ხაზარაძე-ჯაფარიძე-წერეთელი სასამართლომ გაამტყუნა, თუმცა ხანდაზმულობის გამო მათ არ დაიჭერენ
ხაზარაძე-ჯაფარიძე-წერეთლის საქმე
პარტია “ლელოს” ლიდერები და TBC ბანკის დამფუძნებლები მამუკა ხაზარაძე და ბადრი ჯაფარიძე, ასევე ბიზნესმენი და ტელეკომპანია TVპირველის დამფუძნებლის, ვახტანგ წერეთლის მამა, ავთანდილ წერეთელი სასამართლომ დამნაშავედ ცნო და მათ 7-წლიანი პატიმრობა შეუფარდა, თუმცა საქმის ხანდაზმულობის გამო მათ არ დააპატიმრებენ.
“ლელოს” ლიდერები ამბობენ, რომ ამ გადაწყვეტილებას გაასაჩივრებენ, რადგან, ბადრი ჯაფარიძის განმარტებით, დანაშაული არ არსებობს.
“ეს არის გაგრძელება იმ თაღლითობის, რომელსაც ჩადიოდა პროკურატურა, რადგან ცხადია, არანაირი ნიშანწყალი არ ყოფილა არასდროს არანაირი ფულის გათეთრების ან რაიმე დანაშაულის, რაც მოსამართლემ გამოაცხადა, მან შეცვალა მუხლი, ფულის გათეთრების, მოახდინა გადაკვალიფიცირება იმ მუხლით, რომელზეც ვრცელდება ხანდაზმულობა და გაგვათავისუფლა ყველანაირი პასუხისმგებლობისგან”, – ამბობს ჯაფარიძე.
მამუკა ხაზარაძის თქმით, სადაც არ არის სამართალი, იქ არ არის მშვიდობა. ასევე, მან მიმართა ბიძინა ივანიშვილს და განაცხადა, რომ ქართველი ხალხი ვერ შეეგუება ასეთ უსამართლობას ამ ქვეყანაში.
“სანამ ყველა მოქალაქეს არ ექნება იმის განცდა, რომ მის უფლებებს, მის ღირსებას იცავს დამოუკიდებელი და მიუკერძოებელი სასამართლო. […] როგორც ბადრიმ თქვა, გპირდებით, გავაგრძელებთ ბრძოლას ქვეყნის საუკეთესო მომავლისთვის, ამ ქვეყანას აქვს უზარმაზარი პერსპექტივა, ეს პერსპექტივა არის თითოეულ თქვენგანში, მაგრამ დახშული, მიმალული, შეშინებული. ეს უნდა გამოვაღვიძოთ, უნდა დავივიწყოთ მტრობა, გავერთიანდეთ ჩვენი სამშობლოს გარშემო და საქართველო უნდა გავხადოთ წარმატებული ქვეყანა”, – განაცხადა მამუკა ხაზარაძემ.
სასამართლოს გადაწყვეტილებას გამოეხმაურა “ერთიანი ნაციონალური მოძრაობის” თავმჯდომარე ნიკა მელიაც. მისი თქმით, “ლელოს” ლიდერების დაჭერა ივანიშვილის სტანდარტითაც კი მეტისმეტი იქნებოდა, რაც ვერ გაბედა:
“მისასალმებელია ის, რომ ადამიანები სამი წლის განმავლობაში იბრძოდნენ, მიხარია, რომ ასეთი ადამიანები სულ უფრო და უფრო ბევრნი არიან პოლიტიკურ სპექტრში, რომლებიც არ ნებდებიან და თავს არ უხრიან, სწორედ ეს გათვლა ჰქონდა ბიძინა ივანიშვილს ამ სამი წლის განმავლობაში, რომ სხვადასხვა საქმის აღძვრის შემდეგ, გამოშიგნავდა ოპოზიციური ველიდან სხვადასხვა პოლიტიკოსს, მაგრამ თქვენ ნახეთ პირიქით, გინდაც მამუკა, გინდაც ბადრი, ბატონი ავთო, უფრო და უფრო შეუპოვრები ხდებოდნენ.”
