ყარაბაღი, ბრძოლა გრძელდება: 31 ოქტომბერი

ასე უპასუხა აზერბაიჯანის პრეზიდენტმა ილჰამ ალიევმა გერმანული ტელევიზია ARD-ის ჟურნალისტის კითხვას: „რატომაა ყარაბაღი ასე მნიშვნელოვანი აზერბაიჯანისთვის? იქ რესურსებია თუ ამას რაიმე სიმბოლური მნიშვნელობა აქვს?“

„არის თქვენთვის მნიშვნელოვანი ელზასი და ლოტარინგია? ან ბავარია? ან იქნებ რაინ-ვესტფალია? ეს ჩვენი მიწაა, ჩვენი ტერიტორია, ცნობილი საერთაშორისო დონეზე. ეს რესურსების საკითხი არაა, ჩვენი მთავარი რესურსები აქაა, ბაქოში.

ესაა სამართლიანობის საკითხი და საერთაშორისო სამართლის საკითხი. თავად ჩვენ ვასრულებთ გაეროს უშიშროების საბჭოს რეზოლუციებს, რომლებიც უკვე 27 წელია, ქაღალდზე რჩება“.

ასე უპასუხა რუსეთის საგარეო საქმეთა სამინისტრომ სომხეთის პრემიერ-მინისტრის, ნიკოლ ფაშინიანის წერილს, რომელითაც ის სომხეთის დახმარებისა და მისი უსაფრთხოების უზრუნველყოფის თემაზე კონსულტაციების დაწყებას ითხოვდა.

შეტყობინებაში ნათქვამია, რომ რუსეთი ასრულებს სომხეთთან სამოკავშირეო ვალდებულებებს, მათ შორის, 1997 წლის 29 აგვისტოს, ორმხრივი მეგობრობის, თანამშრომლობისა და ურთიერთდახმარების შესახებ შეთანხმებით ნაკისრს.

ამ შეთანხმების მუხლები ითვალისწინებს კონკრეტულ მოქმედებებს იმ შემთხვევაში, თუკი, რომელიმე მხარის ტერიტორიას შეიარაღებული თავდასხმის ან აგრესიის საფრთხე დაემუქრება.

„აზერბაიჯანი აკრძალულ ფოსფორულ საბრძოლო მასალას იყენებს, რომელიც ქიმიური იარაღის ელემენტებს შეიცავს“, – განაცხადა მთიანი ყარაბაღის თავდაცვის სამინისტრომ და მტკიცებულების სახით, ვიდეო გაავრცელა.

განცხადებაში ნათქვამია, რომ აღნიშული იარაღი მასობრივი ტყის ხანძრებს იწვევს და შეიძლება, ეკოლოგიური კატასტროფა გამოიწვიოს. ამასთან, ცნობილია, რომ ახლა, ტყეებში, სადაც აზერბაიჯანი ფოსფორულ საბრძოლო საშუალებებს იყენებს, აზერბაიჯანის შეიარაღებული ძალების მხრიდან დაბომბვას თავს აფარებს ყარაბაღის ბევრი მშვიდობიანი მცხოვრები.

აზერბაიჯანის თავდაცვის სამინისტრომ ეს ინფორმაცია კატეგორიულად უარყო.

ყარაბაღში საბრძოლო მოქმედებების დაწყებიდან მეორე თვე

• 30 ოქტომბერს, მთელი დღის განმავლობაში, სომეხი სამხედროები აზერბაიჯანის რამდენიმე რაიონს ბომბავდნენ – გუბადლის, გორანბოის, ტერტერის, აღდამისა აღჯაბადის, განაცხადა აზერბაიჯანის თავდაცვის სამინისტრომ.

• ყარაბაღის თავდაცვის სამინისტროს ცნობით, მთელი 30 ოქტომბრის განმავლობაში, აზერბაიჯანის შეიარაღებული ძალები ყარაბაღში, დასახლებულ პუნქტებს ბომბავდნენ.

• სომხეთის თავდაცვის სამინისტრო მთელი 30 ოქტომბრის განმავლობაში, ფრონტის ყველა მიმართულებაზე, მძიმე ბრძოლების შესახებ იტყობინება.

• ილჰამ ალიევმა განაცხადა, რომ კიდევ 9 დასახლებული პუნქტი გადავიდა აზერბაიჯანის არმიის კონტროლქვეშ.

• გარდაიცვალა 84 წლის ადამიანი, რომლის სომხური მხარისთვის გადაცემაც 29 ოქტომბერს სურდა აზერბაიჯანს, მაგრამ ჯანმრთელობის მდგომარეობის გამო, მისი გადაყვანა ვერ მოახერხეს.

• საბრძოლო მოქმედებების დაწყებიდან, 27 სექტემბრიდან მოყოლებული, აზერბაიჯანულ მხარეს 91 მშვიდობიანი მოსახლე დაიღუპა და 400 ადამიანი დაიჭრა, განაცხადა აზერბაიჯანის გენერალურმა პროკურატურამ.

• გამოცხადდა და შემდეგ გადაიდო მოსკოვში, სომხეთის ექსპრეზიდენტის, რობერტ კოჩარიანის დაგეგმილი ვიზიტის შესახებ, რომელსაც კორონავირუსი დაუდგინდა. კოჩარიანი მოგზაურობას სომხეთის კიდევ ერთ ექსპრეზიდენტთან, ლევონ ტერ-პეტროსიანთან ერთად გეგმავდა, რათა „რუსულ პოლიტიკურ ელიტასთან განეხილათ ყარაბაღში არსებული ვითარება და შემდეგ, კონკრეტული გადაწყვეტილებები შეეთავაზებინა სომხეთის ხელისუფლებისთვის“.

• Amnesty International-მა და Human Rights Watch-მა დაადასტურეს სომეხი სამხედროების მიერ ქალაქ ბარდაში, მშვიდობიანი მოსახლეობის წინააღმდეგ აკრძალული კასეტური ბომბების გამოყენება. მანამდე, Human Rights Watch-ი აცხადებდა, რომ აზერბაიჯანელი სამხედროები იყენებდნენ კასეტურ ბომბებს ყარაბაღში, მშვიდობიანი მოსახლეობის წინააღმდეგ.

• ახალი ამბები, ფოტო/ვიდეო ყარაბაღში მიმდინარე საბრძოლო მოქმედებებთან დაკავშირებით – 30 ოქტომბერი, 2020