ოპოზიციამ პარლამენტის შენობის პიკეტირება დაიწყო. არიან დაკავებულები
საქართველოს პარლამენტის პლენარული სხდომა დღეს ხმაურიანი პროტესტის ფონზე იმართება. ოპოზიციური პარტიების წარმომადგენლები და სამოქალაქო აქტივისტები დილიდან შეიკრიბნენ, ისინი პარლამენტის შენობის პიკეტირებას და დეპუტატებისთვის სირცხვილის დერეფნების მოწყობას ცდილობენ.
შენობასთან მობილიზებულია პოლიცია, შესასვლელებთან აღმართულია რკინის ბარიერები.
შსს-ს ცნობით, დილით უკვე ოპოზიციის შვიდი აქტივისტი დააკავეს დაუმორჩილებლობისთვის. როგორც აქტივისტები ამბობენ, პოლიციამ ისინი შეძახილების გამო დააკავა, ვინაიდან მათი შინაარსი მმართველი გუნდისთვის მიუღებელია.
“ბრძანება მიიღეს, რომ დაეჭირათ ხალხი. თითი დააწკაპუნა ღარიბაშვილმა და დაიჭირეს. მერე გამოუშვებენ და თავიდან დაიჭერენ. შეძახილების გარდა არაფერი მომხდარა სხვა. “მონა” დავუძახეთ ვიღაცას, ვისთვისაც არ უნდა დაგვეძახა და ამის მერე დაიწყეს დაკავებები”, – თქვა მოძრაობა “სირცხვილიას” ერთ-ერთმა ლიდერმა, გიგა მაქარაშვილმა.
პროტესტის მონაწილეთა მოთხოვნაა ვადამდელი საპარლამენტო არჩევნების დანიშვნა და პოლიტპატიმრების გათავისუფლება.
მომიტინგეების ჯგუფები პარლამენტის ყველა შესასვლელთან დგანან. აქციის მონაწილეები ამბობენ, რომ მათი მთავარი მიზანია მმართველი გუნდის დეპუტატებისთვის მაქსიმალური დისკომფორტის შექმნა.
“ეს მშვიდობიანი პროტესტია. ჩვენ არ ვაპირებთ შენობის ბლოკირებას, უბრალოდ ყველა დეპუტატს ხალხის მიერ მოწყობილ სირცხვილის კორიდორში მოუწევს გავლა”, – ამბობს ნაციონალური მოძრაობის ერთ-ერთი ლიდერი ზაალ უდუმაშვილი.
პერმანენტული საპროტესტო აქციების დაწყება ოპოზიციამ მას შემდეგ გამოაცხადა, რაც “ნაციონალური მოძრაობის” შტაბ-ბინაში სპეცოპერაციის შედეგად ამ პარტიის თავმჯდომარე, ნიკა მელია დააკავეს.
ოპოზიციამ მას შემდეგ ორი დიდი აქცია მოაწყო, პარლამენტთან კარვები გაშალა და უწყვეტი აქციების რეჟიმი გამოაცხადა, ვიდრე არ დაინიშნება ახალი საპარლამენტო არჩევნები, არ გაათავისუფლებენ მელიას და ხელისუფლების სხვა ოპონენტებს, რომლებიც ოპოზიციის აზრით, პოლიტიკური ნიშნით არიან დაკავებული.
მიმდინარე კვირაში კიდევ რამდენიმე პიკეტირების და აქციის გამართვაა დაგეგმილი.
პოლიტიკური კრიზისი ქვეყანაში იმდენად გაღრმავდა, რომ სიტუაციაში მაღალი რანგის საერთაშორისო ჩინოვნიკები ჩაერთნენ.
კვირას თბილისში ჩამოვიდა ევროპული საბჭოს თავმჯდომარე შარლ მიშელი, რომელმაც დაიყოლია ხელისუფლება ოპოზიციასთან მოლაპარაკებებზე.
მიუხედავად იმისა, რომ ევროპული საბჭოს პრეზიდენტმა, შარლ მიშელმა ოპოზიციას და ხელისუფლებას შორის შეხვედრა გამართა და გაკეთდა განცხადებები, რომ მოლაპარაკებები გაგრძელდება, აქციის ორგანიზატორებმა თქვეს, რომ ერთი მიღწევით არ კმაყოფილდებიან და აუცილებელია, ქართული ოცნების წევრებისთვის დისკომფორტის შექმნა გაგრძელდეს.