სომხეთში აბიტურიენტები წელს ერთ გამოცდას ჩაბაარებენ, მოსწავლეებს კი გამოცდები საერთოდ არ ექნებათ

სომხეთში გადაწყდა, რომ საგანგებო მდგომარეობის რეჟიმში სკოლების, სასწავლებლების და კოლეჯების გამოსაშვებ კლასებში გამოცდები გაუქმდეს. ამის შესახებ განათლების, მეცნიერების, კულტურისა და სპორტის მინისტრმა არაიკ არუთიუნიანმა პირდაპირი ეთერის დროს განაცხადა.

სომხეთში საგანგებო მდგომარეობის რეჟიმი 16 მარტს დაწესდა. ის 14 აპრილს უნდა დასრულებულიყო. მაგრამ, ვინაიდან ქვეყანაში კორონავირუსის გავრცელების შეჩერება ვერ მოხერხდა, მთავრობამ კარანტინი კიდევ ერთი თვით – 14 მაისამდე გააგრძელა.

დამამთავრებელი კლასების მოსწავლეებისთვის გაუქმდა ასევე სკოლასთან საზეიმო გამოთხოვება – ეგრეთ წოდებული „ბოლო ზარი“. ეს ღონისძიება ჯერჯერობით გაურკვეველი ვადით არის გადადებული.

აბიტურიენტებმა კი უმაღლეს სასწავლებლებში სწავლის გასაგრძელებლად მხოლოდ ერთი გამოცდა უნდა ჩააბარონ; კერძოდ, რომელ საგნებში – ჯერჯერობით არ იუწყებიან.

• საქართველოში საგანგებო მდგომარეობის გაუქმების პირველი ეტაპი დაიწყო

სკოლების, გამოცდებისა და „ბოლო ზარის“ შესახებ

სომხეთში გამოცდებს არამხოლოდ გამოსაშვები კლასების მოსწავლეები აბარებენ, არამედ მეოთხე და მეცხრე კლასის მოსწავლეებიც. ეს არის ეგრეთ წოდებული გადასასვლელი გამოცდები.

 „გადაწყდა, რომ სკოლებში მე-4 და მე-9 კლასების გადასასვლელი გამოცდები არ ჩატარდეს. წლიური შეფასებები ყველა საგანში მოსწავლეების მიერ 13 მარტამდე მიღებული და ელექტრონულ ჟურნალში შეტანილი ნიშნების მიხედვით შეჯამდება“, – თქვა მინისტრმა პირდაპირ ეთერში.

ასევე წარმოდგენილი იქნება საერთო-საგანმანათლებლო სკოლებისა და სასწავლებლების კურსდამთავრებულთა წლიური შეფასებები. მაგრამ მათ, ვინც დეკემბერში შუალედური გამოცდა ჩააბარა, არჩევანის უფლება ეძლევათ. მოსწავლეებს შეეძლებათ, რომ დიპლომისთვის ან ამ გამოცდების შედეგების მიხედვით მიღებული ნიშნები აირჩიონ, ან – წლიური შემაჯამებელი ნიშნები.

რაც შეეხება ატესტატების გადაცემას, სკოლის მოსწავლეები მათ – 25 მაისამდე,  კოლეჯის მოსწავლეები კი თავიანთ დიპლომებს – 5 ივნისამდე მიიღებენ.

მინისტრის თქმით, ატესტატებისა და დიპლომების სწორედ ამ ვადებში გადაცემა იმიტომ გადაწყდა, რომ ჯარში საზაფხულო სასწრაფოდ  გაწვევის გრაფიკს ხელი არ შეშლოდა.

 „საგანგებო რეჟიმის პირობებში ჩვენთვის პირველი რიგის ამოცანას წარმოადგენს, არ დაირღვეს სამხედრო სამსახურში გაწვევის პროცესი, და  მეტ-ნაკლებად ობიექტური, მოსწავლეების ინტერესებიდან გამომდინარე ნიშნები დაიწეროს“.

