მიხეილ სააკაშვილის სასამართლო გადაიდო. ექსპრეზიდენტი პროცესს არ დაასწრეს

მიხეილ სააკაშვილის პროცესი 29 ნოემბრამდე გადაიდო, თავად ექსპრეზიდენტს კი სხდომაზე დასწრების საშუალება არ მიეცა, რადგან პენიტენციურმა სამსახურმა სასამართლო დარბაზში მის გადაყვანაზე უარი თქვა. უწყების განმარტებით, სააკაშვილი იმიტომ არ გადაჰყავთ, რომ შესაძლოა, მოხდეს “დესტრუქცია” და პროცესს ხელი შეუშალონ.

სახელმწიფო ბრალდება მიხეილ სააკაშვილს 2007 წლის 7 ნოემბერს, მომიტინგეთა მასობრივად დარბევას, ტელეკომპანია „იმედში“ შეჭრასა და ბადრი პატარკაციშვილის კუთვნილი ქონების დანაშაულებრივად ხელში ჩაგდებას ედავება.

დღევანდელ სხდომაზე “7 ნოემბრის საქმეზე” საქართველოს ყოფილი პრეზიდენტისთვის შეფარდებული აღკვეთის ღონისძიება – წინასწარი პატიმრობა – გაუქმდა. აღნიშნული გადაწყვეტილება მოსამართლეთა კოლეგიამ – ლია ორკოდაშვილმა, ნინო ელიეშვილმა და მაია ქოქიაშვილმა მიიღო. ასევე, სააკაშვილს მიეცა ტელეფონით სარგებლობის საშუალებაც, თუმცა ადვოკატები ამბობენ, რომ ციხის საავადმყოფოში “ხელისუფლება ტელეფონებს დააზიანებს.”

მოსამართლე ნინო ელიაშვილის განმარტებით, სააკაშვილის მიმართ აღკვეთის ღონისძიების სახით შეფარდებული პატიმრობის გამოყენების აუცილებლობას ვერ ხედავს, რაც ნიშნავს იმას, რომ თუ პრეზიდენტი სალომე ზურაბიშვილი სააკაშვილს შეიწყალებს, იგი ციხეს დატოვებს.

გარდა მიმდინარე საქმისა, მიხეილ სააკაშვილი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით.
.

რა ხდებოდა პროცესზე

პროცესზე, რომელიც 4 საათს გაგრძელდა, მოსამართლე ნინო ელიეშვილმა უარი თქვა მიხეილ სააკაშვილი პროცესზე დისტანციურად ან ტელეფონით ჩართულიყო. 

მოსამართლემ უარი განაცხადა სხდომაზე ადვოკატების, ნიკა გვარამიას და დიმიტრი საძაგლიშვილია დაშვებაზეც. სხდომას მხოლოდ ორი ადვოკატი – ბექა ბასილაია და შოთა თუთბერიძე ესწრებოდნენ.

მოსამართლემ ადვოკატების არშეშვების მიზეზად დაასახელა ის, რომ უკვე მიმდინარე სხდომაზე ადამიანების შესვლა არ შეიძლება. ადვოკატმა ბექა ბასილაიამ შესაბამისი კანონმდებლობის საფუძველზე შესვენების გამოცხადება მოითხოვა, რის შემდეგაც გვარამია და საძაგლიშვილი დარბაზში შესვლას შეძლებდნენ, თუმცა, მოსამართლე ელიეშვილმა შესვენება არ გამოაცხადა. 

მოსამართლისგან უარის მიღების შემდეგ ბექა ბასილაიამ თქვა, რომ ამ შემთხვევაში დღევანდელ პროცესში მონაწილეობას აზრი არ აქვს. შესაბამისად, მან და ადვოკატმა შოთა თუთბერიძემ სასამართლო დარბაზი დატოვეს. 

● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
●  სააკაშვილი შიმშილობს. რა ელის და რა ვიცით მის ჯანმრთელობის მდგომარეობაზე
● “სანამ სტრასბურგი სააკაშვილის საქმეს განიხილავს, ის უნდა გათავისუფლდეს” – ევროპარლამენტარების წერილი

მიხეილ სააკაშვილის პროცესი ხმაურით მიმდინარეობდა. სასამართლოს ეზოში სააკაშვილის მხარდამჭერები იყვნენ შეკრებილები და მოსამართლის გადაწყვეტილებას ელოდნენ. მობილიზებული იყო პოლიციაც.

“შიმშილობით სულს ხდით და სასამართლოს უფლებას ართმევთ. კაფკას პროცესი მოაწყვეთ აქ”, – თქვა გიგი უგულავამ, რომელსაც პროცესისთვის ხელის შეშლის მიზეზით სხდომა დაატოვებინეს. 

“7 ნოემბრის საქმეში” მიხეილ სააკაშვილთან ერთად სწორედ გიგი უგულავა ფიგურირებს, ისევე, როგორც თავდაცვის ყოფილი მინისტრი დავით კეზერაშვილი და იუსტიციის მინისტრი ზურაბ ადეიშვილი. 

