საქართველოში კორონავირუსზე პაციენტის შემოწმების წესი შეიცვალა: ვის გაუკეთებენ ტესტს?

COVID-19-ით დაავადებული 115 პაციენტიდან რამდენიმე შემთხვევაში დაინფიცირების წყაროს მოძიება ვერ მოხერხდა – საქართველო ახალი კორონავირუსის მასობრივი გავრცელების ეტაპზე გადავიდა. საერთაშორისო ფონდ კურაციოს კვლევის თანახმად, თუკი მოსახლეობა სოციალურ დისტანციას არ დაიცავს, მაისის შუა რიცხვებში კორონავირუსით დაინფიცირებულთა რაოდენობამ, შესაძლოა, 6000-ს მიაღწიოს. ხელისუფლება სტრატეგიას და კორონავირუსზე პაციენტების შემოწმების წესს ცვლის. 

1 აპრილის  მონაცემებით, საქართველოში კორონავირუსით ინფიცირების 115 შემთხვევაა დადასტურებული. კარანტინის რეჟიმშია 5106 ადამიანი, ხოლო სტაციონარში მეთვალყურეობის ქვეშ – 294 პირი. კორონავირუსით ინფიცირებულთაგან 22 გამოჯანმრთელდა.

აქამდე მოქმედი წესის (პროტოკოლის) თანახმად, კორონავირუსზე ამოწმებდნენ მხოლოდ იმ პაციენტებს, რომლებსაც COVID-19-ის სიმპტომებთან ( მწვავე რესპირაციული ინფექცია, სიცხე)  ერთად კორონავირუსის მაღალი გავრცელების რისკის მქონე ქვეყნებში მოგზაურობის ისტორია ანდა COVID-19-ით დაავადებულთან კონტაქტი ჰქონდათ. 

ახალი წესის თანახმად, კორონავისრუსზე შემოწმებას პაციენტთა კიდევ 2 კატეგორია გაივლის: 

სიმპტომიანი პაციენტები – ისინი, ვისაც ახველებს, აქვს სიცხე, ყელის ტკივილი, მაგრამ არსად უმოგზაურია და არც სავარაუდო ავადმყოფთან ჰქონია კონტაქტი.

უსიმპტომო პაციენტები – ისინი, ვისაც არ აქვს COVID-19-ისთვის დამახასიათებელი სიმპტომები, მაგრამ ამბობს, რომ ჰქონდა სარისკო ქცევა: იმყოფებოდა კორონავირუსის მაღალი გავრცელების რისკის მქონე ქვეყნებში ( იტალიაში, რუსეთში, ირანში) ან უმასპინძლა ამ ქვეყნებიდან ჩამოსულ სტუმრებს ანდა კონტაქტი ჰქონდა კორონავირუსით დაინფიცირებულ ადამიანთან.

ახალ კორონავირუსზე ტესტი ჩაუტარდება იმ სამედიცინო პერსონალსაც, რომელიც მაღალი რისკის მქონე კლინიკებში მუშაობს. 

მაღალი სიცხის მქონე პაციენტებისთვის კი საქართველოს 40-მდე კლინიკაში “ცხელების ზონა” შეიქმნა. დღეიდან, იმ პაციენტებს, რომლებსაც სიცხე აქვთ და ამის გამო ჰოსპიტალს ან ამბოლატორიულ კლინიკას მიმართავენ, კლინიკაში გამოყოფილ სპეციალურ ზონაში გადაიყვანენ. მათ იქ  24 საათის განმავლობაში დატოვებენ და კორონავირუსზე ანალიზსაც გაუკეთებენ. თუ ანალიზის პასუხით დადგინდება, რომ პაციენტს კორონავირუსი აქვს, მაშინ მას თბილისის, ან სხვა რომელიმე იმ ქალაქის კლინიკაში გადაიყვანენ, სადაც COVID-19-ს მკურნალობენ.

კორონავირუსით დაინფიცირებულთა შორის არიან პაციენტები მარნეულიდან, თერჯოლიდან და ბოლნისიდან, რომელთა დაინფიცირების წყაროს მოძებნა ვერ მოხერხდა და საქართველო უკვე კორონავირუსის პანდემიის „მასობრივი გავრცელების“ ეტაპზე გადავიდა. 

პროგნოზი საქართველოში

ფონდის პროგნოზით, თუკი მოსახლეობა არ დაიცავს სოციალურ დისტანციას და კონტაქტების რაოდენობას არ შეამცირებს, მაშინ საქართველომ შესაძლოა, ძალიან მალე, კორონავირუსის პირველი შემთხვევის გამოვლენიდან ( 26 თებერვალი) მე-11 კვირაში (ანუ მაისის  შუა რიცხვებში) ეპიდემიის პიკს მიაღწიოს,

პიკის დროს კი საავადმყოფოებში 6 000 ადამიანი მოხვდეს, რასაც ქვეყნის ჯანდაცვის სიტემა ვერ გაუძლებს. 

კვლევაში აღნიშნულია, რომ სოციალური დისტანცირება სასიცოცხლოდ აუცილებელია ეპიდემიის შესაკავებლად. 

სოციალური დისტანცირების გარეშე ეპიდემია პიკს მაისის მეორე კვირაში მიაღწევს – საავადმყოფოში მკურნალობა კი  5950 ადამიანს დასჭირდება, რასაც ჯანდაცვის სისტემა ვერ გაუძლებს.

თუ მოსახლეობა 10%-ით შეამცირებს კონტაქტებს, ეპიდემია პიკს ივნისის დასაწყისში მიაღწევს, საავადმყოფოში მკურნალობა კი  4 174 პაციენტს დასჭირდება.

კონტაქტების 20%-ით  შემცირების შემთხვევაში, ეპიდემია პიკს ივნისის შუა რიცხვებში მიაღწევს, საავადმყოფოში გადასაყვანი ადამიანების რაოდენობა კი 2 656-მდე შემცირდება.

კონტაქტების 30%-ით შემცირებით, ეპიდემიის პიკი ივლისის ბოლომდე გადაიწევს, მძიმე ავადმყოფობის შემთხვევები კი 1 418-მდე შემცირდება.

• რას ნიშნავს საგანგებო მდგომარეობა – რისი უფლება გვაქვს და რისი არა
• მარნეული და ბოლნისი დაიკეტა
• მარნეული ეპიდაფეთქების მოლოდინში. რა ხდება დახურულ ქალაქში
• საქართველოში საყოველთაო კარანტინი ცხადდება

კორონავირუსის პანდემიის შეჩერების მიზნით საქართველოში 21 მარტს საგანგებო ვითარება გამოცხადდა, 23 მარტს კი კორონავირუსის შიდა გავრცელების გამო მარნეული და ბოლნისი დაიკეტა. კორონავირუსის შიდაგავრცელების მაღალი რისკის გამო 31 მარტიდან საქართველოს მთელს ტერიტორიაზე კომენდანტის საათი ამოქმედდა.