მინისტრის თქმით, კურსადმთავრებულთა „ბოლო ზარი“ აუცილებლად შედგება, მაგრამ არა – 25 მაისს, როგორც ეს ჩვეულებისამებრ ხდება ხოლმე.

 „როგორც კი ჯანდაცვის სამინისტრო გვაცნობებს, რომ ხალხმრავალი ღონისძიებები საფრთხეს აღარ წარმოადგენს, ავირჩევთ დღეს, და „ბოლო ზარს“ გრანდიოზულად აღვნიშნავთ“, – დაჰპირდა მინისტრი.

აბიტურიენტების შესახებ

სკოლის დამთავრების ტრადიციულ ვადამდე თვეზე ნაკლები დარჩა, კურსადმთავრებულები, კორონავირუსის პანდემიის მიუხედავად, მთელი ძალით ემზადებიან უნივერსიტეტებში მისაღები გამოცდებისთვის. და ძალიან ბევრი ელოდა ინფორმაციას იმის შესახებ, თუ როგორ მოხდებოდა წელს ეს ყველაფერი.

საბოლოოდ, არაიკ არუთიუნიანმა განაცხადა, რომ უმაღლეს სასწავლებლებში მისაღები გამოცდები ივლისის დასაწყისში ჩატარდება, ხოლო აბიტურიენტებს საბუთების ჩაბარება 25 მაისიდან 15 ივლისამდე შეეძლებათ.

 „აბიტურიენტები წელს მხოლოდ ერთ მისაღებ გამოცდას ჩააბარებენ. იმ აბიტურიენტებს, რომლებმაც განცხადება რამდენიმე გამოცდის ჩაბარებაზე 15 მარტამდე შეიტანეს და ფული გადაიხადეს, ფული უკან დაუბრუნდებათ. ჩვენ ეს გადაწყვეტილება უნივერსიტეტებთან ერთად უნდა განვიხილოთ. 30 რიცხვის შემდეგ გამოვაცხადებთ, თუ ვინ რა გამოცდა უნდა ჩააბაროს ამა თუ იმ უმაღლეს სასწავლებელში ჩასაბარებლად“.

რაც შეეხება გამოცდების ჩატარების წესს, მინისტრმა თქვა, რომ სომხეთის მთელ ტერიტორიაზე საგამოცდო ცენტრები გაიხსნება. იმისთვის, რომ ადამიანების სიმრავლე თავიდან იქნას აცილებული, დარბაზში პრეტენდენტთა შეზღუდულ რაოდენობას დაუშვებენ.

აბიტურიენტები გამოცდებს ნიღბებით ჩააბარებენ. საგამოცდო ცენტრები სადეზინფექციო საშუალებებით უზრუნველყოფილი იქნება.

 „გამოცდა უსაფრთხოების ყველა წესის დაცვით ჩატარდება“, – ირწმუნებოდა მინისტრი. მან აბიტურიენტების მშობლებს სთხოვა, რომ არ მივიდნენ იმ ცენტრებში, სადაც მათი შვილები გამოცდებს ჩააბარებენ.

რას წერენ სოციალური ქსელებში

Facebook-ის სომხური სეგმენტის მომხმარებელთა აზრი გაიყო. ზოგი სამინისტროს გადაწყვეტილებას ემხრობა, სხვები აკრიტიკებენ.

აი, ზოგიერთი კომენტართაგანი:

 „ეს სწავლა არ არის! უბრალოდ მარაზმია!“

 „არ არის საჭირო ბავშვებისთვის ზედმეტი სტრესის მიყენება! ქვეყანა არ დაინგრევა, უბრალოდ შეძლებისდაგვარად ყველაფრის ორგანიზება უნდა მოხდეს“.

 „ძალიან სწორი გადაწყვეტილებაა“.

 „თუკი ბავშვებს 13 მარტამდე მიღებული ნიშნების მიხედვით შეაფასებენ, მაშინ დისტანციურ სწავლებას რაღა აზრი ჰქონდა? სწავლას და ნიშნების მიღებას ხომ მაინც აგრძელებდნენ!“.