ივანიშვილისა და რუსი ბიზნესმენის სატელეფონო ჩანაწერის გამო, არახამია პერსონალურ სანქციებს მოითხოვს
ივანიშვილისა და რუსი ბიზნესმენის სატელეფონო ჩანაწერი
იუთუბზე გავრცელდა ორი აუდიოჩანაწერი, სადაც, სავარაუდოდ, ბიძინა ივანიშვილსა და რუს სანქცირებულ ოლიგარქს, ვლადიმერ ევტუშენკოვს შორის საუბარი ისმის. ჩანაწერები გაკეთებულია მიმდინარე წლის 10 და 12 მარტს, ანუ მაშინ, როცა რუსეთი უკრაინაში უკვე შეჭრილი იყო. უკრაინის მმართველი პარტიის, “ხალხის მსახურის” თავმჯდომარის, დავით არახამიას განცხადებით, ის მიმართავს ევროკავშირსა და ამერიკას, განიხილონ ივანიშვილისთვის პერსონალური სანქციები.
რას ვიგებთ ჩანაწერიდან
ჩანაწერში ევტუშენკოვი ივანიშვილს სთხოვს სანქციების გვერდის ავლაში დახმარებას, თუ მასაც აქვს ამის სურვილი. ჩანაწერში ისმის კონკრეტული სახელები და გვარები – მათ შორის ახსენებენ სანქცირებული ევტუშენკოვის კომპანიაში ვიცე-პრეზიდენტის, ალი უზდენოვის ვიზიტს საქართველოში.
ასევე, ჩანაწერში ახსენებენ ვინმე დავითს, რომელიც, სავარაუდოდ, კარტოგრაფების საქმის ფიგურანტი, ქართული წარმოშობის რუსეთში მოღვაწე ბიზნესმენი დავით ხიდაშელია. იგი რუსეთში ყოფნისას სატელეკომუნიკაციო კომპანია “სისტემას” ვიცე-პრეზიდენტი იყო. სწორედ ამ კომპანიის საკონტროლო პაკეტის მფლობელია ევტუშენკოვი.
ივანიშვილი ევტუშენკოვს ეუბნება იმასაც, რომ “სიტუაცია არასახარბიელოა, მაგრამ გაძლებაა საჭირო, რას იზამ”. ამის შემდეგ, სავარაუდოდ ევტუშენკოვი თანამოსაუბრეს ეუბნება, რომ რაღაცას “მანდ დავითი მოიტანს”, რაც მისივე თქმით, ივანიშვილსაც დააინტერესებს და სხვებსაც.
დავით არახამია: “მივმართავ ევროკავშირსა და ამერიკას, განიხილონ ივანიშვილისთვის პერსონალური სანქციები“
ჩანაწერის გამოქვეყნებიდან მალევე საკუთარ ტელეგრამ-არხზე განცხადება გაავრცელა უკრაინის მმართველი პარტიის, “ხალხის მსახურის” თავმჯდომარემ დავით არახამიამ.
“უკრაინელები და ქართველები ყოველთვის იყვნენ და იქნებიან მოძმე ერები.
ქართველმა ცნობილმა ადამიანებმა ჩვენი მხარდასაჭერი ვიდეო 24 თებერვლამდეც კი ჩაწერეს, ეს მაშინ, როდესაც ბევრი ქართველი იბრძვის ფრონტის ხაზზე უკრაინისთვის ომის დაწყებიდან. ისინი უაღრესად უჭერენ მხარს უკრაინასა და ჩვენს გამარჯვებას ომში. თუმცა, სამწუხაროდ იმავეს ვერ ვიტყვით საქართველოს ხელისუფლებაზე.
და მიზეზი მარტივია – ქვეყნის მთავარ ოლიგარქს, ბიძინა ივანიშვილს, ახლო კავშირები აქვს რუსულ პოლიტიკურ ელიტასთან, რაც კიდევ ერთხელ დადასტურდა ახლახან გამოქვეყნებული ჩანაწერით“, – წერს არახამია.
