"ევროპული საქართველოს" უკრაინის მხარდამჭერ აქციას, რუსეთმა საპროტესტო ნოტით უპასუხა

ევროპული საქართველოს აქცია

პარტია “ევროპული საქართველოს” უკრაინის მხარდამჭერ აქციას, რომელიც 26 იანვარს, რუსეთის ყოფილ საელჩოსთან გაიმართა, რუსეთმა საპროტესტო დიპლომატიური ნოტით უპასუხა.  

26 იანვარს “ევროპული საქართველომ” რუსეთის ყოფილ საელჩოსთან უკრაინის მხარდამჭერი აქცია გამართა. შენობის კედლებზე სპეციალურად მომზადებული კლიპი გავიდა, მასზე ფრიალებდა უკრაინის დროშაც.

რუსეთის საგარეო საქმეთა სამინისტროს ინფორმაციული დეპარტამენტის აღმასრულებელი დირექტორმა განაცხადა, რომ იმედოვნებენ, ქართული მხარე მსგავსი ინციდენტების გამეორებას აღარ დაუშვებს.

“მომხდართან დაკავშირებით შეშფოთებული ვარ. 26 იანვარს ქართული ოპოზიციის მიერ ჩატარდა ანტირუსული პოლიტიკური აქცია, საქართველოში შვეიცარიის კონფედერაციის საელჩოს რუსეთის ფედერაციის ინტერესთა სექციის შენობასთან ახლოს. დაწყებამდე ცოტა ხნით ადრე, სექციაში გაითიშა მთავარი და სარეზერვო ელექტროკვების წყაროები.

მომხდართან დაკავშირებით, ინტერესთა სექციამ საქართველოს საგარეო საქმეთა სამინისტროში გაგზავნა ნოტა საქართველოს ხელისუფლების მხრიდან 1961 წლის 18 აპრილის დიპლომატიური ურთიერთობების შესახებ ვენის კონვენციის ზედმიწევნით შესრულების აუცილებლობაზე. რუსეთის საგარეო საქმეთა სამინისტროს მიერ ანალოგიური გზავნილი გადაეცა მოსკოვში შვეიცარიის კონფედერაციის საელჩოს საქართველოს ინტერესების განყოფილების ხელმძღვანელს. 

ამჟამად, სექციის ელექტრომომარაგება სრულად აღდგენილია.

ვიმედოვნებთ, რომ საქართველოს ხელისუფლება მიიღებს ყველა შესაძლო ზომას მსგავსი ინციდენტების თავიდან ასაცილებლად”, – განაცხადა ზაიცევმა.

● მოსკოვს „მოთმინება ამოეწურა“: როგორ მოიქცევა დასავლეთი უკრაინასთან და საქართველოსთან?
● პოლიტიკური კრიზისი და პრორუსული განწყობები. როგორ ხედავენ საქართველოს უკრაინელი ჟურნალისტები
● სერგეი ლავროვი: საქართველოს NATO-ში ძალით შეყვანას ცდილობენ

უკრაინის თავდაცვის სამინისტროს მთავარი სადაზვერვო სამმართველოს ხელმძღვანელმა კირილ ბუდანოვმა 2021 წლის 21 ნოემბერს განაცხადა, რომ რუსეთი 2022 წლის იანვარ-თებერვალში უკრაინის აღმოსავლეთსა და სამხრეთზე შესაძლო თავდასხმისთვის ემზადებოდა. დაზვერვის მონაცემებით, უკრაინის საზღვრებთან 92 ათასი რუსი სამხედროა განლაგებული.

რუსეთის პრეზიდენტის პრესმდივანმა დიმიტრი პესკოვმა უკრაინაზე თავდასხმის საფრთხის შესახებ ინფორმაციას ხელოვნურად შექმნილი ისტერია უწოდა. მისი ვარაუდით, სწორედ კიევს სურს საომარი მოქმედებების დაწყება ოკუპირებული ტერიტორიების გასათავისუფლებლად.

თუმცა, უკვე 18 დეკემბერს მოსკოვმა რიტორიკა შეცვალა. საგარეო საქმეთა მინისტრის მოადგილე ალექსანდრ გრუშკომ განაცხადა, რომ თუ დასავლეთი სერიოზულად არ მიიღებს მოსკოვის მიერ შეთავაზებულ „უსაფრთხოების გარანტიებს“, რომლებიც ითვალისწინებს უარს უკრაინის ნატო-ში შესვლაზე, მაშინ რუსეთი „სამხედრო-ტექნიკურ ალტერნატივას“ გამოიყენებს.

რუსულ-ამერიკული მოლაპარაკებები უსაფრთხოების საკითხებზე პირველად 10 იანვარს, ჟენევაში გაიმართა, თუმცა ექსპერტების საერთო მოსაზრებით, მნიშვნელოვანი გარღვევა არ მომხდარა.