ფეხბურთელები - პირველი "უსახლკაროები" ყარაბაღის ახალ ომში
მთიან ყარაბაღში მიმდინარე საბრძოლო მოქმედებების გამო, აზერბაიჯანისა და სომხეთის საფეხბურთო ნაკრებები საშინაო მატჩებს სამშობლოდან შორს ჩაატარებენ. ამ მოვლენებიდან გვერდით არ დარჩა არც საქართველოს ნაკრები – ორივე დაპირისპირებული მხარის მეზობელი.
• სომხური „არარატი“ და აზერბაიჯანული „ყარაბაღი“ ევროპის ლიგაზე მოსახვედრად ერთდროულად იბრძოდნენ
• დიდი გამარჯვება: თბილისის “ლოკომოტივმა” მოსკოვის “დინამო” დაამარცხა
UEFA-მ აზერბაიჯანისა და სომხეთის ნაკრებების მონაწილეობით გასამართი ერთა ლიგის მატჩების შეიარაღებული კონფლიქტის ზონის ფარგლებს გარეთ გადატანის გადაწყვეტილება მიიღო.
ამრიგად, სომხეთისა და საქართველოს ნაკრებების მატჩი, რომელიც 11 ოქტომბერს, ერევანში უნდა გამართულიყო, იმავე დღეს, პოლონეთში ჩატარდება. მეზობელი ქვეყნების ფეხბურთელები მოედანზე პოლონეთის ქალაქ ტიხში გამოვლენ.
აზერბაიჯანის ნაკრებს 13 ოქტომბერს, ბაქოში, კვიპროსის ეროვნული ნაკრები უნდა მიეღო. მაგრამ მატჩი ალბანეთში გადაიტანეს. ახლა, აზერბაიჯანელი და კვიპროსელი ფეხბურთელები ერთმანეთს ალბანურ ქალაქ ელბასანში შეერკინებიან.
ორივე მატჩი უმაყურებლოდ გაიმართება. მაგრამ აქ უკვე სომხეთსა და აზერბაიჯანში არსებული პოლიტიკური ვითარება არაფერ შუაშია. კორონავირუსის პანდემიის გამო, UEFA-ს ეგიდით გასამართი ყველა მატჩი უმაყურებლოდ გაიმართება.
პირველი გუნდი, რომელიც მთიან ყარაბაღში ვითარების ესკალაციით დაზარალდა, სომხური კლუბი “არარატ-არმენია” იყო. 1 ოქტომბერს, უეფას ევროპა ლიგის ფლეი-ოფის ფარგლებში, სომხურმა გუნდმა სერბული “ცრვენა-ზვეზდას” წინააღმდეგ კვიპროსში ითამაშა. ის მატჩი, სერბული გუნდის სასარგებლოდ 2:1 დასრულდა.