მისივე თქმით, საქართველოს ამჟამინდელი ხელისუფლების არსი კრემლის მითითებების შესრულებაა, რადგან სწორედ ეს არის მიზეზი მათი რიტორიკის, რომ არ აღიარონ რუსეთის ომის დანაშაულები უკრაინის წინააღმდეგ და დაეხმარონ რუსეთს სანქციებისთვის გვერდის ავლაში.
“დღეს ივანიშვილი გახდა საქართველოს იანუკოვიჩი. ის და მისი გულითადი მეგობრები უკრაინის მიმართ ატარებენ პოლიტიკას, რაც არ არის მხარდაჭერილი ქართველი ხალხის მიერ. მათ ქართველებისა და უკრაინელების განხეთქილება სურთ ათეული წლების მანძილზე. ამის თავიდან ასაცილებლად, მივმართავ ევროკავშირისა და აშშ-ს ხელმძღვანელობას, განიხილონ პერსონალური სანქციების დაწესება ივანიშვილსა და დასავლეთში განთავსებულ მის აქტივებზე. არავინ უნდა გაექცეს პასუხისმგებლობას – არც ოკუპანტები და არც ისინი, ვინც მათ ეხმარება.” – განმარტავს არახამია.
ვინ არის ვლადიმირ ევტუშენკოვი?
ევტუშენკოვის სახელმა საქართველოში ჯერ კიდევ “კარტოგრაფების საქმეში” გაიჟღერა. მაშინ პარტია “დროას” ლიდერმა ელენე ხოშტარიამ საგამოძიებო ვიდეო გამოაქვეყნა, საიდანაც ვიგებთ, რომ სწორედ ევტუშენკოვია დავით ხიდაშელის საკომუნიკაციო კომპანიის, “სისტემის” დამფუძნებელი და აქციების საკონტროლო პაკეტის მფლობელი.
“ვლადიმირ ევტუშენკოვი, პუტინთან დაახლოებული ბიზნესმენია. როგორც ირკვევა, კომპანია “სისტემა” გაეროს სანქციების გვერდის ავლით, კიმ ჩენ ინის რეჟიმის დროს ჩრდილოეთკორეელ მოქალაქეებს ასაქმებდა. კომპანია “სისტემა” 2014 წელს, მაიდანის მოვლენების დროს ვიქტორ იანუკოვიჩს აფინანსებდა და მისი კუთვნილი ბანკების მეშვეობით ფულის გათეთრებაში ეხმარებოდა. სისტემა დაკავშირებულია 90-იანი წლების ერთ-ერთ უდიდეს კრიმინალურ დაჯგუფება სოლნცევოსთან”. – ნათქვამია ხოშტარიას განცხადებაში.
წლების განმავლობაში საინჟინრო საქმიანობისა და რამდენიმე საწარმოს დირექტორის მოადგილეობის შემდეგ, 1987 წელს მოსკოვის ყოფილი მერის იური ლუჟკოვის მიწვევით ევტუშენკოვი საქალაქო აღმასრულებელ კომიტეტში გადავიდა სამუშაოდ და 1990 წელს მეცნიერებისა და ტექნიკის საქალაქო კომიტეტს ჩაუდგა სათავეში. 1991 წელს მის მიერ ჩამოყალიბული სააქციო საზოგადოება „რეგიონის“ და რუსულ–ამერიკული კომპანია „ორდინკას“ [მოსკოვის ცენტრში ძველი შენობების რეკონსტრუქციით იყო დაკავებული] ერთ–ერთი დამფუძნებელი გახდა.
1993 წელს ევტუშენკოვმა თანამოაზრეებთან ერთად დააფუძნა სააქციო ფინანსური კორპორაცია „სისტემა“, რომლის საქმიანობამ ეკონომიკის ერთდროულად რამდენიმე სექტორი მოიცვა. სადღეისოდ ამ კორპორაციაში უამრავი სხვადასხვა საწარმო შედის, რომელიც ენერგეტიკით, ხე–ტყის გადამუშავებით, ფარმაცევტიკით, ტელეკომუნიკაციებით, ტურიზმით და სხვა სექტორული საქმიანობით არის დაკავებული.
