უკრაინის ელჩს გამოვიწვევთ - გახარია სააკაშვილის უკრაინის ვიცე-პრემიერად შესაძლო დანიშვნაზე
საქართველოს პრემიერ-მინისტრი გიორგი გახარია ამბობს, რომ საქართველოს ექნება “შესაბამისი რეაქცია” იმ შემთხვევაში, თუ მიხეილ სააკაშვილს უკრაინის ვიცე-პრემიერად დანიშნავენ.
“ჩვენ ჯერ ელჩი არ გამოგვიწვევია, მაგრამ თუ ასეთი გადაწყვეტილება იქნება მიღებული, რა თქმა უნდა, ჩვენ ელჩს როგორც მინიმუმ, კონსულტაციებისთვის გამოვიწვევთ,” – განაცხადა გახარიამ.
საქართველოს ექს-პრეზიდენტმა, ოდესის ყოფილმა გუბერნატორმა მიხეილ სააკაშვილმა, რომელიც ამჟამად უკრაინაში ცხოვრობს და პოლიტიკურ პარტიას ხელმძღვანელობს, უკრაინის პრეზიდენტისგან, ვოლოდიმერ ზელენსკისგან მიიღო წინადადება გახდეს უკრაინის ვიცე-პრემიერი რეფორმების მიმართულებით.
“უკრაინელი ხალხი არის ჩვენთვის მოძმე ხალხი. უკრაინის სახელმწიფო არის ჩვენი სტრატეგიული პარტნიორი და ამას გრძელვადიან პერსპექტივაში ვერ შეცვლის ვერაფერი, ვერანაირი ვიწროპოლიტიკური კონიუქტურა, თუმცა, სტრატეგიული პარტნიორის მიერ საქართველოში მძიმე დანაშაულებისთვის უკვე გასამართლებული, მისჯილი და ძებნილი ადამიანის ვიცე-პრემიერად დანიშვნა ჩვენთვის კატეგორიულად მიუღებელია,” – აღნიშნა გახარიამ.
მან ასევე გაიხსენა, თუ რა ფორმით მოხდა მიხეილ სააკაშვილის უკრაინიდან გაძევება პეტრო პოროშენკოს პრეზიდენტობის დროს:
“ჩემთვის პირადად ასევე მიუღებელია ჩემი ქვეყნის პრეზიდენტის უკრაინის რომელიღაც რესტორანში თმების თრევა და პოლიციის ძალით იქიდან გამოყვანა,” – თქვა მან.
- მოსაზრება: სააკაშვილის „მესამედ მოსვლა“ უკრაინაში
- ოთხი განსხვავება „ქართულ“ სააკაშვილსა და „უკრაინულს“ შორის
- სააკაშვილი უკრაინაში – დასაწყისი და დასასრული
სააკაშვილის დანიშვნასთან დაკავშირებით კომენტარი გააკეთა საქართველოს პარლამენტის თავმჯდომარემ არჩილ თალაკვაძემაც.
მან თქვა, რომ სააკაშვილის დანიშვნა უკრაინაში მაღალ თანამდებობაზე “დააზიანებს საქართველოსა და უკრაინას შორის პოლიტიკურ თანამშრომლობას”.
“მიუხედავად იმისა, რომ საქართველოსა და უკრაინას შორის არის სტრატეგიული თანამშრომლობა და ძალიან მეგობრული ურთიერთობებია, ასეთი გადაწყვეტილება ჩვენთვის ნამდვილად გაუგებარი და მიუღებელი იქნება“, – განაცხადა თალაკვაძემ.
_____________________
● საქართველოს ყოფილ პრეზიდენტს უკრაინის მოქალაქეობა უკრაინის ყოფილმა პრეზიდენტმა პეტრო პოროშენკომ 2015 წელს მიანიჭა, როდესაც სააკაშვილი ოდესის ოლქის გუბერნატორად დაინიშნა.
● 2016 წლის ბოლოს სააკაშვილი ამ თანამდებობიდან გადადგა და პრეზიდენტი პოროშენკო კორუფციასა და რეფორმების გატარების სურვილის არქონაში დაადანაშაულა. სააკაშვილმა ოპოზიციაში გადასვლისა და საკუთარი პარტიის შექმნის სურვილის შესახებ განაცხადა.
● 2017 წლის ივლისში, როდესაც სააკაშვილი უკრაინის ფარგლებს გარეთ იმყოფებოდა, პრეზიდენტმა პოროშენკომ მას უკრაინის მოქალაქეობა ჩამოართვა.
● 2017 წლის სექტემბერში, პასპორტის გარეშე დარჩენილმა სააკაშვილმა ძალით, მხარდამჭერთა დახმარებით გადაკვეთა პოლონეთ-უკრაინის საზღვარი.
● 2017 წლის ოქტომბერში მიხეილ სააკაშვილმა თანამოაზრეებთან ერთად კიევის ცენტრში პეტრო პოროშენკოს გადადგომის მოთხოვნით საპროტესტო აქციები დაიწყო.
● 2017 წლის დეკემბერში უკრაინის პროკურატურამ სააკაშვილი „სახელმწიფოს ინტერესების საზიანოდ დანაშაულებრივი ორგანიზაციის მხარდაჭერაში“ დაადანაშაულა.უკრაინის პროკურატურა ამტკიცებდა, რომ სააკაშვილი საპროტესტო აქციების ორგანიზებისთვის ფულს რუსეთიდან, უკრაინის ყოფილი პრეზიდენტ იანუკოვიჩთან დაახლოებული პირებისგან იღებდა.
● დაკავების რამდენიმე უშედეგო მცდელობის შემდეგ სააკაშვილი ბოლოსდაბოლოს მაინც დააპატიმრეს 2017 წლის დეკემბერში, თუმცა მეორე დღეს უკრაინის სასამართლომ ის გაათავისუფლა.
● 2018 წლის თებერვალში მიხეილ სააკაშვილი კიევის ერთ-ერთ რესტორანში სადილობის დროს დააკავეს და უკრაინიდან პოლონეთში გაადეპორტირეს.
● უკრაინის მოქალაქეობის დაბრუნებამდე მას არცერთი სახელმწიფოს მოქალაქეობა არ ჰქონდა, რადგან უკრაინის მოქალაქეობის მიღების შემდეგ საქართველოს მაშინდელმა პრეზიდენტმა გიორგი მარგველაშვილმა მას საქართველოს მოქალაქეობა ჩამოართვა.
● საქართველოს ყოფილი პრეზიდენტი, უკრაინული პოლიტიკური პარტიის “ახალი ძალების მოძრაობის” ლიდერი მიხეილ სააკაშვილი უკრაინაში 2019 წლის მაისში დაბრუნდა, მას შემდეგ, რაც ახლადარჩეულმა პრეზიდენტმა ვოლოდიმერ ზელენსკიმ მას უკრაინის ჩამორთმეული მოქალაქეობა დაუბრუნა.
● სააკაშვილი უკვე მეშვიდე წელია საქართველოში ვერ ჩამოდის. მის წინააღმდეგ სისხლის სამართლის საქმე ოთხ ეპიზოდზეა აღძრული – სამსახურეობრივი მოვალეობის ბოროტად გამოყენება; მშვიდობიანი მიტინგის დარბევა და ტელევიზიაში შეჭრა; დეპუტატის ცემა და საბიუჯეტო თანხების გაფლანგვა.
