ევროპა მკაცრ ზომებს უწესებს ყველას, ვინც COVID-19-ის საწინააღმდეგო ვაქცინას არ იკეთებს
კარანტინი ყველასთვის, ვინც არ იცრება
ავსტრიის ორ მილიონამდე მოქალაქე 15 ნოემბრის შემდეგ კარანტინშია მოთავსებული და მკაცრად შეზღუდული აქვს გადაადგილება, რადგან ისინი კორონავირუსის საწინააღმდეგო ვაქცინით არ აიცრნენ. მათ სახლიდან გასვლის უფლება აქვთ მხოლოდ სამსახურში წასასვლელად, შეზღუდული დასწრებით და ცოტა ხნის წინ აღებული ტესტის პასუხით, საჭმლის შესაძენად უახლოეს მაღაზიაში ან სამედიცინო დახმარებისთვის მისამართად.
არავაქცინირებულებს აუკრძალეს რესტორნებში, სილამაზის სალონებში, კინოთეატრებში, მსხვილ სავაჭრო ცენტრებსა და სხვა ადგილებში სტუმრობა, სადაც ბევრი ადამიანი შეიძლება იყოს თავმოყრილი.
ამ წესისგან გათავისუფლებულები იქნებიან 12 წლამდე ასაკის ბავშვები და ადამიანები, რომლებმაც ცოტა ხნის წინ გადაიტანეს დაავადება.
გასულ შაბათ-კვირას, ვენაში, კანცელარიის შენობის წინ ასობით ადამიანი აპროტესტებდა გადაწყვეტილებას ტრანსპარანტებით: „ჩვენი სხეული – ჩვენი არჩევანის თავისუფლება“.
მაგრამ კანცლერმა ალექსანდრ შალენბერგმა განაცხადა: „სამწუხაროდ, ეს გადაწყვეტილება მწვავე აუცილებლობა გახდა – ქვეყანაში ინფიცირებულთა რიცხვის ზრდაა. ჩვენ მკვეთრად უნდა შევამციროთ კონტაქტი ვაქცინირებულებსა და არავაქცინირებულებს შორის“.
პოლიცია შერჩევით შემოწმებებს ჩაატარებს საზოგადოებრივი თავშეყრის ადგილებში, რათა ადამიანების ვაქცინაციის სტატუსი დაადგინოს.
ავსტრიაში სრულად ვაქცინირებულია მოსახლეობის დაახლოებით 65 პროცენტი – ეს ერთ-ერთი ყველაზე დაბალი მაჩვენებელია დასავლეთ ევროპაში. ახალი ინფიცირებულების რიცხვი კი – ერთ-ერთი ყველაზე მაღალია მთელ ევროპაში.
საერთო ჯამში, ევროპა კვლავ პანდემიით ერთ-ერთ ყველაზე სერიოზულად დაზარალებულ რეგიონად იქცა, ამიტომაც რამდენიმე ქვეყანაში უწესებენ ანალოგიურ შეზღუდვებს ყველას, ვინც უარს ამბობს ვაქცინაციაზე.
- “შენ აიცერი თუ კაია”. კოვიდის აცრის მოწინააღმდეგეთა მთავარი არგუმენტები
- მოსაზრება: როგორ ეხმარება ეგოიზმი და უპასუხისმგებლობა ვირუსს აფხაზეთში
- ვაქცინაცია აზერბაიჯანში ფაქტობრივად სავალდებულო გახდა
- მოგზაურობის მიზანი – ვაქცინაცია: სომხეთს ირანიდან ტურისტების ნაკადი მიაწყდა
ვაქცინირებულთა პროცენტული მაჩვენებელი ევროპის სხვადასხვა ქვეყნის მოსახლეობაში
გერმანიაში, ჯანდაცვის მინისტრი იენს სპანი ანალოგიური შეზღუდვების მიღებას ამ კვირის ბოლოსკენ ელოდება. ვაქცინირებულთა მაჩვენებელი აქ 67.3 პროცენტია, ანუ უფრო მეტი, ვიდრე ავსტრიაში, მაგრამ ბევრით არა.
გერმანიამ ავსტრია მომატებული რისკის ზონაში განათავსა. ეს იმას ნიშნავს, რომ ნებისმიერი, რომელიც ამ ქვეყნიდან ჩამოვა, კარანტინში უნდა გადავიდეს.
ნიდერლანდებში ინფიცირებულთა რიცხვის მკვეთრი ზრდის საპასუხოდ სოციალური კონტაქტების შეზღუდვის უფრო მსუბუქი ზომები შემოიღეს. რესტორნები და მაღაზიები საღამოს რვა საათის შემდეგ უნდა დაიკეტოს, სპორტული ღონისძიებები კი მაყურებელთა დაუსწრებლად უნდა ჩატარდეს.
ამასთან, ქვეყანაში ვაქცინირებულია ზრდასრული მოსახლეობის, დაახლოებით, 84 პროცენტი.
აღმოსავლეთ ევროპის ქვეყნებში ვაქცინაციის დონე გაცილებით დაბალია.
ლატვიაში სრულად ვაქცინირებულია მოსახლეობის მხოლოდ 59 პროცენტი. ოქტომბრიდან მოყოლებული აქ მკაცრი შეზღუდვებია დაწესებული. მათ შორის, დეპუტატებს, რომლებიც უარს აცხადებენ ვაქცინაციაზე, აკრძალული აქვთ დებატებსა და კენჭისყრაში მონაწილეობის მიღება, როგორც მინიმუმ, 2022 წლის შუამდე. შესაბამისად, მათ შეეკვეცათ ხელფასი.
რუსეთში, Our World In Data-ს მონაცემებით, სრულად ვაქცინირებულია მოსახლეობის, დაახლოებით, 35 პროცენტი. ოქტომბრის ბოლოს იქ დაკეტეს ყველა მაღაზია, სასურსათოს გარდა, და რესტორნები, სკოლები კი ნაწილობრივ ონლაინსწავლებაზე გადაიყვანეს. საბიუჯეტო ორგანიზაციების თანამშრომლებს ცხრადღიანი ხელფასიანი შვებულება გამოუწერეს და დაავალდებულეს, მინიმალურად დატოვონ სახლი.
რამდენიმე სხვა ქვეყანაც აწესებს მკაცრ შეზღუდვებს კორონავირუსით ინფიცირების ზრდის გამო. ავსტრალიაში, 17 დეკემბრიდან, არავაქცინირებულ ადამიანებს რესტორნებსა და პაბებში შესვლა და სპორტულ ღონისძიებებზე დასწრება აეკრძალებათ.
სინგაპურში განაცხადეს, რომ დეკემბრიდან ისინი, ვინც საკუთარი სურვილით გადაწყვიტეს, არ აიცრან, ინფიცირების შემთხვევაში მთლიანად თვითონ დაფარავენ მკურნალობის საფასურს.
ჯერჯერობით გამონაკლისია დიდი ბრიტანეთი. აქ COVID-19-ით ინფიცირების ერთ-ერთი ყველაზე მაღალი მაჩვენებელი შეინიშნება, მაგრამ არავაქცინირებულთა წინააღმდეგ შეზღუდვები ჯერჯერობით არ დაწესებულა.
