ქართველი პატიმარი ჟურნალისტი ქალი, მზია ამაღლობელი, სახაროვის პრემიის გამარჯვებულია
მზია ამაღლობელი სახაროვის პრემიის გამარჯვებულია
გამოცემების “ბათუმელებისა” და “ნეტგაზეთის” დამფუძნებელი, პატიმარი ჟურნალისტი მზია ამაღლობელი გახდა სახაროვის პრემიის 2025 წლის გამარჯვებული. მასთან ერთად ეს ჯილდო მიიღო ასევე პატიმრობაში მყოფმა ბელარუსმა ჟურნალისტმა ანდეი პოჩობუტმა.
სახაროვის პრემიის გამარჯვებულები, 22 ოქტომბერს, სტრასბურგში, პარლამენტის პლენარულ სხდომაზე, ევროპარლამენტის პრეზიდენტმა რობერტა მეცოლამ დაასახელა.
“ორივე ჟურნალისტი ახლა საპატიმროში იმყოფება ყალბი ბრალდებებით და მხოლოდ იმიტომ, რომ ისინი თავის საქმეს ასრულებდნენ, ლაპარაკობდნენ უსამართლობის შესახებ. მათმა გამბედაობამ ისინი თავისუფლებისა და დემოკრატიის ბრძოლის სიმბოლოდ აქცია. ეს ინსტიტუცია მათი და იმ ხალხის გვერდით დგას, რომლებიც აგრძელებენ თავისუფლების მოთხოვნას”, – განაცხადა რობერტა მეცოლამ.
მზია ამაღლობელი პირველი სინდისის პატიმარი ჟურნალისტი ქალია საქართველოში. იგი 2025 წლის 11-12 იანვრის ღამეს, ბათუმში, ორჯერ დააკავეს. თავდაპირველად მზია ამაღლობელი დააკავეს პოლიციის შენობაზე სტიკერის გაკვრისთვის, რომელზეც ეწერა – “იფიცება საქართველო”. ეს სტიკერი პოლიციელებმა რამდენიმე წუთში ააძრეს. ამ ფაქტიდან მალევე მზია ამაღლობელი კვლავ დააკავეს პოლიციის უფროსისთვის სილის გაწვნის ფაქტზე. ამას წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა.
დაკავების შემდეგ მზია ამაღლობელმა ციხეში შიმშილობა დაიწყო. მან 38 დღე იშიმშილა და შიმშილი მხოლოდ ჯანმრთელობის მკვეთრი გაუარესების ფონზე, ოჯახის წევრების თხოვნით შეწყვიტა. ის საავადმყოფოშიც მოხვდა.
მზია ამაღლობელს 4-დან 7 წლამდე პატიმრობა ემუქრებოდა. 2025 წლის 6 აგვისტოს, ბათუმის საქალაქო სასამართლოს მოსამართლე ნინო სახელაშვილმა გადააკვალიფიცირა ბრალდების მუხლი და მზია ამაღლობელს 2 წლიანი სასჯელი მიუსაჯა – შედარებით მსუბუქი მუხლით, მუქარა ან ძალადობა საზოგადოებრივი წესრიგის დამცველის მიმართ
საბჭოთა ფიზიკოსისა და პოლიტიკური დისიდენტის, ანდრეი სახაროვის სახელობის პრემია ევროპარლამენტის მიერ 1988 წლიდან გაიცემა. ეს არის ევროკავშირის უმაღლესი ჯილდო ადამიანის უფლებების დარგში. პარლამენტი მას ყოველწლიურად ანიჭებს ფიზიკურ პირებს, ჯგუფებს ან ორგანიზაციებს ადამიანის უფლებების, გამოხატვის თავისუფლების ან დემოკრატიული ღირებულებების დაცვისადმი გამორჩეული ერთგულების აღიარების ნიშნად.
სახაროვის პრემია მიზნად ისახავს, მთელი მსოფლიოს ყურადღება მიაპყროს პოლიტიკურ პატიმრებს, აქტივისტებსა და ორგანიზაციებს, რომლებიც იდევნებიან.
ქართველი და ბელორუსი ჟურნალისტების გარდა, სახაროვის პრემიის ფინალისტებს შორის იყვნენ: ჟურნალისტები და ჰუმანიტარული დახმარების მუშაკები პალესტინასა და ყველა კონფლიქტურ ზონაში, რომლებსაც წარმოადგენენ პალესტინის ჟურნალისტთა სინდიკატს, წითელი ნახევარმთვარე და UNRWA და სერბი სტუდენტები.
სახაროვის პრემიის დაჯილდოების ცერემონია 16 დეკემბერს სტრასბურგში გაიმართება. სახაროვის პრემიის ჯილდო 50 000 ევროა.
