მსოფლიო ჯანდაცვის ორგანიზაციამ სინოფარმის ვაქცინას ავტორიზაცია მიანიჭა
მსოფლიო ჯანდაცვის ორგანიზაციამ (WHO) ჩინური ვაქცინის, სინოფარმის გამოყენების ნებართვა გასცა. ამის შესახებ WHO-ს გენერალურმა დირექტორმა, ტედროს ადანაჰომ გებრეიესუსმა განაცხადა.
“ამ შუადღით მსოფლიო ჯანდაცვის ორგანიზაციამ გადაუდებელი გამოყენებისთვის ნებართვა გასცა პეკინის სინოფარმის Covid-19-ის საწინააღმდეგო ვაქცინაზე, რომელიც მე-6 ვაქცინა გახდა, რომელმაც მიიღო WHO-ს მხრიდან დადასტურება, როგორც უსაფრთხომ, ეფექტურმა და ხარისხიანმა”, – თქვა ტედროს ადანაჰომ გებრეიესუსმა.
______________________________
● ვაქცინაცია საქართველოში: ვინ რითი იცრება
● NDI: საქართველოში გამოკითხულთა 53 პროცენტი კორონავირუსის აცრას არ გაიკეთებდა
● საპატრიარქო არ ჩაერთვება ვაქცინაციის პროპაგანდაში – ჯანდაცვის მინისტრი პატრიარქს შეხვდა
● საქართველოში მხოლოდ 5 ათასი მედმუშაკი აიცრა
___________________________
საქართველოში ვაქცინაციის პროცესის სერიოზულ დამაბრკოლებელ ფაქტორად იქცა პრეპარატების მიმართ უნდობლობა და ასევე ვაქცინაციის პროცესის მენეჯმენტი – ადამიანებს რამდენიმე ასეული კილომეტრის გავლა უწევთ იმისთვის, რომ აიცრან და ეს მაშინ, როდესაც ქვეყანაში რამდენიმე ათასი აუთვისებელი დოზა ვაქცინაა.
კორონავირუსის საწინააღმდეგო ვაქცინაცია საქართველოში 15 მარტიდან დაიწყო. 6 მაისის მონაცემებით, საქართველოს მოქალაქეების საერთო რიცხვი, რომლებმაც ერთი დოზა ვაქცინა მაინც გაიკეთეს, არის 51 600. ორივე დოზით აცრილების რაოდენობაა 7873, რაც საქართველოს მოსახლეობის 0.21 პროცენტია.
ქვეყანაში 6 მაისისთვის შემოსული ყველა დასახელების კორონავირუსის საწინააღმდეგო ვაქცინის დოზები რომ შევაჯამოთ, გამოდის 315 450. რაც 157 ათას 725 ადამიანის, ანუ მოსახლეობის მხოლოდ 4.26 პროცენტის სამყოფია.
ვაქცინაცია ქვეყანაში ნებაყოფლობითია და 4 მაისიდან აცრა შეუძლია უკვე ყველა 18 წელს მიღწეულ მოქალაქეს.
ქვეყანაში ამ დრომდე ოთხი ვაქცინაა შემოტანილი – გერმანულ-ამერიკული “ფაიზერი”, ბრიტანული “ასტრაზენეკა”, ჩინური “სინოფარმი” (პეკინი) და ჩინური “სინოვაკი”.
აქედან მხოლოდ ორს – “ფაიზერს” და “ასტრაზენეკას” ჰქონდა გავლილი ამ დრომდე მსოფლიო ჯანდაცვის ორგანიზაციის ავტორიზაცია.