● ოლიგარქიული გავლენები და პოლიტიზირებული სასამართლო – საქართველო Freedom House-ის ანგარიშში
● ყოფილი პრემიერი, მოქალაქე, მილიარდერი. ივანიშვილი ამბობს, რომ საბოლოოდ წავიდა პოლიტიკიდან
● უნდობლობა სასამართლოს მიმართ და ანაკლიის პორტი – რას წერს აშშ-ის სახელმწიფო დეპარტამენტი
ხაზარაძე-ჯაფარიძე-წერეთლის საქმე
სასამართლო ყველაზე მსხვილი ბანკის – თიბისი (TBC) ბანკის ერთ-ერთი ტრანზაქციის საქმეს იხილავდა. საქმე ძალიან სერიოზულია – იგი ეხება უკანონო შემოსავლების ლეგალიზაციას ანუ ფულის გათეთრებას. საუბარია 17 მილიონ დოლარზე.
ინფორმაცია იმის შესახებ, რომ პროკურატურამ თიბისიდან დოკუმენტაცია გამოითხოვა და საქმეს იძიებს, მედიაში 2019 წლის 8 იანვარს საზოგადოებრივმა მაუწყებელმა გაავრცელა. შემდეგ კი ვრცელი სტატია ერთ-ერთ პროსახელისუფლებო ვებ-გვერზე, kvira.ge-ზე გაჩნდა. მოგვიანებით, პროკურატურამ სპეციალური განცხადებით განმარტა, რომ გამოძიება ჯერ კიდევ გასული წლის მაისში დაიწყო.
უკვე აგვისტოში პროკურატურამ დაიწყო სისხლის სამართლის საქმის გამოძიება უკანონო შემოსავლების ლეგალიზაციის ფაქტზე. ამ საქმეში თიბისი ბანკის პირველი პირები – სამეთვალყურეო საბჭოს თავმჯდომარე მამუკა ხაზარაძე და მისი მოადგილე ბადრი ჯაფარიძე ფიგურირებენ. ტრანზაქცია, რომელსაც პროკურატურა იძიებს, 2008 წლით თარიღდება.
როგორც პროკურატურის განცხადებაში წერია, 11 წლის წინ აპრილში თიბისი ბანკმა კომპანიებს შპს „სამგორი M“-ს და „სამგორი თრეიდს“ საბრუნავი თანხების შესავსებად, 17 მილიონი დოლარი ასესხა.
ამავე განცხადებაში ვკითხულობთ, რომ თურმე სესხი დაჩქარებული წესით და პროცედურების დარღვევით გაიცა, შემდეგ კი, ასეთი რამე მოხდა: თიბისი ბანკის სამეთვალყურეო საბჭოს თავმჯდომარის, მამუკა ხაზარაძის და მისი მოადგილის – ბადრი ჯაფარიძის საბანკო ანგარიშებზე ჩაირიცხა 17 მილიონი დოლარი. გადამრიცხველები ის კომპანიები იყვნენ, რომლებმაც თიბისიდან ფული ისესხეს.
პროკურატურა ამბობდა, რომ თიბისი ბანკს ეს 17 მილიონი დღემდე არ დაბრუნებია. მეტიც, 2012 წელს თიბისიმ საერთოდაც გაათავისუფლა „სამგორი M“-ი და „სამგორი თრეიდი” სასესხო ვალდებულებისგან, როდესაც მათ უფლება მისცა 17 მილიონიანი საბანკო ვალდებულება ოფშორში დარეგისტრირებულ კომპანიაზე გადაეტანათ. პროკურატურის განცხადებიდან გაუგებარია, თუ რატომ უწოდებს პროკურატურა ამ თანხას “შავ ფულს” .
