გორში, ბრიტანეთის მოქალაქის მკვლელობის ფაქტზე, შსს-მ 5 პირი დააკავა

7 ოქტომბერს, გორში მოკლული უცხოელი ბრიტანეთის მოქალაქე, 28 წლის ტომას კენედი აღმოჩნდა. შსს-ს მიერ გავრცელებული ინფორმაციით, კენედიმ საქართველოს საზღვარი 30 აგვისტოს გადმოკვეთა. ცნობილია ისიც, რომ ის ერთ-ერთი მუსიკალური კოლეჯის სტუდენტი იყო.

შინაგან საქმეთა სამინისტროს ინფორმაციით, დააკავეს 5 საქართველოს მოქალაქე, რომლებმაც გორში, უცხო ქვეყნის მოქალაქეს სცემეს და მტკვარში გადააგდეს.

გამოძიება სისხლის სამართლის კოდექსის 109-ე მუხლის მე-2 ნაწილის “ე” ქვეპუნქტით მიმდინარეობს, რაც დამამძიმებელ გარემოებაში ჯგუფურად ჩადენილ განზრახ მკვლელობას გულისხმობს და 13-დან 17 წლამდე პატიმრობას ითვალისწინებს.

საქმეზე დაკავებულ მე-5 პირს, რომელმაც მომხდარის შესახებ იცოდა და პოლიციას არ შეატყობინა, 3-დან 7 წლამდე ვადით პატიმრობა ემუქრება.

ადვოკატების თქმით, ბრალდებულები ამ დროისთვის დუმილის უფლებით სარგებლობენ. მათ ბრალდებას სავარაუდოდ, დღეს წარუდგნენ.

გამოძიებამ დაადგინა სხვა დეტალებიც. კერძოდ ის, რომ მიმდინარე წლის 7 ოქტომბერს, ბრალდებულები ქალაქ გორში მდებარე ერთ-ერთ მიწისქვეშა გადასასვლელში ალკოჰოლურ სასმელს სვამდნენ, მათ უცხო ქვეყნის მოქალაქე – 1993 წელს დაბადებულ ტომას კენედიც შეუერთდა. ბრალდებულებმა მოგვიანებით, მასთან ერთად გორში მდებარე ერთ-ერთ ბარში გადაინაცვლეს და ალკოჰოლის მიღება განაგრძეს, რა დროსაც ამჟამად ბრალდებულის სახით დაკავებულებსა და ტომას კენედის შორის სიტყვიერი შელაპარაკება მოხდა. დაპირისპირების შემდგომ, კონფლიქტში მონაწილეები გორში, მტკვრის მიმდებარე ტერიტორიაზე მივიდნენ, სადაც კენედის ფიზიკური შეურაცხყოფა მიაყენეს და უგონო მდგომარეობაში მყოფი, დანაშაულის დაფარვის მიზნით მტკვარში გადააგდეს. ჩადენილი დანაშაულის შემდგომ ბრალდებულები შემთხვევის ადგილიდან მიიმალნენ.

გარდაცვლილის ცხედარი 8 ოქტომბერს, გორის მუნიციპალიტეტის სოფელ ქვახვრელთან მტკვარმა გამორიყა.

“მთავარი არხის” ინფორმაციით, პოლიციამ გორის ერთ-ერთი ლომბარდიდან ამოიღო ბრიტანეთის მოქალაქის კუთვნილი მობილური ტელეფონი. სავარაუდოდ, მკვლელობის შემდეგ, ბრალდებულებმა ის დაალომბარდეს.

კენედის მკვლელობის საქმეზე, დანაშაულის შეუტყობინებლობისთვის დაკავებული 23 წლის ვასილ ოქროპირიძის ძმები ამბობენ, რომ ბრალდებულს მომხდარის შესახებ ინფორმაცია არ ჰქონდა. 

მათი განმარტებით, ოქროპირიძე ქუჩის მუსიკოსია და ერთ-ერთ მიწისქვეშა გადასასვლელში უკრავდა, სადაც ბრიტანეთის მოქალაქე, სავარაუდოდ, სწორედ მის მოსასმენად გაჩერდა. ამ დროს კი მან 4 პირი გაიცნო, რომლებთან ერთადაც ერთ-ერთ ბარში წავიდა.

● ავსტრალიელი ტურისტი ქალის მკვლელობამ უცხოელები შეაშინა. რამდენად უსაფრთხოა საქართველო მათთვის?
● თბილისში გაუჩინარებული ავსტრალიელი ქალი, სავარაუდოდ, მოკლული იპოვეს
● ავსტრალიელი ტურისტის მკვლელობაში ბრალდებული მმართველი პარტიის აქტივისტია

ეს პირველი შემთხვევა არ არის, როცა საქართველოში უცხოეთის მოქალაქეებს სასიკვდილოდ იმეტებენ ან თავს ესხმიან. ქვეყანაში სულ უფრო ხშირად საუბრობენ იმაზე, რომ საქართველო უცხოელებისთვის უსაფრთხო აღარ არის.

● 31 ივლისს, ავსტრალიის მოქალაქე შანაი ბრუკი მთაწმინდაზე მოკლული იპოვეს, მისი მკვლელი კი მმართველი პარტიის აქტივისტი აღმოჩნდა.

● 5 ივლისს გულ-მკერდის არეში ჭრილობა მიაყენეს პოლონეთის მოქალაქეს, 49 წლის იაცეკ კოლანკიევიჩს. ტელეკომპანია ფორმულას ინფორმაციით, თავდასხმის მიზეზი ჰომოფობიური მოტივი იყო, რადგან კოლაკიევიჩი საყურეს ატარებდა.

● 30 ივლისს ბათუმში თავს დაესხნენ ბერლინელ დიჯეის Phase Phatale-ს. არტისტმა ინსტაგრამზე დაწერა, რომ თავდასხმას ასევე ჰომოფობიური მოტივი ჰქონდა.

● დაახლოებით ხუთი თვის წინ რუსთავში ორმა მამაკაცმა გააუპატიურა 25 წლამდე უცხო ქვეყნის მოქალაქე გოგონა, რომელიც საავადმყოფოში შოკურ მდგომარეობაში გადაიყვანეს.

● 5 მაისს, კედიას ქუჩაზე 26 წლის ყაზახი ქალი, ასსელ აიტპაევა საცხოვრებელი სახლის ფანჯრების ქვეშ გარდაცვლილი იპოვეს. ოფიციალური ვერსია თვითმკვლელობაა.

● 14 ივლისს, ალიევის მთავრობის მიმართ ოპოზიციურად განწყობილი აზერბაიჯანელი ბლოგერი, სასტუმრო რუმსის სახურავიდან ჩამოვარდა. გამოძიების ვერსიით, ეს თვითმკვლელობა იყო.