HALO Trust-ი მთიან ყარაბაღში თურქეთის სასარგებლოდ ჯაშუშობაში დაადანაშაულეს

სომხეთში აქტიურად განიხილავენ ბრიტანული საქველმოქმედო ორგანიზაცია Halo Trust-ის ჯაშუშობას, რომელიც უკვე მრავალი წელია მთიან ყარაბაღში განაღმვითი სამუშაოებით არის დაკავებული.

მთიანი ყარაბაღის დე ფაქტო პრეზიდენტის წარმომადგენელმა განსაკუთრებულ დავალებათა საკითხებში, ბორის ავაგიანმა ის თურქული სპეცსამსახურებისთვის დანაღმული ველების რუკის გადაცემაში დაადანაშაულა.

თანაც, მისი აზრით, ეს 2020 წლის შემოდგომაზე, ყარაბაღის მეორე ომის დროს, აზერბაიჯანს წარმატებული სამხედრო ოპერაციების ჩატარებაში დაეხმარა.

Halo Trust-ში განაცხადეს, რომ ეს „სრული სიცრუეა“, მაგრამ სკანდალი გრძელდება.

ამის შემდეგ, სომხეთის პარლამენტის დეპუტატმა ოპოზიციური ფრაქცია „აყვავებული სომხეთიდან“, ნაირა ზოგრაბიანმა Facebook-ის საკუთარ გვერდზე დაწერა, რომ სომხეთისა და მთიანი ყარაბაღის ხელისუფლებებმა დანაღმული ველების რუკის გადაცემის შესახებ იცოდნენ.

და ეს ერთი კვირის განმავლობაში მეორე ისტორიაა, რომლის დროსაც, საერთაშორისო ორგანიზაციების წარმომადგენლებს სომხეთის ინტერესების საწინააღმდეგოდ ჯაშუშობაში ადანაშაულებენ.

• აზერბაიჯანული ნაღმები საქართველოში
• აგვისტოს ომის ფეთქებადი ნარჩენები
• სომხეთში UNICEF-ის ბიუროს ხელმძღვანელი ჯაშუშია? ახალი სკანდალი ქვეყანაში

განცხადება მთიანი ყარაბაღიდან

სომხურმა გამოცემა 24news.am-მა მთიანი ყარაბაღის ლიდერის წარმომადგენლის ბორის ავაგიანის განცხადება გამოაქვეყნა:

„ბრიტანულმა ორგანიზაცია Halo Trust-მა, რომელიც ყარაბაღში საქველმოქმედო საქმიანობით არის დაკავებული, თურქულ სპეცსამსახურებს ყარაბაღის დანაღმული ველების რუკა გადასცა, რომელმაც მათ 44-დღიანი ომის განმავლობაში, საშუალება მისცა, წარმატებით გადაელახათ მთიანი ყარაბაღის რესპუბლიკის თავდაცვის არმიის თავდაცვითი დანაღმული ველები“.

მისი თქმით, სახიფათო მონაკვეთების შესწავლის საბაბით, ეს ორგანიზაცია დაზვერვით სამუშაოებს აწარმოებდა მთიანი ყარაბაღის მთელ ტერიტორიაზე.

ორგანიზაცია ოფიციალური საპასუხო განცხადებით გამოვიდა, რომელშიც ნათქვამია, რომ 20 წელზე მეტია, Halo Trust-ი ყარაბაღში, ადგილობრივი მოსახლეობის უსაფრთხოების საკეთილდღეოდ მუშაობს:

„Halo Trust-ი შეიძლება მუშაობდეს მთელ მსოფლიოში, კონფლიქტის ზონებში იმ მიზეზით, რომ ეს აპოლიტიკური, ნეიტრალური ორგანიზაციაა. ეს მტკიცება სრული სიცრუეა“.

განცხადებები სომხეთიდან

„არ მჯერა, რომ სომხეთის ხელისუფლება და არცახის დარჩენილი ნაწილის პრეზიდენტი ამის შესახებ ინფორმირებულები არ იყვნენ. დანაღმული ველების რუკების გადაცემის დაშვებით, თქვენ საშუალება მიეცით, რომ მტერს შეუფერხებლად გაევლო გაუვალი ადგილები“, – დაწერა ოპოზიციონერმა დეპუტატმა, ნაირა ზოგრაბიანმა Facebookიზე. 

მისი თქმით, ხავერდოვანი რევოლუციის შემდეგ, „სომხეთსა და არცახში გააქტიურდნენ დასავლური ჯაშუშური ქსელები“, „ადგილობრივმა ჯაშუშებმა უცხოელებთან ერთად, დაასუსტეს ორი სომხური რესპუბლიკის იმუნიტეტი“.

ზოგრაბიანმა სომხეთის ეროვნული უსაფრთხოების სამსახური იმაში დაადანაშაულა, რომ მტრისთვის წინააღმდეგობის გაწევის ნაცვლად, ის დაკავებულია ფეიკ-ანგარიშების ძიებითა და გამოაშკარავებით, ასევე, მისი ტელეფონის მოსმენით. 

„სპეციალურად ეროვნული უსაფრთხოების სამსახურისთვის, სატელეფონო საუბრებისას ვილაპარაკებ Dior-ის თავის მოვლის საშუალებებზე. შეარჩიეთ ისეთი ოპერატორი, რომლისთვისაც საინტერესო იქნება ეს თემა“, – დაწერა ზოგრაბიანმა.

ერთი კვირის განმავლობაში მეორე ისტორია ჯაშუშობის შესახებ

აქამდე, რამდენიმე დღით ადრე, ქვეყანაში, კიდევ ერთი „ჯაშუშური“ სკანდალი მოხდა. მაშინ, მედიის პუბლიკაციებისა და სოციალური ქსელების მთავარი თემა, გაეროს ბავშვთა ფონდის სომხეთის ბიუროს ხელმძღვანელი, მერიენ კლარკ-ჰატინგი გახდა.

სომხეთში UNICEF-ის წარმომადგენელს უფლებამოსილება უკვე შეუჩერდა, სომხეთის ხელისუფლებამ ის პერსონა ნონ გრატად გამოაცხადა. მან საჩქაროდ დატოვა ქვეყანა.

საგარეო საქმეთა სამინისტროში, სომხური მხარის გადაწყვეტილება მერიენ კლარკ-ჰატინგის მანდატისა და მუშაობის მეთოდების რეალიზაციასთან დაკავშირებული პრობლემებით განმარტეს, რომელიც ხელს არ უწყობდა თანამშრომლობას.

თუმცა, მანამდე, სომხური ტელეგრამ-არხები, საკუთარ წყაროებზე დაყრდნობით, წერდნენ იმის შესახებ, რომ სომხეთის ხელისუფლებას გაეროს თანამშრომლის აზერბაიჯანისა და დიდი ბრიტანეთის სასარგებლოდ ჯაშუშობაზე ჰქონდა ეჭვი.