2000 წლიდან ევტუშენკოვი რუსეთის მრეწველთა და მეწარმეთა კავშირის მმართველი ბიუროს წევრია, ხოლო 2001 წლიდან – ამავე კავშირის სამრეწველო პოლიტიკის კომიტეტის ხელმძღვანელი; 2002 წლიდან – რუსეთის სავაჭრო სამრეწველო პალატის მმართველი საბჭოს და სამეცნიერო–ინოვაციური პოლიტიკის სამთავრობო კომისიის წევრი, რუსეთ–არაბეთის საქმიანი საბჭოს თავმჯდომარე, რუსეთის პრეზიდენტთან მოქმედი მეცნიერებისა და მაღალი ტექნოლოგიების საბჭოს, რუსეთი მთავრობის მეწარმეობისა და კონკურენტუნარიანობის საბჭოს, კორპორატიული მართვის ეროვნული საბჭოს წევრი.
2005 წლიდან ევტუშენკოვი „ფორბსის“ ვერსიით რუსეთის უმდიდრეს ბიზნესმენთა ათეულში შედის. მისმა ქონებამ მაქსიმალურ ნიშნულს 2008 წელს მიაღწია და 10,3 მლრდ დოლარი შეადგინა.
გამოხმაურება საქართველოში
აუდიოჩანაწერების გამოქვეყნებას გამოეხმაურა პარლამენტის თავმჯდომარე შალვა პაპუაშვილი. მან ჩანაწერებს “ფეიკი” უწოდა, ხოლო მმართველი პარტია “ქართული ოცნების” თავმჯდომარემ ირაკლი კობახიძემ განაცხადა, რომ “ავთენტური რომც იყოს, საუბარია რაღაც სავაჭრო ურთიერთობებზე.”
ოპოზიციურმა პარტია “ლელომ” ივანიშვილის და ევტუშენკოვის საუბარს ვრცელი ბრიფინგი მიუძღვნა. პარტია პრემიერმინისტრ ირაკლი ღარიბაშვილს მიმართავს, დაუყოვნებლივ გაასაჯაროოს ინფორმაცია, შეხვდა თუ არა თბილისში კრემლთან დაახლოებულ პირს, რუსეთის მმართველი პოლიტიკური პარტიის პოლიტსაბჭოს წევრს ალი უზდინოვს. პარტია მოითხოვს, თუ შეხვედრა შედგა, გასაჯაროვდეს საუბრის შინაარსი. ასევე, “ლელოს” ფრაქცია შსს-გან ოფიციალურად გამოითხოვს ინფორმაციას, გასული 2 თვის მანძილზე ალი უზდინოვმა გადმოკვეთა თუ არა სახელმწიფო საზღვარი.
“აღნიშნული ინფორმაციის დადასტურების შემთხვევაში, შესაძლოა, რომ საქართველოს დღევანდელი ხელისუფლება, პრემიერმინისტრი ღარიბაშვილი და მისი არაფორმალური მმართველი, ბიძინა ივანიშვილი, სანქციების რეჟიმის გვერდის ავლაში დახმარების აღმოჩენაში დამნაშავედ ჩაითვალოს. შედეგი ჩვენი ქვეყნისთვის, რომელიც მსგავსი ფაქტების დადასტურების შემთხვევაში, შესაძლოა, თავადაც აღმოჩნდეს სანქცირების საფრთხის ქვეშ, უმძიმესია.” – ამბობენ პარტიაში.
