ექსპერტიზის დასკვნა - შაქარაშვილის სიკვდილის მიზეზია ასფიქსია, წყალში დახრჩობით
სასამართლო-სამედიცინო ექსპერტიზის დასკვნით, 19 წლის გიორგი შაქარაშვილის სიკვდილის მიზეზია ასფიქსია, წყალში დახრჩობით. დასკვნაში, რომელსაც საქართველოს პროკურატურა აქვეყნებს, აღნიშნულია, რომ ცხედარს აღენიშნება მკვრივი-ბლაგვი საგნით მიყენებული სიცოცხლისდროინდელი დაზიანებები.
“ექსპერტიზის დასკვნის თანახმად, გიორგი შაქარაშვილის სიკვდილის მიზეზია ასფიქსია წყალში დახრჩობით. ამავდროულად, გიორგი შაქარაშვილის ცხედარზე აღინიშნება სიკვდილის წინა ახლო პერიოდში მკვრივი-ბლაგვი საგნის მოქმედებით მიყენებული, სიცოცხლისდროინდელი დაზიანებები შუბლის/თავის, ორივე თვალბუდის, ზედა და ქვედა ტუჩის მიდამოებში, მარჯვენა იდაყვის სახსრისა და მარჯვენა წინამხრის მიდამოებში, აგრეთვე მუცლის, საზარდულის, ბოქვენის, წელისა და ორივე დუნდულოს მიდამოებში,” – წერია დასკვნაში.
როგორც პროკურატურაში აცხადებენ, სასამართლო-სამედიცინო ექსპერტიზის დასკვნისა და საქმეში არსებული სხვა მტკიცებულებების საფუძველზე, დაზუსტდა გიორგი შაქარაშვილის გარდაცვალების საქმის კვალიფიკაცია და ამის შემდეგ გამოძიება სისხლის სამართლის კოდექსის 109-ე მუხლის მე-2 ნაწილის „ე“ ქვეპუნქტით წარიმართება, რაც დამამძიმებელ გარემოებებში ჯგუფურად განხორციელებულ განზრახ მკვლელობას გულისხმობს.
მაღალი საზოგადოებრივი ინტერესიდან გამომდინარე, საქართველოს პროკურატურამ გაასაჯაროვა სასამართლო-სამედიცინო ექსპერტიზის დასკვნა (ფოტოვიზუალური ნაწილის გარეშე).
19 ივნისს, ახლობელი გოგონას დაბადების დღეზე წასული გიორგი შაქარაშვილის ცხედარი მაშველებმა 23 ივნისს, ოთხდღიანი ძებნის შემდეგ მდინარე არაგვში იპოვეს. ტრაგედიას წინ უძღოდა ჩხუბი და ფიზიკური დაპირისპირება ახალგაზრდების ორ ჯგუფს შორის.
გიორგი მოკლეს თუ ის უბედური შემთხვევის მსხვერპლი გახდა? – შაქარაშვილის გარდაცვალებიდან სამი კვირის თავზე გამოძიებას ამ კითხვაზე ზუსტი პასუხი არ აქვს.
