"აღმოჩნდა, რომ ბრიტანეთის სამართლებრივი სისტემა არის კოშმარი" - ოცნება BBC-ის მესამე საჩივრით მიმართავს
ოცნება BBC-ის საჩივრით მიმართავს
“ქართული ოცნების” პარლამენტის თავმჯდომარის, შალვა პაპუაშვილის განცხადებით, მმართველი პარტია BBC-ის წინააღმდეგ მესამე საჩივრის შესატანად ემზადება, რაც უკვე მიმდინარე დავის კიდევ ერთ ეტაპს წარმოადგენს ბრიტანეთის საზოგადოებრივ მაუწყებელთან.
პაპუაშვილის თქმით, ახალი საჩივარიც კვლავ BBC-ის შიდა მექანიზმების ფარგლებში განიხილება, თუმცა ამჯერად უფრო მაღალ ინსტანციაზე. მისი შეფასებით, აქამდე გამართული განხილვები მიუთითებს იმაზე, რომ ბრიტანეთის სამართლებრივი სისტემა “პრობლემურია“, რადგან საჩივრები იმავე ორგანიზაციის შიგნით განიხილება, რომლის ჟურნალისტურ პროდუქტსაც ეხება დავა.
“აღმოჩნდა, რომ დიდი ბრიტანეთის სამართლებრივი სისტემა არის კოშმარი. განიხილეს ჩვენი საჩივარი და თქვეს, არა, ჩვენ ვართ მართლებიო, ეს სრულიად აბსურდია. იმ ჟურნალისტებმა, ვინც ეს ტყუილი გამოიგონა, განიხილეს ჩვენი საკითხი და გვითხრეს უარი.” – თქვა პაპუაშვილმა.
მისი განცხადებით, პარტიამ უკვე გაიარა ორი ეტაპი: თავდაპირველად საჩივარი ჟურნალისტებისა და პირველადი სარედაქციო გუნდის დონეზე განიხილეს, რის შემდეგაც უარი მიიღეს. შემდგომი ინსტანცია იყო იმავე სარედაქციო ჯგუფი, რომელმაც სიუჟეტი დაამტკიცა და გაავრცელა, და ამ შემთხვევაშიც გადაწყვეტილება უარყოფითი აღმოჩნდა.
ახლა, როგორც პაპუაშვილი ამბობს, საქმე მესამე ეტაპზე გადადის, სადაც განხილვა კვლავ BBC-ის შიგნით, თუმცა უფრო მაღალ დონეზე უნდა გაიმართოს. მისი თქმით, მმართველი გუნდი მზად არის გამოიყენოს ყველა შესაძლო სამართლებრივი გზა და, საჭიროების შემთხვევაში, დავა სტრასბურგის სასამართლოშიც გადაიტანოს.
“ქართულმა ოცნებამ“ BBC-ს პირველად 14 იანვარს მიმართა ოფიციალური საჩივრით. პარტია მაუწყებელს რამდენიმე სტანდარტის დარღვევაში ადანაშაულებს და მოითხოვს როგორც შესაბამისი მასალების მოხსნას, ისე საჯარო ბოდიშის მოხდას.
საჩივარი უკავშირდება 2025 წლის 1 დეკემბერს გამოქვეყნებულ საგამოძიებო სტატიასა და დოკუმენტურ ფილმს, რომელშიც ნათქვამია, რომ მოპოვებული მტკიცებულებები მიუთითებს: გასულ წელს, თბილისში ანტისახელისუფლებო დემონსტრაციების დასაშლელად, საქართველოს ხელისუფლებამ შესაძლოა პირველი მსოფლიო ომის პერიოდის ქიმიური ნივთიერება “კამიტი” გამოიყენა. მასალა მომზადდა BBC Eye-ის ფარგლებში და ეხებოდა საპროტესტო აქციებზე ძალის გამოყენების საკითხს.
