პოლიტიკურ პარტიებს ბოლო 8 თვის ფინანსური ანგარიშების წარდგენა დაევალათ
პარტიებს ფინანსური ანგარიშების წარდგენა დაევალათ
ანტიკორუფციულმა ბიურომ პოლიტიკურ პარტიებს ბოლო 8 თვის ფინანსური ანგარიშების წარმოდგენა დაავალა. ამის შესახებ ბიუროს ხელმძღვანელმა, რაჟდენ კუპრაშვილმა განაცხადა. მისივე თქმით, ოპოზიციური პარტიების დიდი ნაწილი დაფინანსებას სრულად ან ნაწილობრივ არ ასაჯაროებს.
დღესვე ცნობილი გახდა, რომ მოძრაობა “თავისუფლების მოედნის” 24 წევრს, დამფუძნებელ ლევან ცუცქირიძესა და ორგანიზაცია “აღმოსავლეთ ევროპის ცენტრს მრავალპარტიული დემოკრატიისთვის” დღეიდან “ფინანსური გამჭვირვალობის უზრუნველყოფა” ანუ ანტიკორუფციული ბიუროსთვის ფინანსური ანგარიშების წარდგენა დაევალათ.
“ანტიკორუფციული ბიუროს მიერ განხორციელებული მონიტორინგის შედეგად, გამოვლინდა, რომ პოლიტიკური პარტიები: ევროპული საქართველო, სტრატეგია აღმაშენებელი, ნაციონალური მოძრაობა, გირჩი-მეტი თავისუფლება, ლელო, ხალხისთვის, ახალი და დროა დაფინანსებას სრულად ან ნაწილობრივ არ ასაჯაროებენ. ამავდროულად, შესაძლოა, მათი საარჩევნო კამპანიები და აქტივობები ფინანსდებოდეს უცხოური დონორი ორგანიზაციების მიერ, ან სხვა წყაროებიდან, რომლებიც, თავის მხრივ, თანხებს ამ პარტიებთან დაკავშირებულ არასამთავრობო ორგანიზაციებსაც უხდიან.
ამ სქემით, უცხოური ფულით პარტიებისა და პროცესის მხარდაჭერა სამართლიანი საარჩევნო პროცესისთვის საფრთხეს წარმოადგენს […] საქართველოს კანონმდებლობით, საქართველოს მოქალაქეობის არმქონე ფიზიკური პირისგან და საქართველოში, ან მის ფარგლებს გარეთ რეგისტრირებული იურიდიული პირისგან პოლიტიკური პარტიების დაფინანსება აკრძალულია.” – თქვა რაჟდენ კუპრაშვილმა.
რაჟდენ კუპრაშვილმა 27 აგვისტოს გამართულ ბრიფინგზე აღნიშნა, რომ ე.წ. დემოკრატიის ფესტივალის საქმეზე მიმდინარეობს მტკიცებულებების მოპოვების პროცესი და საქმეზე მიღებული შემაჯამებელი გადაწყვეტილება საზოგადოებისთვის ცნობილი გახდება.
“დემოკრატიის ფესტივალი იმართება არასამთავრობო ორგანიზაცია აღმოსავლეთ ევროპის ცენტრის მრავალპარტიული დემოკრატიის ორგანიზებით და დანიის პარტიებისა და დემოკრატიის ინსტიტუტის მხარდაჭერით.
საქმეზე მოპოვებული მტკიცებულებებით, გვაქვს საფუძველი ვივარაუდოთ, რომ აღნიშნული ფესტივალი ატარებს პოლიტიკური ხასიათს და მიმართულია კონკრეტული მონაწილე პარტიების მხარდაჭერისკენ. ფესტივალზე მიწვეული იყო პოლიტიკური პარტიების მხოლოდ ნაწილი და ყველა პარტიას არ ჰქონდა მონაწილეობის შესაძლებლობა, ამასთან, ე.წ. ფესტივალში მონაწილეობდნენ მხოლოდ ის არასამთავრობო ორგანიზაციები, რომელთა საქმიანობაც მიმართული კონკრეტული პოლიტიკური პარტიების მხარდაჭერისა ან მხარდაჭერისგან თავის შეკავებისკენ.
აღნიშნულ საქმეზე მიმდინარეობს მტკიცებულებების მოპოვების პროცესი და საქმეზე მიღებული შემაჯამებელი გადაწყვეტილება საზოგადოებისთვის იქნება ცნობილი”. – თქვა კუპრაშვილმა.
7 აგვისტოს აღმოსავლეთ ევროპის ცენტრმა მრავალპარტიული დემოკრატისთვის (EECMD) განცხადება გამოაქვეყნა, სადაც ორგანიზაცია ქართული ოცნების მიერ დემოკრატიის ფესტივალის წინააღმდეგ წამოწყებულ ნეგატიურ კამპანიას ეხმაურებოდა და წერდა, რომ ოცნების წარმომადგენლების მხრიდან “დემოკრატიის ფესტივალზე თავდასხმები პირდაპირ ემთხვევა რუსული კანონის სულისკვეთებას”.
EECMD-ის ცნობით, ფესტივალზე მიწვეული იყო ყველა პოლიტიკური პარტია, მათ შორის, ქართული ოცნებაც.
საქართველოში გამართულ დემოკრატიის ფესტივალს პრემიერმა, ირაკლი კობახიძემ “ავტორიტარიზმის ფესტივალი” უწოდა და აღნიშნა, რომ ყველაზე სამწუხარო ისაა, რომ ფესტივალს საქართველოში “პირდაპირ აფინანსებენ უცხოელი დონორები”.
