საქართველოში კორონავირუსის რეკორდული, 38 შემთხვევა გამოვლინდა
ბოლო 24 საათის განმავლობაში საქართველოში კორონავირუსის 38 ახალი შემთხვევა გამოვლინდა. ეს რეკორდული რიცხვია საქართველოსთვის. მანამდე ყველაზე მაღალი დღიური მაჩვენებელი 16 აპრილს დაფიქსირდა, როცა 24 საათში covid-19-ის 34 შემთხვევა გამოვლინდა
ეპიდემიოლოგების შეფასებით, სიტუაცია საგანგაშო არ არის და კორონავირუსით ინფიცირების დადასტურებული შემთხვევების რაოდენობის მატება ქვეყანაში მკაცრი კარანტინის შემოღების საფუძველს არ წარმოადგენს.
პრემიერ-მინისტრის განცხადებით, არ გადაიდება არც სწავლის დაწყების თარიღი და სკოლებსა და უმაღლეს სასწავლებლებში სასწავლო პროცესი 15 სექტემბერს განახლდება, როგორც ეს აქამდე იყო დაგეგმილი.
“დონას” კლასტერი ბათუმში
კორონავირუსის 38 ახალი შემთხვევიდან 26 ბათუმში გამოვლინდა. აქედან 23 საკონდიტრო მაღაზია-კაფე “დონას” უკავშირდება. covid-19 გამოვლინდა “დონას” ორივე ფილიალში. ოცდასამივე ინფიცირებული კაფეს თანამშრომელია. გავიდა თუ არა ინფექცია “დონას” გარეთ, ეს ჯერჯერობით, უცნობია.
სვანეთისგან განსხვავებით, სადაც 10 აგვისტოს, სოფელ ლენჯერში კორონავირუსის 16 შემთხვევის გამოვლენის გამო მესტიასა და ლენჯერში კარანტინი გამოცხადდა, ბათუმის ჩაკეტვა არ იგეგმება – დღეს პრემიერ-მინისტრმა გიორგი გახარიამ ღიად განაცხადა, რომ ბათუმში საკარანტონო შეზღუდვები არ დაწესდება.
“დღეს ბათუმში კონცენტრირებულია საკმაოდ მაღალი რაოდენობა ჩვენი მოქალაქეების, რომლებიც ისვენებენ და აქ ყურადღებაა გასამახვილებელი, გასაძლიერებელია ტესტირება ბულვარში და სხვადასხვა წერტილებში”, – თქვა გახარიამ.
• აფხაზური სოფლის მოსახლეობა, რომლის მკვიდრიც კორონავირუსით გარდაიცვალა, კარანტინს აპროტესტებს
დაავადებათა კონტროლის ეროვნული ცენტრის გადაწყვეტილებით, ბათუმში გაფართოებული ტესტირება დაიწყო.
აჭარის ავტონომიური რესპუბლიკის ჯანდაცვის სამინისტრო ტესტის გაკეთებას ურჩევს ყველა მოქალაქეს, ვინც ბოლო ორი კვირის განმავლობაში საკონდიტრო “დონაში”, ან იქ მყოფ ადამიანებთან კონტაქტში იმყოფებოდა.
ბათუმში კორონავირუსზე უფასო ტესტის გაკეთება შესაძლებელია ბულვარის ტერიტორიაზე განთავსებულ 3 სპეციალურ კარავში.
“ბათუმში სამი ლაბორატორია მუშაობს და 1600-1800 ტესტის გაკეთების საშუალებას იძლევა. თუ საჭირო გახდება, მიემატება იმერეთისა და სამეგრელოს შესაბამისი სამსახურები,“ – განაცხადა დაავადებათა კონტრლის ეროვნული ცენტრის ხელმძღვანელმა, ამირან გამყრელიძემ.
მდგომარეობა მართვადი და კონტროლირებადია – ამირან გამყრელიძე
გამყრელიძის განცხადებით, კორონავირუსით ინფიცირების შემთხვევათა მატება მოსალოდნელი იყო, რადგან ზაფხულში შიდა ტურიზმი გაიზარდა.
მისივე თქმით, ამ რაოდენობის ახალი შემთხვევები ჯანდაცვის სისტემისთვის დიდ ტვირთს არ წარმოადგენს.
„პრინციპში, ეს პროგნოზირებადი იყო იმ თვალსაზრისით, რომ ქვეყანაში მობილობა სერიოზულად გაზრდილია. ზაფხულია, ქვეყანაში შიდა ტურიზმი სერიოზულად არის გაზრდილი. 38 შემთხვევა იქნება, 25, 30 თუ 50, ეს არ წარმოადგენს დიდ ტვირთს ჯანდაცვის სისტემისთვის. ის სრულად მართვადი და კონტროლირებადია,“ – განაცხადა გამყრელიძემ.
დაავადებათა კონტროლის ეროვნული ცენტრი ინფორმაციით, საქართველოში ამ დროისთვის PCR-ტესტი 386 ათას ადამიანს აქვს გაკეთებული.
პრემიერ-მინისტრის თქმით, აუცილებელია, რომ ბათუმიდან ვირუსი არ გავრცელდეს იმ ქალაქებში, სადაც დამსვენებლები დაბრუნდებიან. ამიტომ გახარიამ მოუწოდა მერებს, რომ ქალაქებში, საზოგადოებრივ ტრანსპორტსა და კვების და სავაჭრო ობიექტებში პირბადის ტარება მკაცრად გაკონტროლდეს.
2 სექტემბრის მონაცემებით, საქართველოში კორონავირუსის დადასტურებულ შემთხვევათა რაოდენობა 1 548-მდე გაიზარდა, გამოჯანმრთელებულია 1 270 ადამიანი, ხოლო გარდაცვლილია – 19. კარანტინის რეჟიმშია 6 059 ადამიანი, სტაციონარში მეთვალყურეობის ქვეშ კი – 239.
