განათლების მინისტრის პოსტზე ჩხენკელი ამილახვარმა შეცვალა

განათლების მინისტრის პოსტზე ჩხენკელი ამილახვარმა შეცვალა

პრემიერმინისტრმა ირაკლი ღარიბაშვილმა განათლების მინისტრის პოსტზე გიორგი ამილახვარი წარადგინა. “ქართული ოცნების” დეპუტატი აქამდე პარლამენტის განათლებისა და მეცნიერების კომიტეტის თავმჯდომარის პოსტს იკავებდა.

ამილახვარი განათლების მინისტრის პოსტზე მიხეილ ჩხენკელს ჩაანაცვლებს, რომელიც ამ პოსტს ორი სხვადასხვა ვადით იკავებდა. პირველად ის ამ თანამდებობას 2017-2018 წლებში იკავებდა. მეორედ 2019 წელს დაინიშნა განათლების, მეცნიერების, კულტურისა და სპორტის მინისტრად. 2021 წლიდან კი, მას შემდეგ, რაც განათლების და კულტურის სამინისტროები გაიყო, ჩხენკელს განათლების და მეცნიერების სამინისტრო ჩააბარეს.

მთავრობის ადმინისტრაციის ცნობით, მიხეილ ჩხენკელი აკადემიურ საქმიანობას უბრუნდება და მუშაობას გააგრძელებს ქუთაისის საერთაშორისო უნივერსიტეტის საერთაშორისო მრჩეველთა საბჭოს თავმჯდომარედ. 

განათლებისა და მეცნიერების ახლადდანიშნული მინისტრის თქმით, ამ სფეროში არსებული გამოწვევებისა და პრობლემების მოსაგვარებლად, ის დღეიდანვე აქტიურ კომუნიკაციას დაიწყებს განათლებისა და მეცნიერების დარგში ჩართულ ყველა ადამიანთან. ამილახვარი ამბობს, რომ სწორედ მათთან ერთად მიიღებს ის სწრაფ და მყისიერ გადაწყვეტილებებს

ამილახვარმა სამომავლო გეგმებთან დაკავშირებითაც ისაუბრა და განაცხადა, რომ მისი მინისტრობის პერიოდში, პროფესიული განათლება პრიორიტეტულ მიმართულებად გამოცხადდება.

“ჩემი მინისტრობის პერიოდში, პროფესიული განათლება პრიორიტეტულ მიმართულებად გამოცხადდება და უახლოეს პერიოდში იმ კონკრეტულ ხედვას შემოგთავაზებთ, თუ როგორ ვაპირებთ ამ დარგის გარდაქმნას და რა კონკრეტულ და იოლი ფორმების მექანიზმებს შევთავაზებთ დამსაქმებლებს პროფესიულ განათლებაში ჩართულობისთვის. გასულ წლებში მიღწეულმა შედეგებმა უკვე მოგვცა შესაძლებლობა, რომ ჩვენ აქტიურად ვიმუშაოთ იმისთვის, რომ საქართველო რეგიონში განათლების მიზიდულობის კერად ჩამოვაყალიბოთ. ჩვენს ქვეყანაში მეტი უცხოელი სტუდენტი და პროფესორი მოვიზიდოთ, რაც პირდაპირ უდრის ჩვენი განათლების ხარისხის ზრდას და ამ სფეროში პირდაპირ ინვესტიციას. უახლოეს მომავალში საზოგადოებას გავაცნობთ იმ კონკრეტულ, დროში გაწერილ გეგმას, რომელიც ამ და სხვა საკითხებს შეეხება.” – აღნიშნა ამილახვარმა.

● გენერალ ჩაჩიბაიას, რომელმაც “აგენტების კანონს” მხარი არ დაუჭირა, მანდატის დატოვება უნდა
● პენ ცენტრი იუნესკოს მიმართავს, ელისო ბოლქვაძეს მშვიდობის ელჩის სტატუსი მოუხსნას
● საპროტესტო ბანერები – აგენტების წინააღმდეგ მიმდინარე დემონსტრაციებიდან

ოპოზიციის თქმით, ჩხენკელის ამილახვრით შეცვლა 7-9 მარტის აქციებმა გამოიწვია, რომელზეც ათასობით სტუდენტი გამოვიდა. როგორც ოპოზიციაში განმარტავენ, ახალი მინისტრის მიზანი სტუდენტების აუდიტორიებში დაბრუნება და რეპრესიების მასშტაბების გაზრდა იქნება.

რეპრესიებზე ლაპარაკობენ სტუდენტებიც. “მაისის სტუდენტური მოძრაობის” ინფორმაციით, პოლიცია ბაგების სტუდენტურ საცხოვრებელში შევიდა და სტუდენტების პირად მონაცემებს აგროვებდა. თუმცა თსუ-ის სტუდენტური სერვისების და კარიერული განვითარების ცენტრის ხელმძღვანელი გიორგი გრიგოლაშვილი ამბობს, რომ ეს საცხოვრებელში გეგმური შესვლა იყო, რასაც მართლწესრიგის ოფიცრები ყოველ წელს აკეთებენ.

17 თებერვალს ოცნების სატელიტმა “ხალხის ძალამ” პარლამენტში განსახილველად ორი კანონპროექტი დაარეგისტრირა – „უცხოური გავლენის გამჭვირვალობის შესახებ“ კანონპროექტი და მეორე – „უცხოელი აგენტების რეგისტრაციის შესახებ“. როგორც ამას პროცედურები ითვალისწინებს, ორივე კანონპროექტი ვენეციის კომისიაშია გადაგზავნილი.

ამ ორიდან ერთი – „უცხოური გავლენის გამჭვირვალობის შესახებ“ კანონპროექტი 7 მარტს პარლამენტმა 76 ხმით 13-ის წინააღმდეგ პირველი მოსმენით მიიღო. კანონის ინიციირებას თბილისში, რუსთაველის გამზირზე საპროტესტო აქციები მოჰყვა. კანონპროექტის მიღების შემდეგ კი პროტესტი მრავალათასიან მიტინგებში გადაიზარდა, რომელიც ხელისუფლებამ ძალის გამოყენებით დაშალა. მომიტინგეებს დაუშინეს წყლის ჭავლი და ცრემლსადენი გაზი.

ამ კანონპროექტს როგორც საქართველოში, ისე მის ფარგლებს გარეთ ყველა, მთავრობის გარდა, რუსულ კანონს უწოდებს და ამბობს, რომ მისი მიღება ქვეყნისთვის დიდი ბარიერია ევროკავშირისკენ მიმავალ გზაზე.

საბოლოოდ, უმრავლესობამ უკან დაიხია და „რუსული კანონი“ მეორე მოსმენით ჩააგდო. „ხალხის ძალის“ მიერ ინიციირებული კანონპროექტი კენჭისყრაზე განხილვის გარეშე დააყენეს. მის წინააღმდეგ ხმა 35 დეპუტატმა მისცა, მხარი 1-მა დაუჭირა. რუსული კანონპროექტის ერთ-ერთი ავტორი დიმიტრი ხუნდაძე ამბობს, რომ ამ კანონის არმიღებით საზოგადოებამ “ხელიდან შანსი გაუშვა”.

“ქართულმა ოცნებამ” “უცხოური გავლენის გამჭვირვალობის შესახებ” რუსული კანონპროექტის გაწვევის შესახებ 9 მარტს, დილას განაცხადა.