პროტესტი აფხაზეთში - ასლან ბჟანიას თანაშემწე თბილისთან „საიდუმლო მოლაპარაკებებში“ დაადანაშაულეს

სოხუმში, ორასზე მეტი ადამიანი შეიკრიბა მას შემდეგ, რაც ცნობილი გახდა ინფორმაცია იმის შესახებ, რომ პრეზიდენტის თანაშემწე ეკონომიკურ საკითხებში, ბენურ კვირაია აფხაზეთიდან საიდუმლო მოლაპარაკებებზე საქართველოს კონტროლირებად ტერიტორიაზე გადავიდა. სოციალურ ქსელებში გავრცელდა ინფორმაცია, რომ კვირაია ჯერ კიდევ 25 თებერვალს გაემგზავრა ორი ადამიანის თანხლებით.

„წინასაარჩევნო კამპანიის დაწყებიდან მოყოლებული, პრეზიდენტი ბჟანია თანმიმდევრულად ცდილობს დანერგოს საზოგადოების გონებაში მოსაზრება, რომ ჩვენი ახალი გზა – მრავალმხრივი დიალოგია საქართველოსთან, და ამ იდეის პრაქტიკაში განხორციელებას ფაქტობრივად ხელისუფლებაში მოსვლისთანავე შეუდგნენ. ბჟანიამ გარშემო ის ადამიანები შემოიკრიბა, რომლებიც მის შეხედულებას იზიარებენ საქართველოსთან მიმართებით. უკვე არანაირი ეჭვი არ არსებობს იმასთან დაკავშირებით, რომ ეს ეროვნული ინტერესების პირდაპირი ღალატია“, – ნათქვამია ოპოზიციური ორგანიზაცია „აფხაზეთის სახალხო მოძრაობის“ განცხადებაში, რომელსაც გაერთიანებული ოპოზიციის ლიდერი, ადგურ არძინბა უდგას სათავეში.

ოპოზიციამ განაცხადა, რომ ბჟანიასგან განმარტებებს ელოდება.

„ბჟანიამ წითელი ხაზი გადაკვეთა, რომელიც მას მორალურ უფლებას ართმევს, ფლობდეს უფლებამოსილებას, რომელიც აფხაზეთის კონსტიტუციის 53-ე მუხლით არის გაწერილი, განსაკუთრებით, ქვეყნის საგარეო პოლიტიკის განსაზღვრის მიმართულებით“.

• მოსაზრება: ქართულ-აფხაზური კონფლიქტი ყარაბაღის მეორე ომის პრიზმაში
• „გამოვიდეთ ქართული ეკლესიიდან“ – აფხაზეთის მართლმადიდებელი ეკლესია რუსეთისგან სტატუსს ითხოვს
• გამოკითხვა: ქართველები მზად არიან აფხაზებთან პირდაპირი დიალოგისთვის?

სიტუაციას ამწვავებს სოციალურ ქსელებში გავრცელებული ვიდეო, რომელშიც ბენურ კვირაია თავისი მეგობრის სადღეგრძელოს სვამს, ვინმე დავით კვარაცხელიასი. ის ეროვნებით ქართველი აღმოჩნდა, რომელიც მონაწილეობას იღებდა აფხაზეთის ომში და ქართულ მხარეს იბრძოდა. ბენურ კვირაია ვიდეოში ამტკიცებს, რომ მან საფუძველი ჩაუყარა ახალი პარკის მშენებლობას კვარაცხელიას პატივსაცემად.

დაწყებულ სკანდალზე ხელისუფლებამ ოპერატიული რეაგირება მოახდინა.

ასლან ბჟანიას პრესსამსახურის ცნობით, ბენურ კვირაიამ 19 თებერვალს „მოიხსნა პრეზიდენტის თანაშემწის უფლებამოსილება და მისთვის არავის დაუვალებია საქართველოს ხელისუფლებასთან მოლაპარაკებების წარმოება“.

ეს პირველი სკანდალი არ არის, რომელშიც ასლან ბჟანიას თანაშემწეები ფიგურირებენ.

2020 წლის აგვისტოში, ბჟანიას თანაშემწემ საერთაშორისო ურთიერთობების საკითხებში, ახრა არძინბამ საკუთარი ავტომობილით, ტარანით გაიტანა რუსეთ-აფხაზეთის საზღვარზე საკონტროლო-გამშვები პუნქტი.

მოგვიანებით, ახრა არძინბა რუსეთის სასამართლომ სოჭში დააპატიმრა ათი დღით და მას 100 ათასი რუბლის (1500$) ჯარიმა დააკისრა, რუსეთის საზღვრის უკანონო გადაკვეთის გამო.

იმავე 2020 წლის აგვისტოში, ასლან ბჟანიას კიდევ ერთი თანაშემწის, ლაშა საკანიას ხელშეწყობით, აფხაზეთში არალეგალურად ჩავიდნენ ქართული პარტიის, „პატრიოტთა ალიანსის“ ლიდერები, ირმა ინაშვილი და გიორგი ლომია, რომლებმაც ილორის ღვთისმშობლის ტაძარს ხატი შესწირეს.

ორივე სკანდალის შედეგად, თანაშემწეებმა საკუთარი ნებით დატოვეს თანამდებობა.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო