კვლევა: საქართველოს მოსახლეობის 47% მიიჩნევს, რომ LGBTQ უფლებების დაცვა მნიშვნელოვანია
LGBTQ უფლებები საქართველოში
საქართველოში ევროპის საბჭოს ოფისმა უმცირესობების შესახებ 2018-2021 წლებში ჩატარებული კვლევის შედეგები გამოაქვეყნა, რომლის მიხედვით, საქართველოს მოსახლეობის 47% LGBTQ უფლებების დაცვას მნიშვნელოვნად მიიჩნევს.
კვლევის სახელწოდებაა „სიძულვილით მოტივირებული დანაშაული, სიძულვილის ენა და დისკრიმინაცია საქართველოში: ცოდნა და დამოკიდებულება“ და მოიცავს მრავალფეროვნების მიმართ საზოგადოების დამოკიდებულების ცვლილებებს ბოლო სამი წლის განმავლობაში.
კვლევის ძირითადი მიგნებები:
● მაშინ როცა 2018 წელს, იგივე კვლევით, LGBTQ თემის უფლებების დაცვას მნიშვნელოვნად მიიჩნევდა მოსახლეობის მხოლოდ 33%, 2021 წელს ამ ადამიანების რიცხვი 47%-ია.
● 2018 წელთან შედარებით საზოგადოება უფრო მეტად გათვითცნობიერებულია და მეტი მიმღებლობა აქვს ყველა სხვა უმცირესობების უფლებების მიმართაც.
● ქართულ საზოგადოებაში არსებული მრავალფეროვნების შესახებ ინფორმირებულობის დონე და ამ საკითხის მიმართ დადებითი დამოკიდებულება 2018-დან 2021 წლამდე ასევე გაზრდილია.
გამოკითხვა უმცირესობათა კონკრეტული ჯგუფების მიმართ დამოკიდებულებასაც იკვლევდა:
● მონაცემების მიხედვით, ამ ინდიკატორით 2018 წლიდან ტოლერანტობა 10%-ით გაიზარდა LGBTQ ადამიანების მიმართ.
● რესპონდენტებს ასევე ჰკითხეს, ვის არ ისურვებდნენ მეზობლად. მონაცემები აჩვენებს, რომ მოსახლეობის წილი, რომელიც ყველაზე მეტად LGBTQ თემის წარმომადგენლებთან მეზობლობას არ ისურვებდა, 7%-ით შემცირდა.
● ასევე, მრავალფეროვნების მიმართ დადებითი დამოკიდებულება 56-დან 70%-მდე გაიზარდა.
● ეთნიკური მრავალფეროვნების კუთხით მონაცემები დადებითი დამოკიდებულების 12 %-იან ზრდაზე მიუთითებს – 68%-მდე.
● როგორ ცხოვრობენ ქვიარ ადამიანები აზერბაიჯანის რეგიონებში
● რატომ ვერ ჩატარდა ღირსების მარში – რა აჩვენა ამ დღემ?
● როგორ იბრძვის ლგბტქ თემი საკუთარი უფლებებისთვის საქართველოში და რას მიაღწია?
კვლევის ფარგლებში ასევე გამოკითხეს ადამიანები ცალკეული ჯგუფების შესახებ, თუ რამდენად ხშირად იყენებენ მათ მიმართ სიძულვილის ენას საქართველოში.
მონაცემები მიუთითებს, რომ მოსახლეობის აღქმით, სიძულვილის ენის სამიზნეები ყველაზე ხშირად LGBTQ ადამიანები ხდებიან.
რესპონდენტთა თქმით, საქართველოში სიძულვილით მოტივირებული დანაშაულის მსხვერპლებიც ყველაზე ხშირად LGBTQ ადამიანები არიან. ზოგადად, ამ მხრივ, მონაცემები არსებითად არ შეცვლილა.
“მიუხედავად იმისა, რომ საზოგადოების დამოკიდებულება მრავალფეროვნების მიმართ სულ უფრო პოზიტიური ხდება, დისკრიმინაციის, სიძულვილით მოტივირებული დანაშაულისა და სიძულვილის ენის წინააღმდეგ საქართველოს კანონმდებლობის ინფორმირებულობის კუთხით მცირე თუ რაიმე ცვლილება შეინიშნება. ასევე, უცვლელი რჩება რეაგირების მექანიზმებისა და მათი ეფექტიანობის შესახებ ინფორმირებულობა და შეხედულებები”. – წერია კვლევაში.
• “არასოდეს ვიცი, სახლში ცოცხალი დავბრუნდები თუ არა”
• სომხეთის პარლამენტში ტრანსგენდერი ქალის გამოსვლას მწვავე რეაქცია მოჰყვა
2018 წელს, “კავკასიის კვლევითი რესურსების ცენტრის” (CRRC-საქართველოს) მიერ ჩატარებული კვლევის შედეგების მიხედვით, საქართველოს მოსახლეობის მნიშვნელოვან ნაწილს (36 პროცენტი) მრავალფეროვნება ქვეყნისთვის საზიანო მოვლენა ეგონა, ხოლო 43 პროცენტი ფიქრობდა, რომ უმცირესობებს პროტესტის ქუჩაში გამოხატვის უფლება საერთოდ არ აქვთ.
ამავე კვლევით, უმცირესობებს შორის ყველაზე პოზიტიური განწყობა შეზღუდული შესაძლებლობის მქონე პირების მიმართ არსებობდა, ყველაზე ნეგატიური – ლგბტ ადამიანების მიმართ. გამოკითხულთა მნიშვნელოვანი ნაწილი შედარებით არაკეთილგანწყობილი იყო ასევე ევროპის გარეთ ქვეყნებიდან მიგრანტების მიმართ.
2018 წელს ჰომოსექსუალებთან არა თუ პირად, არამედ საქმიან ურთიერთობებსაც კი არ ისურვებდა გამოკითხულთა 70 პროცენტი. მხოლოდ 22-მა პროცენტმა უპასუხა ამ კითხვას დადებითად.
გამოკითხვის ფარგლებში მონაწილეებს სთხოვეს დაესახელებინათ ის ჯგუფები, რომლებსაც მეზობლებად არ ისურვებდნენ. ნარკოდამოკიდებულების (67%) და კრიმინალების (67%) შემდეგ გამოკითხულებმა ლგბტ ადამიანები დაასახელეს – მათ მეზობლად არ ისურვებდა გამოკითხულთა 54 პროცენტი. ყველაზე ტოლერანტულები გამოკითხულები შეზღუდული შესაძლებლობების პირების მიმართ აღმოჩნდნენ – მხოლოდ ერთმა პროცენტმა თქვა, რომ ასეთ ადამიანებს მეზობლად არ ისურვებდა.
