ოპოზიცია ახალ არჩევნების ითხოვს. ხელისუფლება მელიას მოუწოდებს, დაემორჩილოს კანონს

ოპოზიციის განცხადება

მას შემდეგ, რაც გიორგი გახარიამ პრემიერ-მინისტრის პოსტი დატოვა, “ერთიანი ნაციონალური მოძრაობის” თავმჯდომარემ, ნიკა მელიამ ოპოზიციის სახელით განაცხადა, რომ ისინი მოლაპარაკების მაგიდას უბრუნდებიან.

მისი თქმით, ოპოზიცია მზად არის კვლავ მიუჯდეს მოლაპარაკების მაგიდას ფასილიტატორების მონაწილეობით და განიხილოს საკითხი ახალი არჩევნების ჩატარებასთან დაკავშირებით.

“ქვეყანას კრიზისიდან გამოიყვანს მხოლოდ და მხოლოდ ახალი ვადამდელი არჩევნები, რომელიც წესრიგში მოიყვანს ყველა სფეროს, დაწყებული სამართლებრივი წესრიგიდან, დამთავრებული სხვებით”, – განაცხადა მელიამ.

ხელისუფლების პასუხი

გახარიას გადადგომიდან მალევე, შინაგან საქმეთა სამინისტრომ განცხადება გამოაქვეყნა, სადაც აღნიშნულია, რომ მელიას დაკავება დროებით გადაიდო.

ამის შემდეგ “ქართული ოცნების” ოფისში ირაკლი კობახიძემ უმრავლესობის სხვა ლიდერებთან ერთად ბრიფინგი გამართა და განაცხადა, რომ პრემიერის გადადგომასთან დაკავშირებით წყალგამყოფი იყო საკითხი – სახელმწიფომ უნდა აჩვენოს თავისი სახე, როგორც სახელმწიფომ თუ – არა.

“გიორგი გახარიას გუნდის სხვა წევრებისგან განსხვავებული პოზიცია ჰქონდა ამ საკითხზე, თუმცა არგუმენტები, რომელიც გაამყარებდა მის პოზიციას ვერ მოვისმინეთ“, – განაცხადა კობახიძემ.

კობახიძემ მოუწოდა მელიას დაემორჩილოს კანონს, “წინააღმდეგ შემთხვევაში, ხელისუფლება უზრუნველყოფს კანონის აღსრულებას და მის დაპატიმრებას“,

მისივე თქმით, მთავრობის ფორმირება დაიწყება და დასრულდება კანონით გათვალისწინებულ უმოკლეს ვადებში – სავარაუდოდ, ხვალვე შეიკრიბება პოლიტსაბჭო და დასახელდება პრემიერმინისტრობის კანდიდატი.

რა მოხდა

გუშინ „ერთიანი ნაციონალური მოძრაობის“ თავმჯდომარეს ნიკა მელიას თბილისის საქალაქო სასამართლომ პატიმრობა შეუფარდა.

პროცესი თითქმის 6 საათს გაგრძელდა. ადვოკატებმა აღკვეთის ღონისძიების გაუქმება მოითხოვეს, მაგრამ მოსამართლემ აცილების შუამდგომლობა არ დააკმაყოფილა.

ნიკა მელიას პროკურატურა 20-21 ივნისის ე.წ. გავრილოვის ღამეზე ჯგუფურ ძალადობაში მონაწილეობას და პარლამენტში შეჭრისკენ მოწოდებას ედავება. 

2019 წლის 26 ივნისს პარლამენტმა ამავე საქმის გამო ნიკა მელიას იმუნიტეტი ერთხელ უკვე შეუჩერა. 

იმუნიტეტის მოხსნის შემდეგ, 2019 წლის 27 ივნისს, პროკურატურამ მელიას აღკვეთის ღონისძიების სახით გირაო, 30 ათასი ლარი შეუფარდა და დამატებით შემზღუდავი ღონისძიებები, მათ შორის, ელექტრონული სამაჯური გაუკეთა. მელიამ გირაო გადაიხადა და სამაჯურიც გაიკეთა.

მელიას საქმე აქტუალური ხელახლა მას შემდეგ გახდა, რაც 2020 წლის 1 ნოემბერს, ოპოზიციის მასშტაბურ აქციაზე, რომელიც არჩევნების გაყალბების ლოზუნგით გაიმართა, ნიკა მელიამ სამაჯური დემონსტრაციულად მოიხსნა, როგორც უსამართლობის სიმბოლო და ხალხში გადააგდო. 

_______________________________________________

● გავრილოვი, პროპორციული, რკინის ღობე – რით დაგვამახსოვრდება მეცხრე მოწვევის პარლამენტი

_________________________________________________

ამ ქმედების გამო, თბილისის საქალაქო სასამართლომ 2020 წლის 3 ნოემბერს მელიას გირაოს თანხა გაუზარდა – ამჯერად მელიას გირაოს სახით 70 ათასი ლარამდე განუსაზღვრეს, ანუ დამატებით 40 ათასი ლარი აქვს შესატანი.

მელიამ სწორედ ამ გირაოს გადახდაზე თქვა უარი, რადგან მისი თქმით, “ქვეყანაში სასამართლოც და პროკურატურაც ივანიშვილის ჯიბეშია”.

2020 წლის 31 ოქტომბერს ნიკა მელია დეპუტატი ხელახლა გახდა, შესაბამისად, ახალ პარლამენტს მის სადეპუტატო უფლებამოსილებაზე მსჯელობა თავიდან მოუწია და საბოლოოდ იმუნიტეტი 16 თებერვალს კიდევ ერთხელ შეუჩერა.

● ოქტომბრის არჩევნების შემდეგ, დეპუტატის მანდატის მოხსნა და შესაბამისად, იმუნიტეტის გაუქმება მელიამ თავად მოითხოვა, თუმცა, პარლამენტმა მას და კიდევ 50 ოპოზიციონერ დეპუტატს მანდატის შეწყვეტაზე უარი უთხრა.

● 2020 წლის 25 დეკემბერს, ნიკა მელია “ნაციონალური მოძრაობის”თავმჯდომარე გახდა. ყველაზე მსხვილი ოპოზიციური პარტიის თავმჯდომარის პოსტი ვაკანტური მას შემდეგ გახდა, რაც პარტია გრიგოლ ვაშაძემ დატოვა.

_____________________________________________

● პრემიერ-მინისტრი გიორგი გახარია გადადგა
● სასამართლომ ნიკა მელიას პატიმრობა შეუფარდა