ადვოკატმა ბექა ბასილაიამ განაცხადა, რომ სასამართლო ელოდება, როდის დამძიმდება მიხეილ სააკაშვილის ფიზიკური მდგომარეობა ისე, რომ მან სასამართლოში მისვლა ვეღარ შეძლოს. 

“ისინი ელოდებიან მიხეილ სააკაშვილის იმ მდგომარეობაში ჩავარდნას, რომ ნამდვილად ვერ ივლის. ისინი ელოდებიან მდგომარეობას, როცა ქუჩის პროცესი ჩაცხრება და ხალხი გატყდება. ისინი ელოდებიან მიხეილ სააკაშვილის პროცესის კრიტიკულად დამძიმებას”. – განაცხადა ადვოკატმა. 

მისივე თქმით, ჩვენ ვხედავთ ხელისუფლებას, რომელსაც სააკაშვილის საზოგადოებასთან გამოჩენაზე აკანკალებს. ბასილაიას განმარტებით, სასამართლომ დღეს დაადასტურა, რომ ქვეყანაში მართლმსაჯულება არ არსებობს და სასამართლოსთვის არ აქვს მნიშვნელობა რა მიზეზით, მთავარია მიხეილ სააკაშვილი არ იყოს სასამართლო დარბაზში.

“მთავარი არხის” დირექტორი და ექსპრეზიდენტის ერთ-ერთი ადვოკატი ნიკა გვარამია ამბობს, რომ სააკაშვილი იმყოფება წამების პირობებში, არანებაყოფლობითი მკურნალობით და ზეწოლით.

“მიშას პროცესზე ხდება წარმოუდგენელი დარღვევები, რომელსაც პრეცედენტი არ აქვს არცერთი ხელისუფლების პირობებში. ადვოკატების პროცესზე არშეშვება არის წარმოუდგენელი რამ და ის, რაც ციხეში ხდება საერთოდ წარმოუდგენელი რამ არის.

კაცი იმყოფება წამების პირობებში, პირდაპირ უნდა ვთქვათ ეს, არანებაყოფლობითი მკურნალობის და გარედან ზეწოლის პირობებში, პატიმრების იქნება ეს, თუ ექიმების”, – ამბობს გვარამია.

● სახელმწიფო დეპარტამენტი: მოვუწოდებთ მთავრობას, დაიცვას სააკაშვილის ჯანმრთელობა
● კელი დეგნანი: მთავრობამ უზრუნველყოს, რომ სააკაშვილმა მიიღოს საჭირო სამედიცინო დახმარება

სახალხო დამცველმა გლდანის ციხეში არსებული სამკურნალო დაწესებულება რამდენჯერმე შეისწავლა. ომბუდსმენი ანგარიშებში წერდა, რომ კლინიკაში პაციენტის მკურნალობისთვის შეუსაბამო პირობებია.

ეს ერთ-ერთი არგუმენტი იყო მიხეილ სააკაშვილის მკურნალი ექიმებისა და ადვოკატებისთვის, რის გამოც ისინი კატეგორიულად ეწინააღმდეგებოდნენ მიხეილ სააკაშვილის გლდანის ციხეში გადაყვანას. ამას არც თავად ყოფილი პრეზიდენტი თანხმდებოდა.

ექიმთა კონსილიუმი, სამოქალაქო სექტორი, ოპოზიცია, ქართველი ხელოვანები და სხვა, არაერთი ადამიანი, ხელისუფლებას ყოფილი პრეზიდენტის სამოქალაქო, მრავალპროფილურ კლინიკაში გადაყვანას სთხოვდა.

ამ მოთხოვნით პოლიტიკური პარტია “დროას” ლიდერმა ელენე ხოშტარიამ პარლამენტში შიმშილობაც დაიწყო. ხელისუფლება კი ჯიუტად იმეორებდა, რომ საჭიროების შემთხვევაში პატიმარს მხოლოდ გლდანის ციხის სამკურნალო დაწესებულებაში გადაიყვანდა.

მიხეილ სააკაშვილი გლდანის ციხეში 8 ნოემბერს, საღამოს გადაიყვანეს.

ექსპრეზიდენტის გადაყვანის შესახებ უწყებას წინასწარ ინფორმაცია არ გაუვრცელებია. ამის შესახებ წინასწარ ინფორმაცია არც პრეზიდენტის ოჯახს ჰქონდა.

სად და როგორ გადაიყვანეს პატიმარი ექს-პრეზიდენტი, რომელსაც 40-დღიანი შიმშილობის შემდეგ მძიმე ჯანმრთელობის მდგომარეობა აქვს, რამდენიმე საათის განმავლობაში იყო უცნობი.

ამ პროცესების პარალელურად, 8 ნოემბრიდან ოპოზიციამ მიხეილ სააკაშვილის გათავისუფლებისა და რიგგარეშე არჩევნების დანიშვნის მოთხოვნით, ფართომასშტაბიანი, უწყვეტი საპროტესტო აქციები დაიწყო.