ჩანაწერებს გამოეხმაურა “ევროპული საქართველოს” ლიდერი გიგა ბოკერიაც. მისი თქმით, რეჟიმის საქციელი ჩვენი ქვეყნისთვის ამ კრიტიკულ პერიოდში ადასტურებს, რომ ივანიშვილის რეჟიმი არის რბილი სატელიტი პუტინის ბოროტების იმპერიის:
“ყველა ოლიგარქს პუტინის გარემოცვიდან აქვს ერთი მთავარი პრობლემა – თავისუფალი სამყარო სრესს პუტინის ბოროტების იმპერიას სანქციებით. ისინი ცდილობენ, რომ თავი აარიდონ ამ სანქციებს, ამ დროს კი, მათთან ერთად გაზრდილი ოლიგარქი, რომელსაც ხელში ჩაუვარდა მთელი ქვეყანა, შეეცდება, დაეხმაროს ოლიგარქებს სანქციებისგან თავის არიდებაში. ივანიშვილის რეჟიმის ქმედებები, მისი წარსული და საჯარო განცხადებები ყველანაირი ჩანაწერების გარეშე ადასტურებს ამ ეჭვის საფუძვლიანობას.“
წინაისტორია
საქართველოსა და უკრაინას შორის ურთიერთობა ჯერ კიდევ ომის დაწყებიდან მეორე დღეს დაიძაბა, როდესაც საქართველოს პრემიერმა განაცხადა, რომ ქვეყანა რუსეთის წინააღმდეგ სანქციებს არ უერთდება. ღარიბაშვილმა ასევე განაცხადა, რომ უკრაინამ ომი ვერ აიცილა და ამის გამო ყველაზე მეტად უკრაინელი ხალხი, სახელმწიფო დაზარალდება.
იმავე დღეს, რუსეთის ფედერაციის საბჭოს საერთაშორისო საქმეთა კომიტეტის თავმჯდომარემ, გრიგორი კარასინმა შეაქო საქართველოს ხელისუფლება უკრაინის საკითხზე პოზიციის გამო. საქართველოს რეაქციას დასავლეთის ანტირუსულ სანქციებზე კარასინმა “გაწონასწორებული” უწოდა და ხაზგასმით აღნიშნა, რომ რუსეთში „ეს ფაქტი შეუმჩნეველი არ დარჩება“.
ამის შემდეგ პრეზიდენტმა ზელენსკიმ საქართველოდან უკრაინის ელჩი ჯერ დროებით, შემდეგ კი საბოლოოდ გაიწვია.
ბოლო სკანდალი საქართველოსა და უკრაინას შორის უკრაინული დაზვერვის განცხადებას უკავშირდება, რომლის მიხედვით, რუსეთი კონტრაბანდის მარშრუტს საქართველოს ტერიტორიის გავლით აყალიბებს. მათი განმარტებით, საქართველოს პოლიტიკური ხელმძღვანელობა რუსეთთან შეთანხმებულია საკუთარი ტერიტორიის გავლით სანქცირებული პროდუქტების კონტრაბანდის სახით შეტანაზე.
საქართველოს სახელმწიფო უსაფრთხოების სამსახური უკრაინის დაზვერვის მიერ გავრცელებულ ინფორმაციას გამოეხმაურა და მოუწოდა უკრაინულ მხარეს, დაუყოვნებლივ მიაწოდონ ინფორმაციის დამადასტურებელი მტკიცებულებები მათზე სამართლებრივი რეაგირების მიზნით.
რამდენიმე დღის წინ, ირაკლი კობახიძემ უკრაინის ხელისუფლებას სამი პირობა წაუყენა, რომელთა დაკმაყოფილების შემთხვევაშიც, შესაძლოა საპარლამენტო დელეგაცია უკრაინაში ჩასულიყო. პირობებს შორის იყო ბოდიში კონტრაბანდაზე, ელჩის გაწვევა და ყოფილი ქართველი მაღალჩინოსნების თანამდებობებიდან გათავისუფლება.
საბოლოოდ სიტუაცია უკრაინის რადას სპიკერის და შალვა პაპუაშვილის ონლაინშეხვედრამ განმუხტა, სადაც გადაწყდა, რომ საქართველოდან უკრაინაში საპარლამენტო დელეგაცია გაემგზავრებოდა.
