TI: რეგიონებში სულ უფრო იმატებს კორუფციული შემთხვევები, რაც უკონტროლო სახეს იღებს

კორუფცია რეგიონებში

“საერთაშორისო გამჭვირვალობა – საქართველოს“ (TI) ბოლო ანგარიშის მიხედვით, საქართველოს რეგიონებში სულ უფრო იმატებს კორუფციული შემთხვევები, რაც უკონტროლო სახეს იღებს, ვინაიდან მათზე შესაბამისი სტრუქტურები ან საერთოდ არ რეაგირებენ, ან საზოგადოებას არ აწვდიან ინფორმაციას ამ საქმეებით დაინტერესების შესახებ.

ორგანიზაციის განმარტებით, კორუფციული ფაქტების სიმრავლე და მასშტაბები აჩენს განცდას, რომ პრივილეგირებული ადამიანებისთვის ხალხის ხარჯზე გამდიდრებას ამ ქვეყანაში “მწვანე შუქი” აქვს ანთებული.

TI კორუფციის რუკას წარმოადგენს, სადაც დატანილია თანამდებობის პირებთან და ბიძინა ივანიშვილთან დაკავშირებული ის კომპანიები, რომლებმაც საქართველოს სხვადასხვა რეგიონში ბოლო 10 წელიწადში, ჯამურად, 2 მილიარდ 150 მილიონ ლარამდე მსხვილი კონტრაქტები მიიღეს სახელმწიფო შემსყიდველებისგან.

კორუფციის რუკა

● რეგიონების მიხედვით კორუფციის ნიშნების შემცველი შესყიდვების სურათი ასე გამოიყურება:

აჭარა – 736 469 823 ლარი;
კახეთი – 421 000 000 ლარი;
სამცხე-ჯავახეთი – 409 441 633 ლარი;
შიდა ქართლი – 353 199 362 ლარი;
იმერეთი – 131 994 071 ლარი;
სამეგრელო-ზემო სვანეთი – 96 703 744 ლარი.

● კორუფციის რუკაზე ნახავთ პარლამენტის დეპუტატებს, რომლებიც ჩამოყალიბდნენ ადგილობრივ “ფეოდალებად“: ანზორ ბოლქვაძე, ვიქტორ ჯაფარიძე, ასევე ყოფილ დეპუტატებს – იოსებ მაკრახიძე, ენზელ მკოიანი, ჯუმბერ იზორია.

აქვე არიან სხვადასხვა მუნიციპალიტეტის მერები, მათ შორის სენაკის მერი, ვახტანგ გადელია, ზუგდიდის მერი, მამუკა წოწერია, ახალციხის ყოფილი მერი, ზაზა მელიქიძე, ადგილობრივი საკრებულოების წევრები და მერიის სხვადასხვა მუნიციპალური სამსახურის ხელმძღვანელები.

● რუსული ბიზნესი საქართველოში. ვინ არიან მსხვილი მოთამაშეები
● საქართველო – ქვეყანა, სადაც დამსაქმებელი კადრს ვერ პოულობს, უმუშევარი კი სამსახურს. რა არის ამის მიზეზი?
● საქართველოს ყოფილ გენერალურ პროკურორს, ოთარ ფარცხალაძეს, აშშ-მ სანქციები დაუწესა

● თანამდებობის პირებთან და მათი ოჯახის წევრებთან დაკავშირებული კომპანიების გარდა, დოკუმენტში მოხვდნენ ის კომპანიები, რომლებიც პირადად არიან დაკავშირებულნი ბიძინა ივანიშვილთან და სხვადასხვა კლანურ დაჯგუფებებთან.

● ე.წ. „კახური კლანის“ შემადგენელია კომპანია „სერპანტინი“, რომელმაც ბოლო 10 წელიწადში სახელმწიფო შესყიდვებით 254 მილიონ ლარზე მეტი მიიღო. კომპანიას დღეს ხელმძღვანელობს კრიზისების მართვის საბჭოს მდივნის ყოფილი მოადგილე, გიორგი ზედელაშვილი, რომელიც ყოფილ პრემიერმინისტრთან, ირაკლი ღარიბაშვილთან დაახლოებული პირია.

● დიმიტრი თათეშვილის კომპანია „არალი“ ბიძინა ივანიშვილის დაგეგმილ პროექტებს ახორციელებს აბასთუმანში და ბიძინა ივანიშვილთან დაახლოების შემდეგ, მხოლოდ სახელმწიფო შესყიდვებიდან 363 მილიონი ლარის შემოსავალი მიიღო.

● გიორგი ჭყონია ხელისუფლებასთან დაახლოებული ბიზნესმენი და „ქართული ოცნების“ მსხვილი შემწირველია. 2011-2023 წლებში სახელმწიფო შესყიდვებიდან შემოსავლის სახით მიიღო 335 638 719 ლარი.

“ამ და სხვა კომპანიების მონაწილეობა მსხვილ სახელმწიფო შესყიდვებში და შემდგომ მათი ჩართულობა მმართველი პოლიტიკური ძალის დაფინანსებაში ქმნის სახელმწიფოს მიტაცებისა და კლეპტოკრატიული მმართველობის სისტემას ქვეყანაში.

კორუფციის რუკა პირველად 2021 წლის ადგილობრივი თვითმმართველობის არჩევნების წინ შევთავაზეთ საზოგადოებას. მაშინ დაჯამებულმა თანხამ 665 მილიონი ლარი შეადგინა. განვლილ 2 წელიწადში, ჩვენი რეგიონული ოფისების მიერ შესწავლილი სავარაუდო კორუფციული შესყიდვების ოდენობა თითქმის მილიარდნახევარი ლარით გაიზარდა.

ამდენად, საქართველოს რეგიონებში სულ უფრო იმატებს კორუფციული შემთხვევები, რაც უკონტროლო სახეს იღებს, ვინაიდან მათზე შესაბამისი სტრუქტურები ან საერთოდ არ რეაგირებენ, ან საზოგადოებას არ აწვდიან ინფორმაციას ამ საქმეებით დაინტერესების შესახებ.“ – ნათქვამია TI-ს კვლევაში.