სურამში ახალგაზრდა ქალი ქმარმა მოკლა
მკვლელობა მოხდა სურამში. ახალგაზრდა ქალი ქმარმა მაშინ მოკლა, როცა მას ეძინა. ქალი ცეცხლსასროლი იარაღით არის მოკლული.
მოკლული ქალი სამი შვილის დედაა.
შინაგან საქმეთა სამინისტროს ინფორმაცით, გამოძიება დაწყებულია 109-ე მუხლით, რაც დამამძიმებელ გარემოებებში განზრახ მკვლელობას გულისხმობს.
160 მოკლული ქალი – როგორია სტატისტიკა
ფემიციდი გენდერული ნიშნით ქალთა მკვლელობას გულისხმობს და სახალხო დამცველის ინფორმაციით, ბოლო 6 წლის განმავლობაში საქართველოში 160 ქალია მოკლული.
2020 წლის დასაწყისიდან დღემდე საქართველოში 9 ქალია მოკლული, 2019 წელს – 16, ხოლო 2014-2018 წლებში – 135.
ფემიციდის თაობაზე მომზადებული ბოლო ანგარიში, რომელიც სახალხო დამცველის აპარატმა მოამზადა, 2020 წლის 30 ივნისს გამოქვეყნდა. ანგარიშის – ფემიციდის მონიტორინგის ანგარიში 2014-2018 თანახმად, საქართველოში ქალებს ყველაზე ხშირად კლავენ ქმრები, პარტნიორები, ყოფილი ქმრები/პარტნიორები ან შეყვარებულები, მიუხედავად იმისა, ცხოვრობდნენ თუ არა ისინი ოდესმე ერთად ან თანაუგრძნობდა თუ არა მსხვერპლი მათ.
ოფიციალური მონაცემებით, გენდერული ნიშნით ყველაზე მეტი – 35 ქალი 2014 წელს მოკლეს. შემდგომ წლებში ეს რიცხვი შემცირდა, თუმცა, გაიზარდა ფემიციდის – ანუ ქალის მოკვლის მცდელობის მაჩვენებელი. 2014-2015 წლებში ქალის მკვლელობის 12-12 მცდელობა დაფიქსირდა, 2017 და 2018 წლებში კი 18-18.
ქალის მკვლელობის მცდელობის მიზეზიც გენდერული როლის და შესაბამისი საქმიანობის არაჯეროვანი შესრულებაა. მაგალითად, ერთ საქმეში ქმარმა ცოლის მოკვლა სცადა პურის დაწვის გამო. მეორე შემთხვევაში კი ქალის მკვლელობის მცდელობის მიზეზი ქმრის, როგორც „ოჯახის უფროსის“ მითითებების დაუმორჩილებლობა გახდა: კერძოდ, ქმარმა ცოლის ბენზინით დაწვა სცადა იმის გამო, რომ ცოლი არ დაემორჩილა მის მითითებას და სახლში გასაყიდი მეორადი ტანსაცმელი მიიტანა.
სტატისტიკის თანახმად, ყველაზე ხშირად ფემიციდის მოტივი “შურისძიება” ან “ეჭვიანობაა”.
“გაანალიზებული სისხლის სამართლის საქმის მასალებიდან ირკვევა, რომ დანაშაულის ჩადენის ადგილი უფრო ხშირად არის სახლი, რაც, ბუნებრივია, თუ გავითვალისწინებთ ფემიციდის, როგორც გენდერული დანაშაულის ხასიათს.
ამასთან, აღსანიშნავია, რომ ფემიციდის და ფემიციდის მცდელობის ბევრი საქმე იყო დაკავშირებული ქალის მიერ „საოჯახო როლის“ შესრულებასთან თუ ვერშესრულებათან, რაც უშუალოდ წინ უძღოდა დანაშაულს”, – აღნიშნულია სახალხო დამცველის ანგარიშში.
როგორც ფემიციდის, ისე მისი მცდელობის იარაღი, უმთავრესად, იყო დანა.
- „ხანდახან ქმარი გცემს“ – კადიროვმა 23 წლის გოგონას სიკვდილში სავარაუდო დამნაშავეებს საჯაროდ დაუჭირა მხარი
- ვინ გამოუცვლის ბავშვს საფენს და ვინ მართავს ქვეყანას? გენდერული როლები საქართველოში
დანაშაულის ჩამდენთა უმეტესობა დანაშაულის ჩადენისას იყო ფხიზელი. დამნაშავეთა დიდი ნაწილი საშუალო განათლების მქონეა და დანაშაულის ჩადენის მომენტში – უმუშევარი.
რაც შეეხება სასჯელებს, ქალის გენდერული მკვლელობის საქმეზე ყველაზე მკაცრი სასჯელი – უვადო თავისუფლების აღკვეთა 2018 წელს გამოიყენეს.
ფემიციდისათვის ყველაზე მსუბუქი სასჯელი კი – 1 წლით თავისუფლების აღკვეთა – 2017 წელს მცხეთის რაიონულმა სასამართლომ გამოიყენა.
ანგარიშის თანახმად, დანაშაულის ჩადენისას გენდერული მოტივი თავად ბრალდებულების ჩვენებებში იკვეთება. ზოგიერთი მათგანი დანაშაულს იმით ხსნის, რომ ქალმა უარი უთხრა ცოლად გაყოლაზე ანდა ყოფილმა ცოლმა უარი უთხრა შერიგებაზე.
“მკვლელობა კი იკვეთება როგორც ერთგვარი სასჯელი კაცის მხრიდან, ქალის ამგვარი თავისუფალი არჩევანის გამო. ასევე გვხვდება საქმეები, სადაც ყოფილმა ქმრებმა ცოლები სხვა კაცთან ურთიერთობის გამო „დასაჯეს“ , – წერია ანგარიშში.