საქმის კიდევ ერთი საინტერესო დეტალი ის არის, რომ კომპანიები “სამგორი M” და “სამგორი თრეიდი” ბიზნესმენ ავთანდილ წერეთელს ეკუთვნის. ხოლო მის შვილს, ვახტანგ წერეთელს ეკუთვნის ტელეკომპანია “ტვ პირველი”.
TBC ერთ-ერთი წამყვანი ბანკია საქართველოში, რომელიც თითქმის ორ მილიონ მომხმარებელს ემსახურება. იგი 1992 წელს დაარსდა. ეს არის ქვეყანაში პირველი ბანკი აქტივების მიხედვით და ბაზრის ლიდერი საცალო დეპოზიტების სეგმენტში. შვილობილ კომპანიებთან ერთად თიბისიში დასაქმებულია თითქმის 7 ათასი ადამიანი.
ამ საქმესთან დაკავშირებით მრავალი ვერსია გამოითქვა. ერთი რამ, რაც ყველა ვერსიას აერთიანებს, ბიძინა ივანიშვილია – არავის სჯერა, რომ პროკურატურამ ქვეყნის ერთ-ერთი მთავარი ფინანსური ინსტიტუტის “შეწუხება” არაფორმალური მმართველის თანხმობის გარეშე გაბედა.
ზოგის აზრით, ხაზარაძე იმის გამო ისჯება, რომ ყოფილი პრემიერის, ერთ დროს ივანიშვილის ფავორიტის და შემდეგ მის მიერ მოძულებული და თანამდებობიდან გათავისუფლებული გიორგი კვირიკაშვილის მეგობარია.
ხდება პარალელების გავლება 2004 წლის რუსეთთანაც, როდესაც ვლადიმირ პუტინი თავის პოტენციურ კონკურენტებს, ბიზნესმენებს და მედია-მაგნატებს – გუსინსკის, ხოდორკოვსკის და სხვებს დაერია.
ექსპერტები ასევე ამახვილებენ ყურადღებას იმ ფაქტზე, რომ თიბისის წინააღმდეგ საქმის აღძვრით ივანიშვილი ორ “კურდღლეს” იჭერს – გავლენიან ბანკირ ხაზარაძეს და მზარდი პოპულარობის მქონე არხის “ტვ პირველის” მფლობელს ავთანდილ წერეთელს.
მაგრამ მთავარი ვერსია მაინც ანაკლიის პორტია.
ამ ვერსიის თანახმად, ივანიშვილი იმ ფაქტმა გააღიზიანა, რომ თიბისი ბანკი თანამედროვე საქართველოს ერთ-ერთი ყველაზე მნიშვნელოვანი პროექტის – ანაკლიის პორტის მშენებლობაშია ჩართული. ამას ივანიშვილი თავადაც არ მალავს.
• საქართველოში პირველი ღრმაწყლოვანი პორტის მშენებლობა დაიწყო. ფოტორეპორტაჟი
• აშშ-ის სახელმწიფო მდივანი: “აშშ მოუთმენლად ელის იმ დღეს, როდესაც საქართველო ნატოს წევრი გახდება”
რამდენიმეწლიანი პაუზის შემდეგ პოლიტიკაში დაბრუნებულმა ივანიშვილმა ერთ-ერთ ინტერვიუში თქვა, რომ საქართველოში არის ორი ბანკი – “თიბისი” და “საქართველოს ბანკი”, რომლებმაც “მთელი ქვეყანა შეჭამეს”.
იმავე ინტერვიუში ივანიშვილმა ბანკების ინტერესების ლობირებისთვის იმჟამინდელი პრემიერი გიორგი კვირიკაშვილიც დატუქსა. ივანიშვილს მხედველობაში ჰქონდა ის ფაქტი, რომ ანაკლიაში პორტის მშენებლობის ტენდერი თიბისიმ სწორედ კვირიკაშვილის პრემიერობის დროს მოიგო.
