"ამერიკელების ფული რატომ მიედინება უცხო ქვეყანაში" - პარლამენტის თავმჯდომარე დასავლური ორგანიზაციების წინააღმდეგ

პარლამენტის თავმჯმდომარე დასავლური ორგანიზაციების წინააღმდეგ

ხელისუფლება აგრძელებს კამპანიას “გამჭვირვალობის შესახებ” კანონის მხარდასაჭერად. ამჯერად “ქართული ოცნება” ღიად ადანაშაულებს დასავლურ ორგანიზაციებს ქვეყანაში დესტაბილიზაციის დაფინანსებაში. ამჯერად პარლამენტის თავმჯდომარეს, შალვა პაპუაშვილს “აინტერესებს” ამერიკელების “ფული რატომ მიედინება” უცხო ქვეყანაში.

„კამპანია „მე ვისროლე“ დაფინანსებული არის ამერიკის ბიუჯეტიდან, რომელსაც ამტკიცებს კონგრესი. ამიტომ, ვფიქრობ, კითხვები ჩვენ კი არ უნდა დაგვისვან, არამედ კითხვები უნდა დაუსვან NED-ს და მოიკითხონ, ამერიკის გადასახადის გადამხდელების, ამერიკის მოქალაქეების ფული რატომ მიედინება უცხო ქვეყანაში „მოლოტოვის კოქტეილის“ იდეის პოპულარიზაციისკენ.

ვფიქრობ, ეს უფრო სწორი საქციელი იქნებოდა. იქნებ დაინტერესდნენ, რატომ და როგორ აფინანსებენ ამერიკული ფონდებიდან საქართველოში პარტიებს, რადიკალურ და ექსტრემისტულ ჯგუფებს? არის თუ არა ეს ამერიკელი ხალხის ინტერესებში? უპირველეს ყოვლისა, ამერიკელი ხალხის ინტერესებს ეწინააღმდეგება, როცა სტრატეგიულ პარტნიორ ქვეყანაში, რომელიც შენს ჯარისკაცებთან ერთად მხარდამხარ იდგა ავღანეთში – და ჩვენ დავკარგეთ უფრო მეტი ჯარისკაცი ავღანეთში, ვიდრე ევროკავშირის ბევრ ქვეყანას საერთოდ იქ ჯარისკაცი ჰყავდა – შენი ბიუჯეტიდან რომელიღაც ორგანიზაცია „მოლოტოვის კოქტეილის“ რომანტიზებაში ხარჯავს ფულს.

არის თუ არა ეს კეთილსინდისიერი საქციელი? რა თქმა უნდა, ეს არ არის კეთილსინდისიერი ქცევა და ამაზე ჩვენ გვინდა პასუხები, ეს არ არის ჩავლილი საკითხი. პასუხი უნდა გაეცეს, როგორ ფინანსდებიან საქართველოში რადიკალური ჯგუფები, როგორ ფინანსდება „მოლოტოვის კოქტეილის“ რომანტიზება ამერიკელი ხალხის ფულით.” – განაცხადა პაპუაშვილმა.

მისი განცხადებით, პლაკატი – მე ვესროლე, არის ორგანიზაცია „სირცხვილიას“ მიერ წარმოებული კამპანიის ნაწილი და ვინც ამ კამპანიებს აფინანსებს, გაუგებარია მათ რამე კარგი უნდოდეთ ქართველი ხალხისთვის.

“დღეს ვნახე NED-ის ხელმძღვანელობის გამოხმაურება, როგორ არ მიესალმება გამჭვირვალობის შესახებ კანონპროექტს და ამბობს, თითქოს მათი დაფინანსება მხოლოდ ქართველი ხალხის ინტერესებისთვის არის. პლაკატი – მე ვესროლე, არის ორგანიზაცია „სირცხვილიას“ მიერ წარმოებული კამპანიის ნაწილი. „მოლოტოვის კოქტეილი“ შარშან, საქართველოს დამოუკიდებლობის ისტორიაში პირველად ესროლეს ქართველ ხალხს და ცოცხლად წვავდნენ პოლიციელს. ორგანიზაცია „სირცხვილია“, „ნაციონალური მოძრაობის“ ახალგაზრდულ ფრთასთან ერთად, არის რადიკალური ჯგუფი და მას ჰქონდა კამპანია – მე ვესროლე. აი, ეს კამპანია ფინანსდებოდა ამერიკელი და ევროპელი მოქალაქეების ფულით. იმას, ვინც ამას აფინანსებს, რამე კარგი უნდა ქართველი ხალხისთვის? არ უნდა გვითხრას, რას აფინანსებს და რისთვის ამ ქვეყანაში?“ – განაცხადა პარლამენტის თავმჯდომარემ.

● პრეზიდენტი ზურაბიშვილი: “ქართული ოცნება“ დაკავებულია ჩვენი ევროპული გზისა და მომავლის საბოტაჟით”
● “მოემზადეთ, დიდი ვნებათაღელვა და ცემა-ტყეპა გველის!” – ოპოზიცია რუსული კანონის ხელახალ ინიციირებას ეხმაურება
● არასამთავრობოების “გამჭვირვალობაზე” მმართველი პარტია რუსულ კანონს ხელახლა აინიციირებს

● 3 აპრილს ცნობილი გახდა, რომ არასამთავრობო ორგანიზაციების “ფინანსების გამჭვირვალობაზე” ს მმართველი პარტია რუსულ კანონს ხელახლა აინიციირებს. ამის შესახებ “ქართული ოცნების” ფრაქციის თავმჯდომარემ, მამუკა მდინარაძემ სპეციალურ ბრიფინგზე განაცხადა.

● ხელისუფლების მთავარი არგუმენტი მდგომარეობს იმაში, რომ საქართველოში მოქმედი არასამთავრობო ორგანიზაციების გამჭვირვალობა კითხვის ნიშნის ქვეშ დგას, რაც საფრთხეს უქმნის ქვეყნის უსაფრთხოებას. თუმცა, ამ არგუმენტის არც დამოუკიდებელ ექსპერტებს, არც ოპოზიციას და არც სამოქალაქო საზოგადოებას არ სჯერა. ექსპერტები აღნიშნავენ, რომ ამგვარად “ქართული ოცნება” ხელისუფლებაში ყოფნის გახანგრძლივებას ცდილობს და ნიადაგს იმზადებს 2024 წლის ოქტომბრის საპარლამენტო არჩევნებისთვის, რათა ალტერნატიული აზრი ქვეყანაში ჩაახშოს.

● ერთხელ ე.წ. უცხოელი აგენტების შესახებ კანონი საქართველოს მმართველმა პარტიამ უკვე დააინიიცირა ზუსტად ერთი წლის წინ – გასული წლის მარტში. მაშინ კანონი პირველი მოსმენით პარლამენტში მიიღეს კიდეც, თუმცა “ოცნება” იძულებული გახდა კანონი გაეწვია, რადგან თბილისი მრავალათასიანმა პროტესტმა მოიცვა. ათასობით ადამიანი რამდენიმე დღის განმავლობაში აპროტესტებდა აღნიშნული კანონის მიღებას, რომელსაც საქართველოში “რუსული კანონი” უწოდეს, რადგან იგი რუსეთში მიღებული კანონის ანალოგია.