"პროპაგანდა და დეზინფორმაცია"- სახელმწიფო მდივანმა ბლინკენმა აფხაზების პროვოცირება მოახდინა?
ბლინკენი და ქართულ-აფხაზური კონფლიქტი
აშშ-ს სახელმწიფო მდივნის, ენტონი ბლინკენის განცხადებებს 2008 წლის “აგვისტოს” ომის 14 წლისთავთან დაკავშირებით, აფხაზეთმა უწოდა “პროპაგანდა, რამაც შეიძლება ესკალაცია გამოიწვიოს”.
„2008 წლიდან ჩვენ ვიხსენებთ მათ, ვინც დაიღუპა და დაიჭრა რუსეთის ჯარების მიერ. ათწლეულების განმავლობაში საქართველოს მოქალაქეები აფხაზეთსა და სამხრეთ ოსეთში რუსეთის ოკუპაციის პირობებში ცხოვრობენ. ათიათასობით ადამიანი იძულებითი გადაადგილების, დევნისა და სიღარიბის მსხვერპლი გახდა. მათ სიცოცხლე და საარსებო საშუალება წაართვეს“, – განაცხადა ბლინკენმა საიუბილეო დღეს, 8 აგვისტოს.
მან ხაზგასმით აღნიშნა, რომ „რუსეთის არაპროვოცირებული შეჭრა უკრაინაში მიმდინარე წელს აჩვენებს საქართველოსა და უკრაინის ხალხებისთვის სოლიდარობის მნიშვნელობას“.
„საქართველოს ხალხმა ძალიან კარგად იცის თუ რა გაუგონარ სიძნელეებსა და დესტრუქციას იწვევს რუსეთის აგრესიული ქმედებები. ეს მოიცავს დეზინფორმაციას, ე.წ „ბორდერიზაციას“ და ხალხის იძულებით მასობრივ გადაადგილებას. ამ ყველაფერმა გაუთვლელი გაჭირვება და ნგრევა გამოიწვია“.
“ეს არის დეზინფორმაცია” – აფხაზი კონფლიქტოლოგები
„სამწუხაროდ, თავად სახელმწიფო მდივნის ბლინკენისა და მის მიმართ სოლიდარული კომენტატორების განცხადება არსებითად დეზინფორმაციის წყაროა“, – განაცხადა აფხაზმა პოლიტოლოგმა ლიანა კვარჩელიამ.
„ქართულ-აფხაზურ და ქართულ-ოსურ კონფლიქტებს დიდი ისტორია აქვს.
ისინი 2008 წლამდე ბევრად ადრე დაიწყო, როდესაც საქართველო, პრეზიდენტ სააკაშვილის ხელმძღვანელობით, შურისძიებას და სტატუს კვოს შეცვლას ცდილობდა. და ჩამოყალიბდა საქართველოს მიერ გაჩაღებული რამდენიმე ომის შემდეგ.
ქართულ-აფხაზური კონფლიქტის შემთხვევაში მაინც უნდა დავუბრუნდეთ 1992 წელს. სწორედ მაშინ მოხდა, როგორც ბატონმა ბლინკენმა თქვა, ქართული ჯარების არაპროვოცირებული შეჭრა აფხაზეთში.
სამწუხაროდ, უკრაინის მოვლენებს დასავლელი და უკრაინელი პოლიტიკოსები პოსტსაბჭოთა სივრცეში გაყინული კონფლიქტების გასაღვივებლად იყენებენ.
ჩვენ არაერთხელ მოვისმინეთ ზოგიერთი უკრაინელი და ევროპელი პოლიტიკოსის მოწოდება მეორე ფრონტის გახსნის შესახებ. სინამდვილეში, ბლინკენი იგივეს აკეთებს, მაგრამ სხვა სიტყვებით.
აშშ-ის სახელმწიფო მდივანი, რეალურად, ქართულ-აფხაზურ კონტექსტში არსებული სტატუს კვოს შეცვლას ითხოვს.
ხალხებისა და სახელმწიფოების დაყოფა იმის მიხედვით, ვისი ცხოვრებაა მნიშვნელოვანი და ვისი უმნიშვნელო, ასევე ძალიან სამწუხაროა. შეუძლებელია მდივან ბლინკენს არ ესმოდეს, რომ პოლიტიკური სტატუს კვოს შეცვლის მცდელობა საომარი მოქმედებების განახლებას გამოიწვევს.
სამწუხაროდ, დღეს მსოფლიოში დომინირებს ცრუ მტკიცება, რომ საქართველოს კონფლიქტი არ აქვს აფხაზეთთან და ეს არის მხოლოდ კონფლიქტი რუსეთსა და საქართველოს შორის. ამ ცრუ მიდგომამ, უკრაინის მოვლენებთან დაკავშირებით, თითქოს მეორე სიცოცხლე შეიძინა“.
- საქართველოში აფხაზეთში ქართველების გენოციდის აღიარების კამპანია დაიწყო. საზოგადოების ნაწილი წინააღმდეგია
- მშვიდობის ოაზისი “მეორე ფრონტის” ნაცვლად. მოსაზრება აფხაზეთიდან
- ქართულ-აფხაზური არაფორმალური დიალოგის მონაწილეთა წინადადება
- კომენტარი აფხაზეთიდან: “არ გვინდა, სხვა ქვეყნის ქსეროასლი გაგვხადონ”
აფხაზმა პოლიტოლოგმა ასტამურ ტანიამ ენტონი ბლინკენის განცხადებებს “ჩვეულებრივი პროპაგანდა” უწოდა.
„აშშ-ს სახელმწიფო მდივნის განცხადება, ისევე როგორც საქართველოს ხელისუფლების წარმომადგენლების განცხადებები, არსებითად ახალს არ შეიცავს. შესაბამისად, ისინი ხელს არ უწყობენ ქართულ-აფხაზური კონფლიქტის მოგვარებას.
ამგვარი პროპაგანდა აჩვენებს, რომ აფხაზეთის ხელმძღვანელობას, პოლიტიკოსებს, ექსპერტებს და მთლიანად საზოგადოებას სჭირდება უფრო აქტიურად შეიტანოს მსოფლიო საინფორმაციო სივრცეში ქართულ-აფხაზური კონფლიქტის წარმოშობისა და განვითარების რეალური ისტორიული სურათი.
ეს კონფლიქტი 15 წლის არ არის, როგორც ახლა ცდილობენ წარმოაჩინონ. და ეს უკავშირდება აფხაზი ხალხის მრავალწლიან ბრძოლას თვითგადარჩენისა და საკუთარი უფლებებისთვის. კონფლიქტი ასევე დაკავშირებულია საქართველოს მცდელობებთან, ჩაშალოს ეს მისწრაფებები, მათ შორის სამხედრო ძალითა და სანქციებით.
ისტორიის პროპაგანდით ჩანაცვლება არ იწვევს ხალხებს შორის ნორმალური კეთილმეზობლური ურთიერთობების დამყარებას. იმედია, პოლიტიკოსები ამას რაც შეიძლება მალე მიხვდებიან“.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
სახელმწიფო მდივანი ბლინკენი და ქართულ-აფხაზური კონფლიქტი
