული საპარლამენტო დელეგაციის ვიზიტი კიევში. უკრაინის რადის თავმჯდომარემ რუსლან სტეფანჩუკმა და საქართველოს პარლამენტის თავმჯდომარემ შალვა პაპუაშვილმა კიევში შეხვედრის შემდეგ ბრიფინგი გამართეს, სადაც რუსლან სტეფანჩუკმა მადლობა გადაუხადა შალვა პაპუაშვილს სოლიდარობისა და მხარდაჭერისთვის, პაპუაშვილმა კი განაცხადა, რომ რუსეთმა უნდა დაასრულოს ეს ომი და პატივი სცეს უკრაინის ტერიტორიულ მთლიანობას. საუბარი შეეხო სანქციებსაც, საქართველოს პარლამენტის თავმჯდომარემ თქვა, რომ საქართველო რუსეთს არანაირი გზით არ დაეხმარება.
„ჩვენ ცხადად გვესმის სად ვართ, რომელ მხარეს და ჩვენ კარგად გვესმის რომ ერთ მხარეს უკრაინასთანაა ევროკავშირი, ისევე როგორც მთელი სამყარო.
ჩვენთვის ძალიან მკაფიოა სად ვდგავართ 2008 წლის შემდეგ – მას შემდეგ, რაც ჩვენ იგივე სიტუაცია გვქონდა“, – აღნიშნა პაპუაშვილმა.
როგორც უკრაინის რადა აცხადებს, საქართველოს პარლამენტმა უკრაინა დაარწმუნა, რომ დღევანდელი პირადი შეხვედრით „ყველაფერი საბოლოოდ გაირკვა.“
“მოხარული ვარ, ვუმასპინძლო შალვა პაპუაშვილს, რომელიც კიევში საპარლამენტო დელეგაციასთან ერთად ჩამოვიდა. დარწმუნებული ვარ, რომ ჩვენი შეხვედრა ხელს შეუწყობს საქართველოსა და უკრაინას შორის ორმხრივი ურთიერთობების განმტკიცებას, რასაც ხალხი ელოდება.
შეხვედრაზე განვიხილეთ აგრესორ ქვეყანაზე სანქციების დაწესების საკითხი, უკრაინისა და საქართველოს ევროკავშირში ინტეგრაციის მომავალი და უკრაინის აღდგენის პროცესში შესაძლო დახმარება. მადლობა საქართველოს პარლამენტის თავმჯდომარეს ვიზიტისთვის, მნიშვნელოვანია სოლიდარობის და მხარდაჭერის ჩვენება.
მინდა დაგარწმუნოთ, რომ უკრაინის ხელისუფლებასა და ხალხში საქართველოს ტერიტორიული მთლიანობისა და სუვერენიტეტის მხარდაჭერა ძლიერია და ასეც გაგრძელდება“, – დაწერა შეხვედრის შემდეგ უკრაინის რადის თავმჯდომარემ, რუსლან სტეფანჩუკმა.
შალვა პაპუაშვილმა ასევე აღნიშნა, რომ “გვახსენდება, ჩვენი საკუთარი “ბუჩები” 1990-იან წლებსა და 2008 წელს.”
“რთულია სიტყვებით აღწერო ის, რაც ჩვენ საკუთარი თვალით ვნახეთ და რასაც ყველა უყურებს ბუჩაში, ირპენსა და კრამატორსკში. თუმცა არსებობს ბევრი უკრაინული ქალაქი მსგავსი საშინელი ისტორიებით, რომლის შესახებაც ჯერ არავის მოუსმენია. ჩვენ, ქართველებს ამ ყველაფრის ყურებისას გვახსენდება ჩვენი საკუთარი “ბუჩები” 1990-იან წლებსა და 2008 წელს, როდესაც ჩვენი ქალაქებიც დაინგრა”, – განაცხადა პაპუაშვილმა.
● მშვიდობიანი მოსახლეობის ხოცვა-ჟლეტა უკრაინაში. ფოტო
● საქართველოს პრემიერი: ჯერ კიდევ 25 თებერვალს ვამბობდი, რომ ამ ომით უკრაინა დაისჯებოდა
● აბა ომი გინდათ?! – ვინ და რატომ აძლიერებს საქართველოში ომის ბუნებრივ შიშს? ექსპერტების შეფასებები
საქართველოსა და უკრაინას შორის ურთიერთობა ჯერ კიდევ ომის დაწყებიდან მეორე დღეს დაიძაბა, როდესაც საქართველოს პრემიერმა განაცხადა, რომ ქვეყანა რუსეთის წინააღმდეგ სანქციებს არ უერთდება. ღარიბაშვილმა ასევე განაცხადა, რომ უკრაინამ ომი ვერ აიცილა და ამის გამო ყველაზე მეტად უკრაინელი ხალხი, სახელმწიფო დაზარალდება.
იმავე დღეს, რუსეთის ფედერაციის საბჭოს საერთაშორისო საქმეთა კომიტეტის თავმჯდომარემ, გრიგორი კარასინმა შეაქო საქართველოს ხელისუფლება უკრაინის საკითხზე პოზიციის გამო. საქართველოს რეაქციას დასავლეთის ანტირუსულ სანქციებზე კარასინმა “გაწონასწორებული” უწოდა და ხაზგასმით აღნიშნა, რომ რუსეთში „ეს ფაქტი შეუმჩნეველი არ დარჩება“.
ამის შემდეგ პრეზიდენტმა ზელენსკიმ საქართველოდან უკრაინის ელჩი ჯერ დროებით, შემდეგ კი საბოლოოდ გაიწვია.
ბოლო სკანდალი საქართველოსა და უკრაინას შორის უკრაინული დაზვერვის განცხადებას უკავშირდება, რომლის მიხედვით, რუსეთი კონტრაბანდის მარშრუტს საქართველოს ტერიტორიის გავლით აყალიბებს. მათი განმარტებით, საქართველოს პოლიტიკური ხელმძღვანელობა რუსეთთან შეთანხმებულია საკუთარი ტერიტორიის გავლით სანქცირებული პროდუქტების კონტრაბანდის სახით შეტანაზე.
საქართველოს სახელმწიფო უსაფრთხოების სამსახური უკრაინის დაზვერვის მიერ გავრცელებულ ინფორმაციას გამოეხმაურა და მოუწოდა უკრაინულ მხარეს, დაუყოვნებლივ მიაწოდონ ინფორმაციის დამადასტურებელი მტკიცებულებები მათზე სამართლებრივი რეაგირების მიზნით.
რამდენიმე დღის წინ, ირაკლი კობახიძემ უკრაინის ხელისუფლებას სამი პირობა წაუყენა, რომელთა დაკმაყოფილების შემთხვევაშიც, შესაძლოა საპარლამენტო დელეგაცია უკრაინაში ჩასულიყო. პირობებს შორის იყო ბოდიში კონტრაბანდაზე, ელჩის გაწვევა და ყოფილი ქართველი მაღალჩინოსნების თანამდებობებიდან გათავისუფლება.
საბოლოოდ სიტუაცია უკრაინის რადას სპიკერის და შალვა პაპუაშვილის ონლაინშეხვედრამ განმუხტა, სადაც გადაწყდა, რომ საქართველოდან უკრაინაში საპარლამენტო დელეგაცია გაემგზავრებოდა.
